Laat sy Liefde jou Lei: ‘n God vir droogmaakmense – Milanie Vosloo

Jesus sê toe vir haar: “Ook Ek veroordeel jou nie. Gaan maar, en moet van nou af nie meer sonde doen nie.” Johannes 8:11b

Jy kan met opregtheid sê dat jy God se riglyne vir die lewe in al die fasette van jou menswees probeer toepas. Daarom is gesonde menseverhoudinge vir jou belangrik, doen jy elke dag jou dagtaak na die beste van jou vermoё en hanteer jy die eise van die lewe meestal met passie, geduld en deursettingsvermoё.

En tóg weet jy ook dat – ondanks jou beste pogings – daar ‘n moontlikheid is dat dinge iewers langs jou pad, verkeerd kan loop, foute op onverklaarbare maniere kan insluip, ongevraagde misverstande kan ontstaan of jy sommer net die spoor byster kan raak. Dis dan wanneer jy wonder: Waarom kan ek, as gelowige, nie perfek wees nie? Wanneer gaan ons volmaak wees?

Onthou: die reis van ‘n gelowige is ‘n reis van ‘n land ver weg van hierdie wêreld af. Dis ‘n reis waarop ons gaan struikel en val en waarop ons soms gaan verdwaal. Maar onthou ook: Dat Jesus juis gekom het om droogmaakmense van hulself te red en dat die Heilige Gees gekom het om ons in ons menslike swakhede by te staan.

Vir dié wat besef dat hulle uit hulself nie tot die goeie in staat is nie, sê God in Jesaja 57:18: “Ek het gesien wat jy (hy) doen, maar ek sal jou (hom) gesond maak! Ek sal jou (hom) begelei en jou (hom) herstel en vertroos.

O Here, kom my swakheid te hulp asseblief!

Bybelkennis gaan gereeld gedeeltes uit Milanie Vosloo se boek: Laat sy Liefde jou Lei, publiseer. Ons dank aan Milanie Vosloo en CUM vir hierdie vergunning.

Vir meer inligting oor CUM, besoek gerus hulle webblad by www.cumuitgewers.co.za

Skrywer: Milanie Vosloo

Laat sy Liefde jou Lei: As ons maar dít sou doen … – Milanie Vosloo

Al die gelowiges het gereeld bymekaar gekom, en hulle het alles wat hulle besit het, met mekaar gedeel. Hulle het hulle grond en besittings verkoop en die geld aan almal uitgedeel volgens elkeen se behoefte. Handelinge 2:44

Die Indiese leier, Mohandas Gandhi het lank gelede reeds vir ons gesê dat daar mense is wat so honger is dat God net aan hulle sal kan verskyn in die vorm van ‘n brood …

Wanneer ons die verhaal van die eerste gemeente in Jerusalem lees, is dit duidelik dat hierdie gelowiges net een doel voor oё gehad het: om vir die hele mensdom te vertel en te wýs hoe groot God se liefde is. Daarom het hulle eenvoudig gegéé. Hulle het hul tyd, vermoёns, geld en hul besittings onvoorwaardelik met ander gedeel. Die resultaat daarvan was: Hulle het God deurentyd geprys, en die goedgesindheid van die hele volk geniet. En die Here het elke dag mense wat gered word, by hulle gevoeg. (Handelinge 2:4)

Ons leef soms soos outomate in ons eie klein leefwêreld – onaangeraak deur die nood en wêreld van die wat daar buite maar net probeer oorleef. Miskien moet ons meer gereeld bid dat die Gees aan ons ‘n dóén-geloofspassie sal gee sodat ons – die kerk van die 21ste eeu – Christus se liefde prakties sal leef.

Ek en jy ís die “gemeentes” van ons dag. Dis óns wat aan mense moet verskyn. Soms in die vorm van ‘n brood, ander kere deur ons diensbaarheid, maar áltyd deur ons liefde.

Here, ek wil graag ‘n bruikbare instrument van daadwerklike liefde wees

Bybelkennis gaan gereeld gedeeltes uit Milanie Vosloo se boek: Laat sy Liefde jou Lei, publiseer. Ons dank aan Milanie Vosloo en CUM vir hierdie vergunning.

