Moenie toelaat dat die slegte julle onderkry nie, maar deur goed te doen moet julle die slegte hokslaan. Romeine 12:21

Nie een van ons is ‘n sondelose engel nie. Daarom maak ons foute, is daar misverstande tussen ons, verstaan ons mekaar verkeerd en kan ons soms ons humeur totaal en al verloor.

Nouja, geen meningsverskil, krapperigheid, ongedurigheid of ‘n ernstige bakleiery is lekker nie, maar juis as gevolg van ons uiteenlopende perspektiewe, is konflik soms onvermydelik is. Daar bestaan nie ‘n bloudruk vir “liefdevolle” konflikhantering, tog kan die volgende TOP-beginsels ‘n waardevolle riglyn wees:

 

• Tyd: Tyd het ‘n manier om kalmte, perspektief en insig te bring. As jy dus kan, speel of sorg vir ‘n afkoelperiode – ‘n fase waarin elke party kans kan kry om nugter oor alles te dink.
•  ntspan: Baie dinge is al gesê en gedoen in tye wanneer mense gespanne, oorhaastig of ongeduldig is. Gee jouself asemhalingstyd en vra die Gees om aan jou kalmte, vrede en wysheid te gee.
• Probeer verstaan: Die oomblik wat ons begrip het vir iemand anders se agtergrond, situasies, motivering en rede, raak dinge vir ons duideliker en kan ons met groter deernis hulle kant van die saak insien. Dis gewoonlik die begin van wedersydse respek en die vind van gesamentlike oplossings.

Tyd wat heel, ‘n gemoed vol vrede en ‘n hart gevul met begrip en liefde, kan menige moeilike situasies makliker maak. En waar daar onmin is, weer vrede bring.

Here, ek glo en weet dat ek saam met U ook konfliksituasies met liefde kan benader.

Bybelkennis gaan gereeld gedeeltes uit Milanie Vosloo se boek: Laat sy Liefde jou Lei, publiseer. Ons dank aan Milanie Vosloo en CUM vir hierdie vergunning.

Vir meer inligting oor CUM, besoek gerus hulle webblad by www.cumuitgewers.co.za

Skrywer: Milanie Vosloo

Laat sy Liefde jou Lei: Na winter … leef ons weer – Milanie Vosloo

Ná winter … lééf ons weer

Nee, terwyl ons mekaar liefhet, sal ons by die waarheid bly en so in alle opsigte groei om soos Christus te wees. Efesiёrs 4:15a

Verliestye is soos die lewe. Dit gebéúr! En wanneer dit gebeur, kan ons altyd kies of dit ons weemoedig stem en of dit nuwe geleenthede tot groei vir ons inhou. Christus was ‘n Man wat verliese gekíés het. Hy het sy hemelse woonplekke vir ‘n aardse blyplek verruil, sy koningskap prysgegee vir ‘n eenvoudige krip-bestaan en sy voete onder tollenaars se tafels ingeskuif terwyl Hy ewe gemaklik saam met hooggeplaastes kon kuier. En in Getsemane  …. het Hy gevangeneskap bo vryheid gekies en uiteindelik die lewe vir die dood verruil! Tóg was dit juis hierdie verliese wat aan ons die léwe saam met Hom gegee het.

Soms vra ons Vader dat ons ook afskeidsmense sal wees juis omdat Hy ons daardeur méér wil bied. Hy vra dat ons ons siele vir Hom gee, sodat ons verlos kan wees; dat ons ons seer by Hom sal los, sodat ons heelword kan ervaar; dat ons ons opgehoopte skuldbagasie voor sy kruis sal neersit sodat ons met vryheid kan leef; dat ons sal vergewe sodat God ons kan vryspreek; dat ons ons eie belang ondergeskik sal stel sodat sy liefde in ons lewens kan kristalliseer.

God kan uit enige verlies iets skep wat mooi, beter … meer ewig is. Hou daarom, in die wintertyd van jou lewe altyd sy blinkblaar-somer voor oё.

Grote God, ek wil my jare-oue ménsbagasie inruil vir ‘n nuwe visie op die toekoms.

Bybelkennis gaan gereeld gedeeltes uit Milanie Vosloo se boek: Laat sy Liefde jou Lei, publiseer. Ons dank aan Milanie Vosloo en CUM vir hierdie vergunning.

