Laat sy Liefde jou Lei: Spoelklip-mense

Laat sy Liefde jou Lei: Spoelklip-mense – Milanie Vosloo

Spoelklip-mense

Wie hulle eie lewe liefhet, verloor dit; maar wie hulle lewe in hierdie wêreld haat, sal dit met die oog op die ewige lewe behou. Johannes 12:25

Die lewe, het Alba Bouwer gesê, is alte veel soos die bergwater wat hier langs die huis in die voor afkom: dit werkskaf aljimmers vorentoe, vorentoe, daar is nooit stilstaan nie.

En as ‘n mens jou geloef in die lieven Heer nie het nie, sal daai water jou lateraan so deurmekaar spoel lat jy onderstebo die Ewigheid indiewel.

Ons is almal spoelklippie-mense wat deur die strome van die lewe gemaal word. Soms vloei die koel fonteinwater-van-vreugde lawend oor ons harte. Ander kere is dit asof nuwe lewenservaring-water ons siele suiwer. Maar dan is daar ook dié kere wanneer die maalstrome van die wêreld ons amper wreed wil laat verdrink. Dis die tye wanneer ons geneig is om baie gou ons harte tot ons Vader te wend. En natuurlik is ons Redder altyd dan slaggereed om ons te help! Maar … wanneer ons Hom passievol lief het, roep ons nie net na Hom wanneer ons deur die lewe oorweldig word nie. Dan kies ons om daagliks … uurliks in totale afhanklikheid aan Hom te leef.

Vir ons almal kom daar ‘n dag wanneer die lewensstroom ons tot stilstand gaan bring. Dan is ons aardse lewe totaal irrelevant. Al wat dan gaan saak maak, is hoe naby ons aan Hom geleef het. Waar is jy vandag, spoelklippie-mens?

Here, ek wil nie één dag sonder U die waters van die lewe aandurf nie.

Bybelkennis gaan gereeld gedeeltes uit Milanie Vosloo se boek: Laat sy Liefde jou Lei, publiseer. Ons dank aan Milanie Vosloo en CUM vir hierdie vergunning.

Vir meer inligting oor CUM, besoek gerus hulle webblad by www.cumuitgewers.co.za

Milanie Vosloo

Laat sy Liefde jou Lei: Waarom glo jy?

Laat sy Liefde jou Lei: Waarom glo jy? – Milanie Vosloo

Waarom glo jy?

Maar ek, ek weet dat my Verlosser leef en dat Hy aan die einde op die aarde sal staan. Job 19:25

Glo en dien jy God oor die voordeel wat jy uit Hom kan kry of glo jy in jou hemelse Vader omdat jy onwrikbaar wéét dat Hy die enigste Gód is … dat Hy jóú Here is?

Job was ‘n man wat rede gehad het om ernstig met sy geloof te worstel. Alles wat hy gehad het, is immers in ‘n oogwink van hom af weggeneem. Toe Job op sy weerlooste is, was dit vir Satan dan ook die ideale geleentheid om hom te probeer wysmaak dat hy God net dien vir die voordeel wat hy uit Hom kon kry. Job slaag hierdie geloofstoets egter met vlieёnde vaandels wanneer hy erken dat Hy God dien vir wat God ís. Hy kies om in sy God te glo selfs toe hy die dood in die oё staar. Job verklaar onomwonde dat hy, ondanks al die teёspoed in sy lewe, sy Verlosser met sy hele hart vertrou en onomwonde wéét dat Hy – die God van ewige liefde – hom nooit in die steek sal laat nie. Job glo nie omdat sy geloof vir hom voordelig is nie, maar omdat hy met ‘n visie op die hemelse toekoms leef.

Job het geglo omdat hy vasgehou het aan dié wete dat God áltyd Gód sal bly en hom daarom altyd sal vashou. Is dit die rede waarom jý glo?

Immanuel-God, help my om my geloof te behou, selfs wanneer dit onmoontlik lyk.

Bybelkennis gaan gereeld gedeeltes uit Milanie Vosloo se boek: Laat sy Liefde jou Lei, publiseer. Ons dank aan Milanie Vosloo en CUM vir hierdie vergunning.

