Mense wat nooit van God gehoor het nie… gaan hulle dan verlore?

Wat van mense wat nooit van Jesus gehoor het nie en dan doodgaan? Gaan hulle verlore?

Die antwoord moet ŉ mens van twee kante af gee:

Van die een kant af sê die Bybel moet Christene nie laat slap lê nie. Ons moet die goeie boodskap van die Here so ver as wat ons kan en selfs verder uitbasuin. Jesus is die enigste pad na God toe (Johannes 14:6). Dit is ons verantwoordelikheid om hierdie goeie nuus vir almal te vertel sodat niemand eendag ŉ verskoning mag hê dat hy of sy “nie geweet het nie”. Dit is ons roeping as Christene en ons mag nooit verslap nie.
Maar van die ander kant af weet ons daar is mense wat tog doodgaan sonder om ŉ kans te gekry het om in Jesus te glo. Wat van hulle? Wel, die Bybel draai nie doekies om as dit by God kom nie: Hy is regverdig en wat Hy ook besluit sal teenoor niemand onregverdig wees nie. Die Bybel sê egter nie vir ons reguit wat met die mense gaan gebeur nie. Daar is plekkies in die Bybel wat vir ons die studeerkamerdeur van Jesus so ŉ skrefie oopstoot sodat ons effens kan sien wat God beplan. In Johannes 8 staan daar dat as mense nie weet nie, kan hulle nie kwalik geneem word nie. Maar dan staan daar weer in Romeine 1 dat daar nie werklik iemand is wat kan beweer dat hy niks van God af weet nie. As jy maar net na die skepping rondom jou kyk, sal jy moet toegee dat daar ŉ God is. God mag dalk mense wat diep opreg uit hulle harte die goeie probeer doen het, ook genadig wees… wie weet? Behalwe God. En Hy is genadig, liefdevol en regverdig.

Ons hoef dus nie te veel te bespiegel nie… God sal doen wat reg is. Net so moet ons doen wat reg is. Ons moet vir ander by elke geleentheid van Jesus vertel.

Boek: Geloof in Aksie-Bybel
Skrywers: Prof Jan van der Watt, Dr Stephan Joubert, Dr Johan Smith
Uitgewers: Christelike Uitgewers Maatskappy