Laat sy Liefde jou Lei: Die genade van werk – Milanie Vosloo

Die genade van werk

Dit is goed dat mense lekker eet en wyn drink en hulle werk geniet, wat hulle ook al onder die son doen, so lank as wat God hulle laat lewe. Prediker 5:17b

Wanneer jy jou spesiale talente en gawes deur jou dagtaak kan uitleef, is jy besonder bevoorreg! Want dan het jy rede vir jou bestaan gevind, geniet jy wat jy doen en is jou werk ’n verlengstuk van jouself. Die kanse is dan ook goed dat jy die spesiale roeping wat God vir jou hier op aarde beplan het, uitleef. Vra jouself vandag die volgende vrae:

• Wat is my unieke talente; dié dinge waarin ek goed is?
• Wat is my natuurlik belangstelling? Vind ek dit in my huidige dagtaak?
• As ek vandag (oor) kon kies, wat sou ek die heel graagste wou doen?
• Wat behoort ek te verander of te doen om in staat te wees om dit te doen waarvan ek regtig hou en waarin ek goed is?
• Wat is my plan van aksie, wat het ek nodig en wat kan ek doen om by daardie doel uit te kom?
• Hoe kan ek God verheerlik deur dit wat ek (wil) doen.

God wil hê dat jy jou werk en die vrug van jou arbeid sal geniet! Besluit vandag dat jy wel jou lewensroepende werk kan en sal doen. Bid dat jy dit sal vind en gaan dan en dóén dit.

Vader, ek wil deur my werk lééf sodat ek deur my werk U kan verheerlik. Help my daarmee asseblief.

Skrywer: Milanie Vosloo

Laat sy Liefde jou Lei: Vind vrede in jou roeping – Milanie Vosloo

Vind vrede in jou roeping

En nou vertrou ek julle aan God toe en aan die boodskap van die onverdiende goedheid wat Hy aan mense bewys. Handelinge 20:32

Werk, in watter vorm ook al, gee betekenis aan ‘n mens se lewe. Party van ons vind daardie sinvolheid in ’n uitdagende korporatiewe loopbaan waar ons op hoë vlak ’n bydrae lewer. Daar in die raadsale van die wêreld vind ons ’n stuk energie wat ons menswees stimuleer en ons opgewonde maak. Ander kry daardie geluksgevoel deur hul entrepreneursdroom uit te leef en met groot sukses hul eie ondernemings te bedryf. Dan is daar dié wat byvoorbeeld daarvan hou om kinders te onderrig, ander te verpleeg, maatskaplike dienste te lewer, skoonheidsbehandelings te doen of die Woord te verkondig.

Ware sinvolheid is om besig te wees met dié dinge waaruit jý vreugde put. Wanneer jy dit doen, is die kanse goed dat jy dit ook uitmuntend sal doen en ‘n sukses daarvan sal maak. En wanneer jy daardie unieke roeping gevind het en dit uitleef, maak dit regtig nie saak wat die wêreld om jou doen nie! Want dan het jy die rede gevind waarom jý op aarde geplaas is en ervaar jy die waarheid waarvan ons in Prediker 5:11 lees: Mense wat hard werk, slaap goed, maak nie saak of hulle baie of min eet nie.

Ware sinvolheid vergelyk nie haarself met ander nie! Want sy het vreugde gevind in die liefde in haar hart, in haar werk en in dit wat sy is.

Vader-God, laat ek vrede vind in dit wat ek goed kan doen.

Skrywer: Milanie Vosloo

Laat sy Liefde jou Lei: Ek het God gevra … – Mlilanie Vosloo

Ek het God gevra …

God wil hê dat alle volke op aarde Hom moet dien. Hy wil hê dat ons almal voor Hom moet buig. Gelukkig is God naby aan ons almal. Handelinge 17:27

Vir baie jare het ek geworstel met die sinvolheid van mý lewe. Toe ek jonk was het ek geglo dit lê in ’n perfekte lyfie en skoonheid. In my twintigs het ek God gevra om aan my sukses, rykdom en geluk te gee. Na my kinders se geboortes, het my gebede meestal om hul beskerming en geluk gedraai terwyl ek al hoe meer vir wysheid begin bid het. Namate ek ouer geword het, het die kwessie van gesondheid ’n groot deel van my gebede uitgemaak … Ja, ons menslike gesprekke met God gaan mos maar heel dikwels oor onsself, die mense vir wie ons lief is en ons beskerming en voorspoed hier op aarde.

Natuurlik luister God na al ons mens-gebede en die detail van ons lewens. Tog dink ek dat God wil hê dat ons geloof en gebede ook sal groei tot vaste spys-voedsel. Ek dink Hy wil baie graag hê dat ons meer sal vra: Here, laat u wil deur my lewe geskied. Neem my menswees, heilig dit en laat ek dan sigbaar en hoorbaar u beelddraer wees.

Mag ek en jy die genade ontvang om tot God te bid vir die klein dingetjies, maar mag ons ook die onderskeidingsvermoё hê om vir dié dinge te bid wat werklik ‘n ewigheidsverskil maak.

Here Jesus, dankie dat my hele menswees ‘n kragtige instrument in u hande is.

Skrywer: Milanie Vosloo

Laat sy Liefde jou Lei: Kinderlike Passie – Milanie Vosloo

Kinderlike passie

Omdat God so baie vir ons omgee, sorg Hy dat ons almal elke dag kan leef en rondbeweeg. Ons bestaan slegs omdat Hy so wil … Ons is deur God gemaak. Ons behoort aan Hom.’” Handelinge 17:28a en 29a

Jou Skepper het meer in jou gesit as wat jy ooit kan droom of ooit in jou leeftyd kan uitleef. Miskien het jy al ’n groot deel van jou menskwaliteite uitgebou en kan jy met oortuiging sê dat jy jou goddelike potensiaal met passie leef. Hopenlik het jy ook in die afgelope paar dae opnuut motivering gevind in jouself, jou talente en vermoёns. Dalk het jy ook weer besef dat, soos John C Maxwell gesê het, God se koninkryk ongetwyfeld bevorder word deur mense met ‘n bietjie talent wat klein dingetjies vir ‘n groot God doen.

Ons kan almal sinvol en betekenisvol leef wanneer ons Gees van God toelaat om deur ons te werk en wanneer ons Hom vra om God se wil deur ons te laat werk. Kom ons bid daarom elke dag die volgende gebed: Dierbare Skepper, dat U in my eindelose moontlikhede geplaas het en dat U boonop aan my die toerusting gee om dit uit te leef. Vergewe my vir al die kere wanneer ek bang of lui terugdeins vir die uitdagings van die lewe. Maak u wil aan my bekend en help my om dit elke dag met die entoesiasme van ’n kind aan te pak en uit te voer.

Ja, Here, help my om dit wat reeds in my is, ten volle te ontwikkel.

Skrywer: Milanie Vosloo