Die Apokriewe Boek (6)
Die Apokriewe Boek (6) – Jan van der Watt
Tobit
Die boek Tobit is ‘n Ou-Testamentiese apokrief wat ‘n pragtige verhaal vertel – oor hoe God sorg vir die mense wat hom dien. Selfs die probleme en teëspoed keer Hy uiteindelik om. In die uittreksel hieronder word vertel hoe Tobit se probleme begin het:
Op Pinksterfees (die heilige fees van die sewe weke) is ‘n heerlike ete vir my gekook en ek het gaan sit om te eet.
2 Toe ek sien hoe baie gekookte kos daar is, sê ek vir my seun: “Gaan haal soveel van ons arm mense wat die Here dien as wat jy kry. Ek sal wag tot jy terug is.” 3 Maar hy kom terug en sê: “Pa, een van ons mense is verwurg en is op die markplein neergegooi!”
4 Voor ek nog enigiets geëet het, het ek opgespring en sy lyk verskuif na ‘n buitekamertjie waar dit kon bly totdat die son onder was.
5 Terug by die huis, het ek gewas en my kos geëet terwyl ek baie hartseer was. 6 Toe het ek onthou wat die profeet Amos geskryf het: “Julle feeste sal in hartseer verander; al julle feesviering in ‘n gesnik”; en ek het gehuil.
7 Toe die son onder is, het ek ‘n graf gaan grawe en die lyk begrawe. 8 Maar my bure het vir my gelag en gesê: “Hy is nog steeds nie bang om doodgemaak te word hiervoor nie! Hy moes een keer vlug en nou begrawe hy al weer die dooies!”
9 Later daardie nag het ek teruggekom nadat ek die man begrawe het. Omdat ek onrein was, het ek teen die muur van die binnehof geslaap. My gesig was oop. 10 Ek het nie geweet daar is mossies op die muur nie en hulle warm mis het in my oop oë geval. Wit velle het oor my oë gevorm. Ek het na die dokters gegaan, maar hulle kon my nie help nie.
Die Wysheid van Jesus ben Sirag
Die Wysheid van Jesus ben Sirag is ‘n Ou-Testamentiese apokrief. Dit is ‘n voorbeeld van wysheidsliteratuur – baie dieselfde soos die boek Spreuke in die Ou Testament. Die volgende uittreksel kom uit die eerste hoofstuk. Daarin kan ‘n mens sien hoe baie ooreenstemming daar tussen hierdie apokrief en die boek Spreuke is:
1 Alle wysheid kom van die Here en dit bly vir altyd by Hom.
2 Wie kan die sand van die see en die reëndruppels tel? En wie kan uitwerk hoeveel dae die ewigheid het?
3 Wie kan meet hoe hoog die hemel is en hoe wyd die aarde is? Hoe diep die onderwêreld is? Wat wysheid werklik is?
4 Voordat enigiets anders bestaan het, het die Here wysheid gemaak. Ja, verstandige insig is van altyd af daar!
6 Het God al vir enigiemand gewys waar Wysheid vandaan kom? Verstaan iemand hoe subtiel sy kan wees?
8 Daar is net Een wat wys is; vir Hom wat op sy troon sit, moet ons groot respek hê.
9 Dit is Hy wat wysheid gemaak het; Hy het haar bekyk en haar gemeet. Hy het haar uitgegiet oor alles wat Hy gemaak het.
10 Vir alles wat leef, het Hy iets van haar gegee, en vir die mense wat Hy liefhet, het Hy baie van haar gegee!
11 Mense wat respek vir die Here het, kry eer en roem; hulle kry vreugde en ‘n krans van blydskap.
12 Mense wat respek vir die Here het, se harte word opgebeur; hulle kry blydskap en vreugde en ‘n lang lewe.
13 Mense wat respek vir die Here het, se laaste dae sal goed wees; Hy sal hulle seën op die dag wanneer hulle doodgaan.
14 Ja, respek vir die Here is die manier hoe ‘n mens Wysheid in die hande kry. Wanneer die Here die getroues in die skote van hulle moeders maak, maak Hy Wysheid deel van hulle!
15 Sy woon van altyd af by die mensdom en sal vir altyd getrou tussen hulle nageslag wees.
16 Mense wat respek vir die Here het, het haar heeltemal gekry; sy maak hulle dronk met haar vrugte!
17 Sy maak hulle huise heeltemal vol begeerlike goed; hulle skure maak sy vol met haar produkte.
18 Respek vir die Here is die kroon wat Wysheid gee; sy maak dat vreugde en goeie gesondheid hulle lewens oorneem.
19 Sy sorg dat insig en verstandige kennis soos reën op hulle val; sy gee baie eer aan hulle wat haar aanhang.
20 Wysheid is soos ‘n boom: respek vir die Here is haar wortel; haar takke is ‘n lang lewe.
Outeur: Prof Jan van der Watt