Laat sy Liefde jou Lei: Hoe dink Hy oor jou? – Milanie Vosloo

Hoe dink Hý oor jou?

Die Here sê: Ek dink heeltemal anders as julle. Ek doen dinge ook heeltemal anders as wat julle doen. Soos die wolke ver bo die aarde is, is die manier waarop Ek dinge doen ook ver bo die manier waarop julle dit doen. Jesaja 55:8a

Niemand van ons is verniet op hierdie aarde nie. Ook nie jy nie. Toe God besluit het om jou in jou moeder se skoot te plaas, het Hy oor jou gedroom .. gesien hoe jy as mens ontwikkel, met passie leef en ‘n ware dissipel vir Hom is.

Nou mag jy sê: Waar is dié ongelooflike “ek” wat God gemaak het vandag? Voldoen ek aan sy reuse verwagtinge? Leef ek al die goed en mooi wat Hy in my geplaas het met passie en waardering uit? Of het ek mettertyd myself begin sus met “gewoon-wees”. Met woorde soos “Ek is maar so-so”, “Ek het tog nie juis talente nie” of “Ander mense is soveel meer besonders as ek.”? As dit jou gedagtegang is, moet jy weet: Jy dink nie soos God dink nie. En jy gebruik waarskynlik nie die wonderlike talente en gawes wat Hy in jou geplaas het nie. En dan … staan jy die kans om dit te verloor.

Onthou: jy hoef nooit geïntimideerd te voel oor die gawes en talente van ander nie. Die mens wat jy is en dit wat God in jou geplaas het, maak van jou die beste jý. Jy moet dit net met oorgawe gaan lééf!

Meester-mensmaker, help my om u droom vir my lewe, te volg!

Skrywer: Milanie Vosloo

Laat sy Liefde jou Lei: Jy het wonderlike Talente! – Milanie Vosloo

Jy hét wonderlike talente!

Net so sal dit wat Ek sê, nie weer na My toe terugkom nie. Dit sal vrugte dra. Dit sal alles doen wat Ek besluit het. Dit sal laat gebeur waarvoor ek dit gestuur het. Jesaja 55:11

Ons is almal karakter in God se Storie-van-die-lewe. Nou maak dit regtig nie saak hoe lank jou karakter hier op aarde is nie, wat wél saak maak, is wat die kwaliteit van jou lewe is terwyl jy nog besig is om aan jou storielyn skryf.

Vra jouself vandag die vraag: Waar en hoe pas ek in in die verhaal van God in? Is ek regtig die mens wat Hy beplan het ek sal wees en is my gedeelte van sy Storie eg, waar en goed?

Dit wat jy is en die talente wat jy ontvang het, is nie toevallig nie. God het presies geweet wat Hy vir jou met jou spesifieke persoonlikheid moes gee. Dis waarom jy is wat jy is en kan doen wat jy doen! En dis waarom jy op jou manier so ‘n groot deel uitmaak van sy groot Raadsplan. Wanneer jy dus jou talente en gawes met passie uitleef, maak jy van ‘n dood gewone mensstorie ’n uitmuntende verhaal. ‘n Mens-verhaal waaroor God stil glimlag.

In jou is daar eindelose potensiaal wat ontsluit kan word. Wanneer jy jou volle menswees uitleef, ontwikkel en tot eer van God aanwend, sal jou lewe méér as net sin maak: dit sal ewigheidswaarde inhou!

Meester, wys my hoe ek, dit wat ek is en het, nog beter kan leef.

Skrywer: Milanie Vosloo

Laat sy Liefde jou Lei: Laat jou gawes jou anders maak – Milanie Vosloo

Laat jou gawes jou ánders maak

Lê julle toe op die liefde. Bly egter ook entoesiasities oor die gawes van die Gees.1 Korintiёrs 14:1

Ons almal wil graag betekenisvol leef. ‘n Sinvolle lewe dra mos by tot ons selfwaarde en selfvervulling.

Die vraag is: Leef jy betekenisvol? Kan jy met oortuiging sê dat jy ‘n vervulde mens is omdat jy weet dat jy iewers op jou pad ‘n werklike verskil maak? Doen jy dit waarvoor jou Skepper jou hier op aarde geplaas het? Die feit is: jou Vader – die Een wat elke detail van jou lewe gemaak het – weet ook watter gawes Hy binne jou geplaas het. Hy het die bestanddele van jou menswees noukeurig uitgesoek en Hy weet presies wat die resep van jou lewe behoort te wees. Juis omdat Hy jou beter as jyself ken, weet Hy hoeveel goddelike gawes daar binne jou is, wat jou unieke sterk punte is en wat jou volle potensiaal is. Hy weet ook van dat van jou drome dalk al mettertyd vervaag het omdat ander dinge jou lewe opgeeïs het of jy dalk vertroue in jouself verloor het. En dan sê Hy vir jou: My kind, jy is soveel meer werd as wat jy dink. Binne in jou het ek wonderlike gawes geplaas waarmee jy my koninkryk kan bedien en waardeur jy groot betekenis in jou lewe sal vind.

Kniel vandag voor jou Meester en vra Hom: Here, wat is die gawes wat ek kan beoefen en waardeur ek U kan verheerlik?

Heilige Gees, ek wil ‘n diensbare en bruikbare instrument in u hande wees.

Skrywer: Milanie Vosloo

Laat sy Liefde jou Lei: Opofferende Diensbaarheid – Milanie Vosloo

Opofferende diensbaarheid

Jy sien dus dat hy God só vertrou het dat hy bereid was om te doen wat God vra. Sy geloof het dus eers volwassenheid bereik toe dit dade geword het. Jakobus 2:22

Jesus was vreemd. Duidelik was Hy nie die tipiese godsdienstige leier wat op ‘n verhoog die Evangelie verkondig het nie. Hy het mense bedien in Galilea, ‘n onbelangrike plek, op een of ander berg, in die agterstrate en op die uithoeke van dorpe – daar waar die melaatses gebly het. Sy gehoor was nie geleerdes, aansienlikes en mense uit ‘n hoё sosiale stand nie. Hy het die Woord gebring aan tollenaars, weduwees, wese, siekes, sondaars … aan onbelangrike mense wat geen regte gehad het of aansprake kon maak nie. Die mense wat Hy kies om saam met Hom die pad te loop, is nie helde nie. Hulle gebruik mense wat nie eens in tel by die wêreld is nie.

As jy gekies het om ‘n ware dissipel van hierdie “vreemde” Jesus te wees, moet jy ook bereid wees om ánders te wees as wat die sosiale norme vereis. Dan moet jy ook bereid wees om mense sonder aansien te gaan bedien, om die Woord te bring aan hulle wat jou nie gaan vereer nie en om mense te help wat niks het om vir jou terug te gee nie.

God se werklike helde is nie kieskeurig oor die plek en manier waar hulle moet bedien nie. Hulle sê eenvoudig: “Here, gebruik my waar U my nodig het.”

Vader, maak my hart gewillig om U onvoorwaardelik te volg.

Skrywer: Milanie Vosloo