Laat sy Liefde jou Lei: Hoort sy liefde by die werk? – Milanie Vosloo

‘n Mens wat wys is, sê verstandige dinge. Hy kan ander mense onderrig. Spreuke 16:23

‘n Paar jaar gelede was dit aanvaarbaar om jou geloof openlik by jou werk uit te leef. Niemand sou jou daaroor verkwalik het of oor die vingers getik het nie. Vandag is dit anders. Omdat ons in ‘n land leef waar ons probeer om mekaar op alle terreine te akkommodeer en te respekteer, vra die werkplek soms van ons dat ons ons geloof met oorleg en versigtigheid sal uitleef.

Die vraag is nou, hoe kan ons – te midde van beperkinge en voorgeskrewe reёls – steeds Christus se liefde in die werkplek uitleef?

• Ons kan dit doen deur die Gees toe te laat om ons elke nuwe oggend te suiwer van alle vorme van magsbeheptheid, afguns, geïrriteerdheid of onvergewensgesindheid.
• Ons kan bid dat Hy in die plek daarvan vir ons begrip en deernis sal gee vir die mense aan wie ons rapporteer, vir ons medekollegas veral ook vir die mense aan wie ons moet leiding gee.
• Alleen wanneer ons in totale afhanklikheid voor Hom staan, kan ons Vader ons dan met sy soort liefde vul. Dié liefde wat so leef, werk, praat en doen dat ons – te midde van ‘n harde wêreld – iets van sy sagtheid weerkaats.

Die werkplek is ‘n uitdagende akker om in te ploeg, want dit is heel dikwels daar waar dit die heel moeilikste is om geloofsliefde te leef. Maar kom ons probeer!

Here, gee aan my die wysheid en moed om u waarhede ook in my werkplek te leef.

Bybelkennis gaan gereeld gedeeltes uit Milanie Vosloo se boek: Laat sy Liefde jou Lei, publiseer. Ons dank aan Milanie Vosloo en CUM vir hierdie vergunning.

Vir meer inligting oor CUM, besoek gerus hulle webblad by www.cumuitgewers.co.za

Skrywer: Milanie Vosloo

Laat sy Liefde jou Lei: Masker-mense – Milanie Vosloo

Soos jou gesig weerkaats in water; so wys iemand se hart wat in hom aangaan. Spreuke 27:19

Ervaar jy ook dat jy dit nogal goed kan regkry om ordentlik, erkentlik en respekvol teenoor mense buite jou gesinsverband op te tree, maar dat jy jou vriendelik-wees-masker sommer gou laat sak die oomblik wanneer jy by die huis in stap? Die lewe het ons immers geleer om maskers-van-goed-wees op te sit wanneer ons met ander mense te doen het. Net jammer dat ons, wanneer ons moeg en geïrriteerd by die huis in stap, summier hierdie maskers afruk en dan ons mooi maniere by die voordeur los.

Nouja, dit sou ‘n hartseer dag wees as ons nié onsself by ons gesinsmense kon wees nie. Dis immers die een plek waar ons ons skoene pretensieloos mag uitskop. Natuurlik mag ons onsself wees by ons vertrouelinge … so lank gemaklikheid en vertroudheid net nie gepaard gaan met ongeskiktheid, onvriendelikheid en onbeleefdheid nie! Want dit wat ons by ons hartsmense is, is wat ons inderwaarheid régtig is. Wanneer ons die Gees toelaat om opregte en spontane liefde in ons harte kweek, sal ons altyd – ook wanneer ons nie hoef voor te gee nie – met ware integriteit en goedheid teenoor mense leef.

Die uitleef van ons geloof en liefde begin in die kern van ons harte en die beoefening daarvan kristalliseer onder ons binnekringmense. As ons dit dáár kan doen, kan ons dit enige plek doen: maskerloos!

Vader, maak my ‘n integriteitsmens: iemand wat op alle tereinde van my lewe die liefde met passie leef.

Bybelkennis gaan gereeld gedeeltes uit Milanie Vosloo se boek: Laat sy Liefde jou Lei, publiseer. Ons dank aan Milanie Vosloo en CUM vir hierdie vergunning.

