Laat sy Liefde jou Lei: Jy’s nie weggegooi nie! – Milanie Vosloo

Jy’s nie weggegooi nie!

Sara het Abraham beveel: “Smyt hierdie Egiptiese vrou en haar kind onmiddellik uit. Haar kind kan verseker nie saam met my kind erf nie.” Genesis 21:10

Ons almal het dit al beleef. Daardie gevoel dat ons weggegooi is! Dalk gaan hierdie weggooi-gevoel so ver as jou kinderjare terug. Miskien het jy op ’n stadium ’n vreeslike seer verwerpingservaring gehad wat vandag steeds ’n diepgewortelde letsel in jou hart laat. Of dalk was dit sommer net iets wat iemand gesê of gedoen het wat jou eenkant-gestoot laat voel het.

Soos Hagar, die vrou wat Abraham se eerste kind, Ismael, op Sara se aandrang verwag het en wat toe op ’n dag deur dieselde Sara uit die huis gejaag is. So beland Hagar en haar klein seuntjie in die woestyn waar hulle byna van die honger en dors omkom. ’n Hartseer verhaal van ’n verwerpte vrou wat eenkant sit en huil … totdat God ingryp. God sien hierdie weggooivrou raak, stuur ’n Engel om haar te versterk en haar te oortuig dat Hy nie haar of haar seun in die steek sal laat nie. “Gaan tel hom (jou seun) op en troos hom, want Ek sal hom nog eendag ’n groot nasie maak.” bevestig die Engel van God aan haar in Gen 21:18b.

Vind vandag troos in die feite dat ons God by uitstek ’n Vader vir weggooimense is: vir mense wat om een of ander rede verwerping ervaar het en daarmee worstel.

Immanuel – God by my – dankie dat ek aan u bors heling vir my ál my emosies kan vind.

Skrywer: Milanie Vosloo

Laat sy Liefde jou Lei: Probeer anders voel – Milanie Vosloo

Probeer ánders voel

Sing vir die Here ‘n nuwe lied, want Hy het wonders gedoen. Hy het verlossing bewerk met sy krag en Goddelike mag … Breek uit in sang, sing van vreugde! Psalm 98:1,4

Soms het ons rede om in sak en as te sit en kla. Ander kere is ons geneig om met ’n groot gesnyde wit brood onder die arm ons lot te bekla teenoor almal wat wil luister (en selfs dié wat regtig nie lus is om te luister nie!). Dis die kere wanneer ons soos klein babatjies oor alles huil. Die geringste wind, hongerte, ongemak of nattigheidjie maak ons “ê-erig”!

As jy vandag so voel, kan jy dalk ‘n stuk bevryding ontvang deur die volgende te doen:

• Onthou ‘n slag wat jy wél het. Wanneer jy wegkyk van jou verliese en raaksien wat jy oor het, sal jy besef hoeveel onverdiende genade en seёn daar steeds in jou lewe is.
• Vergeet so bietjie van jouself. Ja, soms neem ons onsself, ons eie belang en emosies hopeloos te ernstig op!;
• Kyk weg van jou eie klein wêreldjie en sien raak dat daar duisende ander is wat veel groter behoeftes, nood en lyding het.
• Bid die volgende: “Here, maak my vry van hierdie klaagster-sindroom en help my om ’n ondanks-alles-vreugde-mens te wees”.

Bid vandag dat die Vader al die onnodige kla-onkruid uit jou hart sal spit en in die plek daarvan dankbaarheidsblomme sal plant.

Vergewe my my onnodige negatiwiteit, Vader en help my om weer ánders te dink, ánders te voel en ánders te leef.

Skrywer: Milamie Vosloo

Laat sy Liefde jou Lei: Jy is geregtig op vrede- Milanie Vosloo

Jy’s geregtig op vreugde!

My vyande, julle moenie julle verlekker nie! Ek het geval, maar ek sal weer opstaan. Al sit ek nou in duisternis die Here is ‘n lig vir my. Miga7:8

Depressie kan ’n duisend oorsake hê. Of geen! Want soms bekruip hierdie beklemmende gevoel ons op die mees ongevraagde tye. Soms met rede. Ander kere voel ons teen die planke sonder enige spesifieke oorsaak.

Die feit is: Depressie kom nie van God af nie. Die laaste ding wat ons Vader wil hê is dat ons morbied en swaarmoedig sal wees. Depressie kom eenvoudig van Satan af. Hy is die een wat mense se vreugde en passie vir die lewe steel sodat hulle sinloos en moedeloos voel.

As jy ’n erger graad van depressie beleef en al ’n geruime tyd daarmee stoei, is dit belangrik dat jy sal onthou dat God jou ook in jou donker uur met teerheid toevou, maar dat Hy ook weer wil sien dat jy die lig sal sien. Daarom moet jy werk daarvan maak. Dalk kan ’n geestelike leier of berader jou help. Soms kan dit selfs nodig wees dat jou mediese dokter medikasie moet voorskryf. Ander kere is dit dalk moontlik dat jy dit saam met die Gees van God en aan die hand van ’n getroue vriend/in, kan oorwin.

Moet nooit die vreugde wat Satan by jou gesteel het, aan hom oorgee nie. Eis jou blydskap en passie vir die lewe terug in die Naam van jou Vreugdekoning: jou Verlosser.

God-van-vreugde, verdryf asseblief die donker in my lewe met u lig … met U self.

Skrywer: Milanie Vosloo

Laat sy Liefde jou Lei: Hardloop struikelvry in die liefde – Milanie Vosloo

Hardloop struikelvry in die liefde

“ … Om My te volg is nie altyd maklik nie.” Markus 8:34B

Die lewe is nie ’n oefenlopie nie! Ons is nie net hier vir een van vele oefensessies voordat ons eendag aan die finale wedloop gaan deelneem nie. Ons is rééds besig met ons laaste – en enigste – wedloop van die lewe. En die manier hoe ons hier en nou hardloop gaan bepaal watter kroon ons eendag ontvang.

Die vereistes vir ons lewenswedlope is tegelykertyd eenvoudig en maklik en soms baie moeilik en ingewikkeld. Die eenvoud lê in die feit dat daar maar net een allesomvattende strewe, naamlik die liefde, is. Ons weet mos al dat die mate waartoe ons die Vader, onsself en ander liefhet, die enigste maatstaf vir die hemelse kroon gaan wees. Maar dis juis wat die deelname aan die lewenswedloop so moeilik maak. Want om elke dag met passie en entoesiasme almal rondom ons met onvoorwaardelike liefde te bederf, is geen maklike taak nie. Die hekkies van selfsug en die versperrings van gerief staan heel dikwels vierkantig in ons pad en keer op keer struikel ons oor een van ons sondes en menslike swakhede op pad wenpaal toe.

Om voluit in die liefde te leef, beteken dat ons elke dag … dwarsdeur die elke uur … in afhanklikheid van ons Vader sal leef. Dat ons keer op keer sal sê: Here, maak my leeg van myself en vol, propvol, met u liefde.

Vader-God, uit myself kan ek nie met oorgawe liefhê nie. Mét U, kan ek! Help my asseblief.

Skrywer: Milanie Vosloo