Is jou kerk ‘n erdepot of mikrogolf?

 “There is no worse screen to block out the Spirit than confidence in our own intelligence.” –Johannes Calvyn

Is jou kerk ‘n erdepot of mikrogolf?

Dr Tejado W. Hanchell is die Algemene Sekretaris en Internasionale Direkteur van Youth & Young Adult Ministry.  Hy het hierdie interessante artikel geskryf.

‘n Mikrogolf is goed vir baie dinge – veral gemak. Die mikrogolf het ook baie nadele. Hy glo ons moet probeer om ‘n “erdepot-kerk” in plaas van ‘n “mikrogolf-bediening” te wees. Hoekom?

• ‘n Mikrogolf  kook of skep niks nie – hulle maak net warm. ‘n Mikrogolf-bediening skep nie nuwe dissipels nie – dit warm net ou Christene wat ontevrede met hulle vorige gemeente of leraar is, op. Erdepotte, daarenteen, skep nuwe maaltye; erdepot-gemeentes probeer doelbewus die kerklos mense bereik en skep nuwe dissipels vir God se koninkryk.
• ‘n Mikrogolf word gou warm, maar behou nie sy hitte nie. Mikrogolf-bedienings brand warm en gou in die begin, maar is nie volhoubaar vir langtermyn groei nie. Erdepot-kerke behou sy hitte vir ‘n lang tyd. Hulle mag aanvanklik langer neem om warm te word, maar hulle word nie sommer skielik koud nie. ‘n Mikrogolf meet tyd in sekondes, ‘n erdepot in ure.
• ‘n Mikrogolf maak nie egalig warm nie. As jy iets in ‘n mikrogolf warm maak, kan een deel baie warm wees en die ander deel nog koud. Mikrogolf-bedienings is net so: uitstekende sang of prediking, maar koue dissipelskap- of gebedsbediening – warm bo en koud onder. In ‘n erdepotkerk word die hitte egalig versprei na alle aspekte van die gemeentelewe. Klem word gelê op daardie bedienings wat nie noodwendig altyd op die voorgrond is nie.
• ‘n Mikrogolf het monitering nodig. Jy moet die kos kontroleer om seker te maak dit is warm genoeg. Jy kan nie sommer die mikrogolf op tien minute stel en daarvan vergeet nie. In erdepot-kerke is daar sisteme in plek wat monitering onnodig maak. Alles in die kerk het nie die goedkeuring van die senior leraar nodig nie – mikrobestuur is onnodig. In so ‘n kerk is bekwame leiers in plek en daarom is voortdurende monitering onnodig.
• ‘n Mikrogolf is algemeen – jy kry dit in feitlik elke huis. Erdepotte sien jy selde. As jy een sien, trek dit jou aandag. As jy wil uitstaan sodat jou gemeente kan groei, moet jy ‘n erdepot wees. Moenie bang wees om anders te wees nie. Dit mag miskien langer neem om warm te word, maar die hitte word langer behou.

‘n Interessante vergelyking met baie waarheid in.