Vir meer inligting oor CUM, besoek gerus hulle webblad by www.cumuitgewers.co.za

Skrywer: Milanie Vosloo

Laat sy Liefde jou Lei: Ons God breek mure af – Milanie Vosloo

As iemand wat jou haat, honger is, moet jy hom iets gee om te eet. As hy dors is, gee hom iets om te drink. Die Here sal jou daarvoor vergoed. Spreuke 25:21-22a

Daar is niks wat ons Vader nie kan doen nie, wéét jy en sê jy. En tóg leef jy al vir soveel jare met ‘n muur tussen jou en iemand anders. ‘n Muur wat jy glo onafbreekbaar en onoorkombaar hoog is. Miskien is dit iemand wat jou vreeslik te na gekom het, jou vertroue geskend het, jou bitter seer gemaak het of jou wreed in die steek gelaat het. Dalk is dit iemand wat oor tyd elke greintjie selfvertroue in jou afgebreek het, jou menswees geskaad het of jou op verskillende maniere stukkend gemaak het.

In al hierdie gevalle het jy heelwaarskynlik meer as genoeg rede om woedend teenoor daardie persoon te wees. En God verstaan dit. Hy wéét immers presies waardeur jy gegaan het. Maar jou Vader wil ook baie graag jou hart-van-wrok afbreek omdat Hy weet watter blokkasies hierdie emosies in jou lewe veroorsaak. Miskien moet jy sommer vandag op jou knieё gaan en daardie persoon, wat jou so stukkend gelaat het, onvoorwaardelik vir die Vader gee. Vra dat Hy sy soort vergifnis in jou hart sal sit en die muur van skeiding stukkie vir stukkie sal afbreek.

Bid, gló en weet dat God in staat is om ‘n wonderwerk in jou en ander se harte te laat gebeur.

Vader, maak asb heel daar waar dit by stukkendwees verby is.

Bybelkennis gaan gereeld gedeeltes uit Milanie Vosloo se boek: Laat sy Liefde jou Lei, publiseer. Ons dank aan Milanie Vosloo en CUM vir hierdie vergunning.

Vir meer inligting oor CUM, besoek gerus hulle webblad by www.cumuitgewers.co.za

Skrywer: Milanie Voslloo

Laat sy Liefde jou Lei: Die “lewe” dryf soms die liefde weg! – Milanie Vosloo

“Wees julle dan volkome in die liefde, soos julle hemelse Vader volkome in sý liefde is…” Matteus 5:48a

God het jou al telkemale gewys dat jy iets moet doen. In jou hart is jy oortuig daarvan dat Hy jou op ‘n besondere manier vir ‘n baie spesifieke taak wil gebruik. Maar jy kom jy nie daarby uit nie, omdat die “lewe” – dit wat jy elke dag moet doen – jou eenvoudig nie die tyd géé om dit te doen nie. Jy is waarskynlik só besig met die dringende dinge van die lewe, dat jy nooit by die belangrike dinge uitkom nie.

Natuurlik is daar verpligtinge waarvan ons nie kan wegkom nie, maar die feit is ook dat, as ons nie tyd vir die belangrike dinge in ons lewens máák nie, ons dit nooit sal doen nie. En heelwaarskynlik altyd onvervuld sal voel. Aan die ander kant leer die Skrif ons dat wanneer ons gehoorsaam aan sy stem is, die lig vir ons sal deurbreek. Hy wat jou red, sal voor jou uit gaan, die heerlikheid van die Here sal jou van agter beskerm. Jesaja 58:8b

Moenie toelaat dat die lewe en sy elke dag se doen-lysies in die plek staan van dié belangrike dinge waarvoor jy geroep is nie!

Neem vandag nog die dagboek van jou lewe in oёnskou en bid dat die Gees van God jou sal wys hoe jy die tyd kan maak om te doen wat jou hart voel om te doen.

Heilige God, maak my volkome in die rol wat U vir my beplan het.

Bybelkennis gaan gereeld gedeeltes uit Milanie Vosloo se boek: Laat sy Liefde jou Lei, publiseer. Ons dank aan Milanie Vosloo en CUM vir hierdie vergunning.

Vir meer inligting oor CUM, besoek gerus hulle webblad by www.cumuitgewers.co.za

Skrywer: Milanie Vosloo