Linkshandig!

Linkshandig! – Francois Malan

Pieter vra:

Graag die volgende vraag. Rigters 20v16. Is daar enige rede hoekom die mense links was? Was dit dalk met die ontwerp van die slingervel gewees?

Antwoord:

Prof Francois Malan antwoord:

Die Hebreeuse teks lees letterlik: ‘in daardie hele leër was daar 700 sterk jongmanne regs gestremd’

‘Regs gestremd’ is die manier om linkshandig in Hebreeus aan te dui. Vgl. ook vir Ehud, die rigter uit die stam Benjamin, wat ook links (letterlik: regs gestremd) was.

Die Israeliete het linkshandigheid beskou as ‘n nadeel, dat jy nie soos almal regs is nie. Maar soos in Ehud se geval was dit ‘n goeie kamoeflering, sodat die wagte om koning Eglon van Moab nie onraad gemerk het, toe hy met sy swaard aan die regterkant onder sy klere vasgemaak in die koning se teenwoordigheid toegelaat is nie (Rigters 3:15-21). In die geveg van die stam Benjamin teen die res van Israel kon die linkshandiges ook ‘n verrassingsaanval loods, omdat hulle vyand nie die klippe uit hulle slingervelle in die linkershand verwag nie.

Uit ‘n leër van 26,700 Benjaminiete, is 700 nie eers 3 uit elke honderd nie (2.6%). Die Griekse vertaling het ‘regs gestremd’ waarskynlik foutief vertaal met ‘dubbelhandig’ (vaardig met albei hande).

Skrywer: Prof Francois Malan