Daar is baie gode (Politeïsme)

Politeïsme is ʼn woord wat van Grieks afgelei is (poli = baie en teïsme = god).

Dit beteken die geloof in baie verskillende gode. Daar is van die wêreldgodsdienste (bv. die Hindoe geloof) wat politeïsties is. In Jesus se tyd het die Grieke en Romeine ook aan so baie gode geglo. Daar was ʼn god vir omtrent elke ding wat gebeur en bestaan het, bv. vir oorlog, liefde, haat, reën, riviere, die see, en so kan ons aangaan. Jy hoef dus nie al die gode te aanbid of te vereer nie, maar alleen die wat direk te doen het met die dinge wat in jou lewe ʼn rol speel. As jy oorlog toe gegaan het, het jy die god van oorlog vereer; of as jy verlief was, was jy aan die voete van die god van liefde. Die gode was baie soos mense en het hulle soms baie slegter as mense gedra.

Boek: Geloof in Aksie-Bybel

Skrywers: Prof Jan van der Watt, Dr Stephan Joubert, Dr Johan Smith

Uitgewers: Christelike Uitgewers Maatskappy

Is alles God? (Panteïsme)

Daar is mense wat glo dat god alles is en dat alles god is.

Die hele skepping, plante, bome, diere, ja, alles is god. Amper soos ink water heeltemal kleur, is god alles. Sulke mense glo dan gewoonlik nie aan ʼn persoonlike god of ʼn god wat dinge geskep of gemaak het nie. As god alles is, kan hy tog nie alles gemaak het nie – hy kon homself tog nie gemaak het nie. Boonop kan jy hom nie van die aarde en aardse dinge losmaak nie. Hy is die aardse dinge. Daarom is elke mens ook ʼn stukkie god. As jy dan alles bymekaar gaan sit, kry jy god.

Die soort geloof trek ʼn streep deur feitlik alles wat die Bybel ons van God vertel. Hy is ʼn persoonlike God wat alles gemaak het. Hy is nie deel van die skepping nie (net soos klei nie deel van die pottebakker is nie), maar sorg en onderhou die skepping. Hy is nie deel van die skepping nie, maar hou dit in sy hand. En wat mense betref, staan Hy in ʼn besondere verhouding met hulle, sonder om die mense te “word”, soos die panteïste  sê.

Boek: Geloof in Aksie-Bybel

Skrywers: Proj Jan van der Watt, Dr Stephan Joubert, Dr Johan Smith

Uitgewers: Christelike Uitgewers Maatskappy