Vir meer inligting oor CUM, besoek gerus hulle webblad by www.cumuitgewers.co.za

Skrywer: Milanie Vosloo

Laat sy Liefde jou Lei: Die genade-reёnboё in jou lewe

Die Here is jou beskermer aan jou regterkant. Die son sal jou bedags nie aantas nie, nog minder die maan in die nag … Die Here hou wag oor jou, of jy kom of gaan, nou en vir altyd. Psalm 121:5-6, 8

Murray Bank vertel die legende van die skatryk koning wat aan ernstige depressie gely het. Iemand vertel hom toe dat hy genees sal word wanneer hy ‘n waarlik gelukkige man se jas kon aantrek. Dadelik het hy sy amptenare gestuur om ‘n sielsgelukkige man te gaan soek. Na ‘n lang soektog, kry hulle toe ‘n man wat glo dat hy die heel gelukkigste man in die wêreld is. Al probleem toe was … dat hy te arm was om ‘n jas te besit.

Ons liewe Vader sit elke dag ‘n duisend reёnboё in ons lewens. Ons leefwêrelde is propvol kleurryke stukkies seёn. Dink maar aan die wonder van ‘n verkwikkende nagrus en die feit dat jou liggaam – selfs terwyl jy geslaap het – 100% bly funksioneer het. Of die feit dat jy gesond is, kan werk, kos het om te eet … mense het om lief te hê … en dié God ken wat tot die dood aan jou getrou is.

Kom ons belééf weer vandag elkeen van die volryk genadekleure in ons lewens: Ja, kom ons sien, hoor, ruik, proe en voel met nuwe verwondering hoe ruimskoots God se druppels genadereёn elke dag oor ons val. Kom ons erváár die reёnboё-van-trou wat Hy goedgunstelik oor ons vou.

Ek loof U vir elke reёnboog-vreugde in my lewe!

Bybelkennis gaan gereeld gedeeltes uit Milanie Vosloo se boek: Laat sy Liefde jou Lei, publiseer. Ons dank aan Milanie Vosloo en CUM vir hierdie vergunning.

Vir meer inligting oor CUM, besoek gerus hulle webblad by www.cumuitgewers.co.za

Skrywer: Milanie Vosloo

Laat sy Liefde jou Lei: Sy reёnboog van beloftes – Milanie Vosloo

Wanneer Ek die wolke in die lug laat saampak en die reёnboog verskyn, sal dit My herinner aan my verbond met julle en alle lewende wesens dat daar nooit weer ‘n vloed sal wees wat alle lewe vernietig nie.” Genesis 9:14-15

Reёnboё het ‘n manier om my tot stiltstand te roep. Want afgesien van die magiese beeld van hierdie sewe-kleur skeppingswonder, onthou ek weer dat God die reёnboog geskep het om ons aan sy onwankelbare beloftes van trou te herinner.

Die geskiedenis het bewys dat ons Here nog elke belofte van Hom lewensgetrou nagekom het … selfs toe dit beteken het dat sy Seun moes sterf! God is doodernstig oor sy groot lewens- en verlossingsbeloftes, maar ons Here is soortgelyk getrou aan die klein dingetjies van ons lewens. Hy is letterlik tot in die kleinste detail toegewyd betrokke by elke faset van jou lewe. Wanneer jy dus om leiding, krag en wysheid bid, hoor Hy dit nie net nie, Hy belowe ook dat Hy Homself daartoe verbind om elke tree van jou pad sáám met jou te loop.

Hoop, sê Tissa Balasuriya, is die onwankelbare sekerheid dat God se beloftes sal realiseer – gegrond nie op ‘n ydele wens nie, maar op die werklikheid van die lewe, sterwe en opstanding van Jesus Christus.

Onthou vandag en elke keer as jy sy reёnboog-van-genade sien dat God sy kinders meer as sewentig maal sewe vergewe, hulle tot in die duisendste geslag seёn en ‘n ewigheid liefhet.

Dankie Meester, dat U tot die kleinste besonderhede lewensgetrou aan my is.

Bybelkennis gaan gereeld gedeeltes uit Milanie Vosloo se boek: Laat sy Liefde jou Lei, publiseer. Ons dank aan Milanie Vosloo en CUM vir hierdie vergunning.

Vir meer inligting oor CUM, besoek gerus hulle webblad by www.cumuitgewers.co.za

Skrywer: Milanie Vosloo