Luk 9:44-62 (fokus 9:49-50)

Ons voel dikwels ongemaklik as mense die Here anders dien as ons. Wie is nou eintlik reg? Dit het die dissipels ook gepla (9:49-50). Omdat ons verhouding met die Here so persoonlik is en ons so naby Hom voel, is dit vir ons vreemd dat ander mense op ‘n ander manier naby Hom kan wees. Ons is geneig om dan dadelik op verdediging te gaan of hulle eenkant toe te skuif.

Natuurlik gaan dit nie in 9:49-50 oor mense wat teenoor Jesus kom staan nie, maar graag by Hom wil staan – wat saam met Hom die duiwel die stryd wil aansê. As hulle dit miskien nie so goed soos jy doen nie of anders doen, moet jy nie te vinnig kritiseer nie. Jesus mag op maniere of plekke werk wat ons nie verwag nie.

Mense moenie toegesluit of uitgesluit word as dit by Jesus kom nie; behalwe as hulle hulleself uitsluit deur teenoor Jesus te gaan staan. Jesus self sluit nie uit nie, maar nooi saam, die liefdevolle Johannes, die robuuste Petrus, die sorgsame Andreas. By die Here is daar plek vir baie… baie mense en baie verskeidenheid.

Luk 9:18-43 (fokus 9:23-27)

Dele in die Bybel soos 9:23-25 laat ons dink dat ons met ‘n twee-kleur-bril na die lewe moet kyk: die een kleur is ons dinge (dit is nou ons “aardse” bedrywighede soos ons ontspanning, werk, familie, ens.) en die ander kleur is die Here se dinge (dit is nou die “heilige” dinge soos bid, sendingwerk doen, kerk toe gaan, Bybel lees). Die bril laat my dan gedurig voel dat as ek met die “aardse dinge” besig is, ek die Here en sy “heilige dinge” in die steek laat. En die gevolg: ‘n kroniese skuldige gewete. Ek kan nie die hele tyd in die kerk sit en met die “Here se dinge” besig wees nie en as ek met die “aardse dinge” besig is, pla dit my dat ek nie genoeg vir die Here doen nie.

Dit is ‘n fout om so te dink. Wat ons in ons alleddaagse lewe doen en wat die Here gelukkig maak, staan nie noodwendig teenoor mekaar nie. Die Here wil net so graag as jy hê dit by die werk of in jou huwelik goed moet gaan. En Hy sit nie in die kerk of langs jou bed waar jy gewoonlik stiltetyd hou vir jou en wag nie. Nee, Hy is in jou huwelik en by die werk by jou. Daar wil Hy ook hê moet jy Hom dien. So oorvleuel sy wêreld en jou wêreld.

Ons moet besef, die Here het net soveel belang by wat sy kinders doen as hulleself. Hy wil graag hê dat ons lekker ontspan, gelukkig en suksesvol is by die werk, dat dit met ons gesinne goed gaan. As ek dus keuses vir hierdie dinge maak, is die Here ook bly daaroor. Ek kies nie teen Hom nie.

Waaroor 9:23-25 eintlik praat, is as ons keuses begin maak wat die Here nie saam met ons kan maak nie; as ons alleen in plekke begin ingaan omdat die Here nie saam wil kom nie, of dinge doen wat die Here nie van hou nie. Dis dan dat ons weer mooi sal moet dink oor wat ons moet kies…

Luk 8:49-9:17 (fokus 9:7-9)

Ons moet nie wag dat dinge met ons gebeur nie; ons moet dit laat gebeur. As jy op jou stoel sit en sê: “Niks gebeur met my nie”, is dit juis omdat jy op die stoel vasgeplak sit en nie is waar jy dinge kan laat gebeur nie. In ‘n groot mate is ons self verantwoordelik vir wat met ons gebeur. Jy kry wat jy verdien.

Die grote Herodus wou ook vir Jesus sien (9:9), maar het nie. Hy wou nie werk maak daarvan nie… en toe gebeur niks. En wat is die storie van sy lewe? “Ek wou Jesus sien, maar ek het nie”! Die “wou” het hom net mooi niks gehelp nie.

Die Here het vir ons die lewe gegee om te geniet. En hy het ook vir ons arms en bene en ‘n verstand gegee om dit mee te geniet. As jy dit nie gebruik nie, sal die goue geleenthede ook by jou verbygaan. Dan sal die storie van jou lewe ook ‘n “ek wou”-storie word.

Maak gebruik jou geleenthede; jaag jou drome na, al misluk dit – oppad sou jy in alle geval baie meer ontdek as wanneer jy net op jou stoel sou bly sit het. Moenie bang wees om regtig voluit te lewe nie, want dit is die een ding wat die Here net vir jou gegee het om iets mee te doen – jou lewe. Moenie dat dit ongemerk by jou verbygaan nie.

Staan op en laat dinge gebeur: verander jou “wou” in “het”. Jy verdien dit.

Luk 8:22-48 (fokus 8:26-39 )

Vir ons as gelowiges klink dit amper onmoontlik dat mense Jesus kan wegjaag. Tog, in 8:34-37 doen mense dit, nogal nadat Jesus daar tussen hulle ‘n groot wonder laat gebeur het. Hoekom doen hulle dit?

Die antwoord kan ‘n mens byna nie glo nie – hulle was kwaad omdat hulle ‘n paar varke verloor het, ongeag wat hulle gewen het. Ja, dit was óf die varke óf Jesus. En hulle kies die varke!?

Ons moenie te vinnig ons kop skud nie. Hulle het gedink hulle maak die regte besluit omdat hulle hulle blindgestaar het teen die varke. Die oë van hulle hart was toe, maar die oë van hulle beursies en besittings was wawyd oop. Toe hulle die keuse moes maak was die varke al wat hulle raakgesien het en oor bekommerd was.

So moet ek en jy ook elke dag keuses maak. Soms gebeur dit dat ons tussen Jesus en iets anders moet kies. Partymaal kies ons nes daai klomp mense met die varke – ons kan so bekommerd wees oor ons eie beursies, gewildheid of aspirasies dat ons Jesus “wegjaag”.

As ons verkeerde prioriteite in ons lewens begin kry kan ons soms belaglike dinge doen… kan ons ter wille van ‘n paar varke Jesus misloop.