Die Here praat met ons deur boodskappers of profete (Profesie)

Die Here praat met ons deur boodskappers of profete (Profesie)

Profesie kan verskillende dinge beteken. Dit kan beteken dat God nou al met ons oor die toekoms praat.

Hy sê nou al dat daar eendag ʼn nuwe Jerusalem vir ons wag waar Hy vir altyd saam met ons gaan bly. Hy sê nou al dat sy kinders met die finale oordeel vrygespreek gaan word. Hy sê nou al dat Jesus weer gaan kom om ons te kom haal. Dit is alles beloftes of profesieë. Iewers in die toekoms gaan die profesieë waar word. Daar is sulke profesieë in die Ou Testament wat waar geword het, veral toe Jesus gekom het.

Maar profesie kan ook iets anders beteken. Dit kan soos ʼn gewone preek wees waar die Here vir ons ʼn boodskap gee wat by ons alledaagse praktiese situasies pas. Daar is gewoonlik ʼn voorwaarde by, byvoorbeeld, as jy dit of dat doen… dan sal dit of dat gebeur. As jy jou eerste liefde (die Here) verlaat, sal die Here jou dalk ook verlaat (Openbaring 2). Of as jy so halfhartige Christen is wat nie regtig die Here wil dien nie, moet jy nie verwag dat die Here maar net agter jou sal aanloop en soebat nie. Hy mag dalk sy rug op jou ook draai (Openbaring 3). Of dat as jy in Jesus glo, jy ʼn kind van God is. Dit klink amper soos hedendaagse preke en in die Bybelse tyd is sulke boodskappe ook “profesie” genoem.

Boek: Geloof in Aksie-Bybel

Skrywer: Prof Jan van der Watt, Dr Stephan Joubert, Dr Johan Smith

Uitgewer: Christelike Uitgewers Maatskappy