Laat sy Liefde jou Lei: Liefde wat anders dink – Milanie Vosloo

Liefde wat ánders te dink

Daarop sê Hy vir hulle: “Kom! Word my dissipels en Ek sal julle vissers van mense maak.” Matteus 4:19

Wil jy graag soos Jesus wees? Het jy die begeerte om iets van sy liefde en goedheid uit te straal aan ander en sou jy ook, soos Hy, ‘n genade-mens wou wees? Dan, liewe leser, moet jy – soos Hy – bereid wees om ánders te dink, te doen en te leef. Want ons Meester was inderdaad ánders:

• Jesus het Hom nie gesteur aan menslike strukture en status nie. Hy het sy boodskap van liefde op gewone plekke aan eenvoudige mense gebring Hy het ‘n groot deel van sy Woordverkondiging in Galilea gedoen – ‘n dorp wat eintlik die godsdienstige “agterland” van Israel was. (Matt 4:12)
• Wanneer Jesus sy dissipels kies, gaan soek Hy hulle nie tussen die geleerdes nie. Hy roep onder andere vir Petrus, Andreas, Johannes en Jakobus – onbelangrike en ongeskoolde arbeiders – om saam met Hom die pad te loop. (Matt 4:18-20)
• Wanneer Jesus sy Bergrede rede, praat Hy nie van leiers, begaafde en intellektueles nie. Sy Bergrede gaan oor die treurendes, die afhanklikes, die wat sagmoedig is en hulle wat vervolg word. (Matteus 5-7)

Voordat ons soos Jesus kan wees, moet ons eers enige vooropgestelde idees oor wie en wat belangrik is, neerlê en in die plek daarvan bereid wees om op die onaansienlike stofpad te loop wat Hy ons wys. Wil jy dit doen?

Om U te volg is nie altyd maklik nie, maar Here, ek weet: dis altyd die moeite werd!

Skrywer: Milanie Vosloo

Laat sy Liefde jou Lei: Jesus sê: “Volg My” – Milanie Vosloo

Jesus sê: “Volg My”

Sommer net daar het hulle hul boot en hul pa gelos en Jesus se dissipels geword. Matteus 4:22

Jesus was ‘n interessante werkgewer. Hy het nie lang onderhoude gevoer en ‘n skriftelike werksaanbod aan sy dissipels gemaak nie. Hy’t nie eers gevra of hulle bereid sou wees om hul huidige beroepe op te offer en of hulle kans sien vir die uitdagingsvan hul nuwe poste nie. Hy het hulle ook nie gevra om in Hom te gló nie, maar gevra dat Hy gevólg sal word.

Duidelik wil God nie net hê dat ons in Hom moet glo en op ‘n gerieflikheidsafstand agter Hom moet aanloop nie. Ons Vader vra vir ons – sy moderne dissipels – om Hom skroomloos te vólg. Ons kan dus nie net ons geloof verklaar en dan in ‘n rusbank-Christen verval wat tevrede is om maar net te ontvang nie. Om ‘n Jesus-volger te wees beteken dat ons bereid sal wees om werklik te doen wat Hy van ons vra, te gaan waarheen Hy ons roep, die woorde te spreek wat Hy op ons harte lê en die dinge te doen wat sy Woord ons leer. Dissipelskap vra dat ons werklik ons geloof sal uitleef op elke plek waar ons kom. Dat ons diensbaar sal wees en ander met ons menswees, gawes en lewensmiddelle sal bedien … sonder om iets terug te verwag.

Vandag sê Jesus vir jou: “Volg My … onvoorwaardelik”. Wat antwoord jy Hom?

Ja, Here Jesus, ek wil U met my hele hart volg presies daar waar U my neem.

Skrywer: Milanie Vosloo

Laat sy Liefde jou Lei: Hy het jou lief – ook wanneer jy nie het nie! – Milanie Vosloo

Hy het lief – ook wanneer jý nie het nie!

Deur die krag van sy Goddelike heerlikheid sal Hy julle toerus met al die krag wat julle nodig het om in alle omstandighede geduldig te volhard. Kolossense 1:11

Daar’s tye wanneer ons sukkel om lief te hê. Dis die dae wanneer ons eintlik sommer net vir die wêreld en God wil gaan wegkruip. In sulke liefde-arm-tye is dit maklik om te wonder of ons Here ons nog lief het. Hoe op aarde kan Hy ons tog bly liefhê as ons nie eens lus is om tyd vir Hom te maak nie, wonder ons.

Een van die wonders van ons Vader, is dat sy liefde nie afhanklik is van die diepte van ons liefde vir Hom nie. Hy is nie wispelturig, uitsoekerig en veranderlik in sy liefde nie. Nog minder laat Hy Hom beïnvloed deur ons afsydigheid! Veel eerder vou sy genade met ekstra deernis om ons wanneer ons soms ons rug op Hom draai.

Weet vandag: Jesus se hart klop élke dag vuurwarm vir jou. Daar waar jy met jou gewone dagtaak aangaan en nie eens aan Hom dink nie, waak Hy onverpoos oor jou. Wanneer jy Hom ignoreer of vir Hom wegkruip, is Hy steeds by jou. Ja, in jou donker is sy liefde soos ‘n spreilig steeds bo-oor jou!

Jou Vader se liefde vir jou is soos sy hele wese: Onveranderlik en ewig. Hou in die dae, wanneer jy sukkel met die lewe, baie styf vas aan dié wete.

Dankie dat u liefde soveel groter is as my klein bietjie liefde, Here.

Skrywer: Milanie Vosloo

Laat sy Liefde jou Lei: Sê jou hart: “Welkom!” – Milanie Vosloo

Sê jou hart: “Welkom!”?

En nou is dit die geloof ennie hoop ennie liefde wat bly staat, ma nettie liefde sal saam met my narie Jirre se jimmel toe gaan. 1 Kor 13:13 Uit Griekwapsalms

Wat ‘n voorreg dat die Meester-van-die-Liefde eens op ‘n tyd hier tussen ons kom leef en vir ons geleer het hoe die taal van liefde klink; hoe die hart van ‘n ware verskilmaak-mens lyk. Natuurlik het sy liefde dié mense wat naby aan Hom geleef het, met groot koestering omhels. Maar sý liefde het ook “randmense” – immorele karakters wat deur die samelewing verwerp is – in sy binnekring getrek. By geharde sondaars – van wie ander niks gehou het nie – het Hy sonder skroom tuis gegaan en onbelangrikes, verstotenes en agtergeblewenis het Hy in sy troonsaal ingenooi. Jesus se liefde het vir almal – ja, ook vir die gewones, gebrokenes en gehate mense – gesê: By My kan jy veilig voel. Want Ek verstaan jou, vergewe en aanvaar jou. Ek het jou – ongeag dit wat jy is, doen of selfs nié is of doen nie – oneindig lief.

As ons grote God se hart met soveel ontvanklikheid na elke mens uitreik, wie is ons om ander dan die deur te wys?

Mag ek en jy met soveel begrip, deernis en omgee leef dat elke ander mens wat die drumpel van ons hart kruis, by ons iets van Jesus se tuisvoel-liefde sal ervaar. Mag ons héle lewe sê: Welkom in my hart!

Vader, vergewe my dat ek so selektief liefhet. Maak my hart asseblief ruimer vir élke ander mens.

Skrywer: Milanie Vosloo