Vir meer inligting oor CUM, besoek gerus hulle webblad by www.cumuitgewers.co.za

Skrywer: Milanie Vosloo

Laat sy Liefde jou Lei: Laat God jou laste dra – Milanie Vosloo

Laat God jou laste dra!

Kom na My toe, julle almal wat moeg is en swaar laste dra, en Ek sal julle lewens verkwik. Matteus 11:28

Jy is vróú. juis daarom beleef jy baie dinge in die lewe met intensiteit en stoei jy soms met ‘n klomp bagasie in jou lewe. Wanneer Jesus vra dat ons ons laste vir Hom moet gee, bedoel Hy ook die volgende:

• Wanneer ons met ons tipies vroulike skuldgevoelens stoei, sê Hy in sy liefde: Gee vir My elkeen van jou skuldigvoel-gedagtes, Ek wil dit vir jou dra en in die plek daarvan vir jou ‘n bondel vol sagte vrede gee.
• As jy in tye van pyn en hartseer stoei, sê Hy: Kom stort jou seer by My uit. Sit jou kop op my skouer en ervaar hoe ek jou met groot teerheid toevou … en aan jou heling bring.
• As ons voel of ons lewens maar net nie suiwer en optimaal is nie, hoor ons ons Vader sê: Lê jou opstandige wil en persoonlike belang af en maak my wil joune. Dan sal jy oorvloedig leef!
• En wanneer ons sukkel met gevoelens van irritasie, wraak en bitterheid, vra Hy: My kind, gee daardie afbrekende gedagtes vir My sodat ek aan jou ‘n hart van vergifnis en liefde kan gee.

Gee vandag – sonder huiwering – al die dinge waarmee jy so stoei, eenvoudig vir Hom en laat toe dat sy liefde aan jou ‘n lewe van oorvloed gee.

Here Jesus, neem my las en gee my ú las: die een wat lig is asseblief.

Bybelkennis gaan gereeld gedeeltes uit Milanie Vosloo se boek: Laat sy Liefde jou Lei, publiseer. Ons dank aan Milanie Vosloo en CUM vir hierdie vergunning.

Vir meer inligting oor CUM, besoek gerus hulle webblad by www.cumuitgewers.co.za

Skrywer: Milanie Vosloo

Sit ‘n wag voor die deur van woede – Milanie Vosloo

Sit ‘n wag voor die deur van woede

My geliefde broers en susters, wees altyd gou om te luister, nie te gou om te praat nie, en nie te gou om kwaad te word nie. As jy kwaad is, kan jy nie doen wat God wil hê nie. Jakobus 1:19

Die meeste van ons het die vermoё om smoorkwaad word. Dis maklik. Maar om woedend te wees met die regte persoon op die regte manier, tot die regte mate, vir die regte doel en op die regte tyd – dís nie so maklik nie, skryf Aristoteles. As ons dit maar kon regkry, sou daar veel meer vrede, geregtigheid en liefde op hierdie aarde wees. Maar nou maak ons woede mense stukkend en steel dit ons innerlike geluk en vrede. Omdat kwaadword gewoonlik in ‘n onverwagse oomblik gebeur, is dit so belangrik dat ons elke dag sal bid:

O Gees van God, U ken my swakhede, opgeboude emosies, vooroordele en  vinnige reaksies. U weet hoe maklik ek my humeur kan verloor en dinge doen en sê waaroor ek later spyt is. Daarom bid ek dat U aan my die oё, ore en hart sal gee wat ander met deernis sal verstaan, met onselfsugtigheid sal koester en met liefde sal bejeën. En wanneer ek kwaad word, laat dit vir die regte rede en op die regte manier wees.

Kom ons bid: Here, hou ‘n wag voor die deur van my hart wat enige vorm van vyandskap sal verban, maar vrede sal verwelkom. Ja, gee aan my meer as sewentig-maal-sewe-vergifnis.

Ja, Gees van God, ek smeek U om u vrede.

Bybelkennis gaan gereeld gedeeltes uit Milanie Vosloo se boek: Laat sy Liefde jou Lei, publiseer. Ons dank aan Milanie Vosloo en CUM vir hierdie vergunning.

Vir meer inligting oor CUM, besoek gerus hulle webblad by www.cumuitgewers.co.za

Skrywer: Milanie Vosloo