Vir meer inligting oor CUM, besoek gerus hulle webblad by www.cumuitgewers.co.za

Milanie Vosloo

Laat sy Liefde jou Lei: Jou geloofsreis

Jou geloofsreis

Nou sien ons dinge nog net vaagweg soos in ‘n dowwe spieёl, maar eendag sal alles vir ons glashelder wees. Nou verstaan ek net ten dele, maar eendag sal ek ten volle verstaan, net soos God my nou ten volle verstaan. 1 Korintiёrs 13:12

Geloof is ‘n reis: ‘n Ontdekkingstog wat ons onderneem vandat ons die eerste keer van “Liewe Jesus” gehoor het totdat ons eendag self voor die lewende God staan. Nou weet ons almal dat ‘n reis nie noodwendig net maanskyn en rose is waarin ons met gemak van punt A na punt B beweeg nie. Heel dikwels gaan ‘n reis gepaard met teenspoed, onverwagse ompaaie, moeilike fases en ernstige verdwaal-tye.

Aanvaar vandag dat jy as gelowige deur fases kán gaan wanneer jy wonder oor die sinvolheid van jou geloof, oor God se goedheid en oor die waarhede van die Skrif. Jy mag selfs van tyd tot tyd hopeloos verdwaal voel in jou geloofswêreld. Boonop het die bose mos ‘n manier om Christene se GPS’e heeltemal deurmekaar te krap in ‘n poging om hulle van koers af te kry. Daarom is dit so belangrik dat ons onder alle omstandighede sal vashou aan die Vader-van-geloof. Dat ons, ongeag al die verskillende geloofsrigtings en invloede op ons lewens, Hóm en Hóm alleen voor oё sal hou. En dat ons elke dag sal bid: Gees van God, help my asseblief om werklik te (blý) glo!

‘n Geloofsreis is nie vir sissies nie. Maar ‘n reis sonder geloof beslis ook nie!

Ja, Gees van God, help my om wérklik te glo!

Bybelkennis gaan gereeld gedeeltes uit Milanie Vosloo se boek: Laat sy Liefde jou Lei, publiseer. Ons dank aan Milanie Vosloo en CUM vir hierdie vergunning.

Vir meer inligting oor CUM, besoek gerus hulle webblad by www.cumuitgewers.co.za

Milanie Vosloo

Laat sy Liefde jou Lei: Wanneer ander jou vreugde steel

Laat sy Liefde jou Lei: Wanneer ander jou vreugde steel – Milanie Vosloo

Wanneer ander jou vreugde steel

Beproewing sal die soutkarakter van julle lewe versterk. Sout doen goeie werk. Maar as dit sy krag verloor het, hoe sal jy dit weer sout kan maak? Julle lewe moet soutkwaliteit hê, en julle moet in vrede saam met mekaar lewe.” Markus 9:49-50

Soms staan ‘n mens met ‘n lied in jou hart op en sien jy met vreugde uit na die dag wat kom … totdat jy jouself in ‘n brullende leeu vasloop.

Iemand wat met ‘n “seer tand” opgestaan het en daarom kyk wie hy kan verslind! In ‘n ommesientjie word jou vreugde vervang met ‘n stuk omgekraptheid waarmee jy nie wil leef nie. En so bederf één onsmaaklike mens die res van jou dag.

Sulke dae moet ons onthou dat ons Vader wil hê dat ons blydskap-kinders sal wees. Satan daarenteen sal verskillende aanvalstegnieke en wapens gebruik om ons vreugde te steel. Ja, en mense wat vir ons saak maak, is hoog op sy prioriteitslys. Juis daarom moet ons elke dag bedag wees op ons vyand se aanvalsmetodes en, wanneer iemand ons vreugde steel, onmiddellik die blydskap wat ons in Christus het, terugeis. Vra dan dat die Gees in jou ‘n gesindheid van vergifnis en liefde sal sit wat brullende leeus in hul spore stop!

Jy is die sout van die aarde. Sorg daarom dat jy – wanneer die lewe laf is – nog meer gefokus bly op jou bron van krag en liefde: Jou Vader-van-Vreugde!

Heilige Gees, vandag bind ek u halssnoer van liefde, vrede en hemelse vreugde om my hart.

Bybelkennis gaan gereeld gedeeltes uit Milanie Vosloo se boek: Laat sy Liefde jou Lei, publiseer. Ons dank aan Milanie Vosloo en CUM vir hierdie vergunning.

Vir meer inligting oor CUM, besoek gerus hulle webblad by www.cumuitgewers.co.za

Milanie Vosloo