Laat sy Liefde jou Lei: Om iets hier te los

Laat sy Liefde jou Lei: Om iets hier te los – Milanie Vosloo

Om iets hier te los

Indien jy vandag te sterwe sou kom, wat sou jy nalaat? Vergeet vir ’n oomblik van die besittings wat jy in jou testament bemaak het. Watter hartsdinge los jy hier agter? Waarvoor sal ander jou as méns onthou? Sou hulle aan jou dink as iemand wat ’n verskil in hul lewens gemaak het? Iemand wat deur die uitleef van die liefde van God, hul lewens verander het?

Hoe sal jou man, kinders, familie, vriende en kollegas oor jou nalatenskap voel? Is dit wat jy in hul lewens agterlaat van so aard dat hulle dit op hul geheuerakke wil bêre sodat hulle gereeld daarheen terug kan gaan en onthou? Onthou hoe goed jy hulle laat vóél het? Hoe jy hulle menswees opgebeur en positief beinvloed het?

Hierdie tipe vrae laat ’n mens soms skuldig voel. Want nie een van ons is engeltjies nie. Ons is almal maar te geneig om in ons eie selfsug dinge te sê en te doen wat ander liewer wil vergeet. Ja, sonder die inwoning van die Gees van God is nie een van ons hoegenaamd in staat om verskilmaakliefde in die harte van ander te laat nie.

Kom ons kniel en vra die Vader om ons elke oggend óór te maak: Om ons hart en siel leeg van onsself te maak sodat ons propvol kan raak van sy liefde. Die soort liefde wat ons graag hier sal wil los. En wat ander sal wil onthou.

Bybelkennis gaan gereeld gedeeltes uit Milanie Vosloo se boek: Laat sy Liefde jou Lei, publiseer. Ons dank aan Milanie Vosloo en CUM vir hierdie vergunning.

Vir meer inligting oor CUM, besoek gerus hulle webblad by www.cumuitgewers.co.za

Skrywer: Milanie Vosloo