Laat sy Liefde jou Lei: Die dinge wat ons vergeet – Milanie Vosloo

Die dinge wat ons vergeet

Hulle het gou-gou vergeet hoe vol liefde en goedheid U is. Psalm 106:7b

Sommige vergeetdinge is nie ernstig nie. Ons kan dit altyd weer doen, weer opspoor of weer regmaak. Ander dinge veroorsaak egter krisisse, probleme en maak ons diep ongelukkig. Soos wanneer ons vergeet hoe groot ons God is! Wanneer ons op onsself fokus, dinge op óns tyd en óns manier doen en glo dat ons sélf ons probleme kan oplos, is ons op ‘n ernstige vergeet-koers.

Nouja, dit maak nie saak op watter plek van jou woestynreis jy is nie, dit sal jou goed doen om vandag net weer te onthou hoe:

• oneindig groot God is: Hy hou die hele heelal met sy biljoene sterrestelsels soos ‘n speelballetjie in sy hand. Dink jy vir een oomblik Hy is nie in staat om jou probleme op te los nie?;
• ongelooflik goed die Vader vir jou is: Onthou jy hoeveel keer Hy al vir jou op wonderbaarlike maniere gehelp, gedra en geseën het?
• rotsvas die Here se trou is: Het God jou al ooit in die steek laat? Nee, jou dierbare Heer het, getrou aan sy Woord, nog elkeen van sy beloftes tot die dood toe nagekom!

Maak vandag weer erns om werklik te onthou hoe groot, goed en getrou jou hemelse Vader is en gaan leef dan met die oortuiging dat God jou op die pad sal lei wat vir jou die heel beste in die wêreld is.

Ek weet U is met my op pad, Vader. En ek volg U blindelings!

Skrywer: Milanie Vosloo

Laat sy Liefde jou Lei: Onthou om te onthou – Milanie Vosloo

Onthou om te onthou

Hulle het gou-gou weer vergeet wat die Here gedoen het… Daar in die woestyn het hulle net aan hulself gedink. Psalm 106:13a,b

Ons vergéét! Nie net vergeet ons waar ons ons sleutels neergesit het nie, ons vergeet mense se name, verjaardae, dinge wat ons moet doen en belangrike inligting.

Kinders van God vergeet soms meer as net die plek waar ons ons bril neergesit het. Ons vergeet dikwels ons Vader se goedheid! Net so gou soos die Israeliete destyds gekla en in opstand teen hul omstandighede gekom het. Psalm 106 gee aan ons ‘n blik op die vergeet-pad van God se volk. Telkemale red die Here hulle wonderbaarlik en kort daarna kla hulle weer, aanbid hulle ander gode en ignoreer hulle sy voorskrifte. En keer op keer lees ons hoe God sy volk jammer gekry en hulle weer uit hulle gemors gered het.

Wanneer ons God se goedheid in ons lewens vergeet, van sy koers af raak en ons eie oordeel belangriker as sy wil ag, maak ons sy hart so seer. Want dan wéét Hy dat ons op ‘n ramp afstuur. En dan roep Hy ons met groot deernis na Hom toe terug: na die plek waar ons veilig is.

Waar is jy vandag? Op ‘n plek waar jy onthou hoe lief die Vader nog altyd vir jou was of op jou vergeet-stadium waar jy Hom aan sy goedheid twyfel?

Vader-God, help my om dwarsdeur my woestynreis te onthou dat U mý God was, is en altyd sal wees.

Skrywer: Milanie Vosloo

Laat sy Liefde jou Lei: Begrip kyk anders na ander – Milanie Vosloo

Begrip kyk ánders na ander

Maar U is ‘n God wat vergewe, genadig en vol deernis. U word nie gou kwaad nie, U is liefdevol en getrou. Nehemia 9:17c

Wonder jy soms hoe op aarde ons Vader dit kan regkry om mense keer op keer te vergewe? Onsself en ander stel Hom tog so baie keer teleur, raak opstandig teenoor Hom en doen elke dag soveel dinge wat nié volgens sy wil is nie. En dan … sê Hy maar wéér: Ek vergewe jou, my kind. Want Ek het jou só lief.

God vergewe onvoorwaardelik omdat Hy God is: die God van liefde is. Maar Hy vergewe ook omdat Hy elkeen van ons soos sy handpalm ken, ons denke verstaan, met ‘n hart propvol deernis-begrip na ons kyk en ons dan onvoorwaardelik aanvaar.

Vergifnis het baie keer met begrip te doen. Hoe meer ons van ‘n iemand verstaan en hoe groter ons insig in sy/haar persoonlikheid, omstandighede en wêreld is, hoe makliker is dit om hom/haar lief te hê. En wanneer ons lief het, kan ons dit ook regkry om onvoorwaardelik te aanvaar en te vergewe.

Jy hoef nie van iemand te hou om hom lief te hê nie. Jy hoef ook nie saam te stem met wat hy/sy doen nie, maar jy kan altyd probeer verstaan. Probeer begrip hê waar iemand vandaan kom, wat sy/haar motivering is en hoe hy/sy dink.

Kies vandag om met ‘n hart vol goddelike begrip, liefde en vergifnis na ander te kyk.

Here, help my ander met empatie te bejeёn en hulle sonder voorbehoud lief te hê.

Skrywer: Milanie Vosloo

Laat sy Liefde jou Lei: Foute-verkleinglas – Milanie Vosloo

Foute-verkleinglas

En hoe sien jy die splintertjie in jou medemens se oog raak, maar jy merk die yslike stomp in jou eie oog nie op nie? Matteus 7:3

Ons is so geneig om met vergrootglase na almal rondom ons te kyk. In ‘n poging om beter oor onsself te voel en ons eie foute te verbloem, wil ons graag die foute in ander se lewens opblaas en dit pertinent uitwys. Dan vertoon ons mos beter, of hoe?

Die wonder van God se genade is dat Hy ons almal – ongeag al die donker kolle in ons lewens – deur die lig van vergifnis beoordeel. Voordat Hy na ons kyk, laat vloei Hy eers die genadebloed van sy Seun oor ons lewens. Daarna sien Hy ons in ‘n heel ander lig: dan sien Hy ‘n vlekloos en gesuiwerde mens voor Hom.

As ons Vader ons foute met soveel passie uitwis, kan ons mos maar ander ook met dieselfde vergrootglas-van-liefde beoordeel. Wanneer ons dit doen, sal ons op die goed en mooi in hul lewens gefokus wees en hul flaters en tekortkominge van veel minder waarde ag. Ons mag selfs verbaas wees oor hoe ánders hulle vir ons lyk en hoe “mooi” hulle selfs in hul gebrokenheid is.

Onthou vandag Philip J Bailey se woorde: “Hulle wat die meeste vergewe, sal die meeste vergewe word.” Hoor dit en besef opnuut met hoeveel deernis jou Vader jou aanvaar en liefhet. Deel dan daardie omarmende liefde ruimskoots aan ander uit.

Here, help my om op die positiewe, die mooi en die goed in ander te fokus.

Skrywer: Milanie Vosloo