Laat sy Liefde jou Lei: Wanneer klein groot is

Laat sy Liefde jou Lei: Wanneer klein groot is – Milanie Vosloo

Wanneer klein gróót is

Ek het daarna nagedink oor alles wat ek bereik het, oor al die moeite wat ek gedoen het. Ek het besef hoe sinloos dit alles is. Prediker 1:11

Wanneer ons in ’n loopbaan staan en daaraan gewoond is om met groot transaksies te doen te kry, indrukwekkende projekte aan te pak en heeltyd tussen stimulerende en intelligente mense te werk, raak ons so half verslaaf aan sukses-behaling. Dan is dit asof ons nie sonder die energie en dryfkrag van die werksomgewing kan bestaan nie.

Wanneer ons dan om een of ander rede uit daardie loopbaangedrewe wêreld beweeg en dinamika van die arbeidswêreld ons nie meer omring nie, is dit maklik om betekenisloos te begin voel. Ewe skielik is daar mos nie meer strukture wat ons menswees (en eiewaarde!) in stand hou nie.

Sulke tye is dit noodsaaklik om te fokus op dié dinge waarvoor jy nie tyd gekry het toe jy jou loopbaan nagejaag het nie. Dinge wat dalk irrelevant lýk, maar wat tog so belangrik is. Dan is dit die tyd om te gaan stilstaan by die klein goedjies wat voorheen by jou verbygegaan het, om tyd te maak vir die mense wat jy voorheen afgeskeep het of om ‘n betekenisvolle verskil in ander se lewens te maak.

Soms is “onbelangrike dinge” juis die mees belangrike. Soms is klein goedjies eintlik die gróót goed. Want meestal is die sogenaamde onbelangrike die gróót dinge in God se oë.

Here Jesus, help my om verder as die nou te kyk sodat ek sal weet wat wérklik belangrik is.

Skrywer: Milanie Vosloo