ŉ Plek van skande? (Kruis)

Die vreeslikste manier om destyds dood te gaan, was om gekruisig te word. Net party soorte misdadigers is so tereggestel, soos verraaiers, of staatsvyande.

Die proses was baie wreed Dit was nie om noodwendig die persoon te straf nie, maar om ander af te skrik om nie dieselfde te doen nie. Daarom is daar dikwels ŉ nota aan die kruis vasgesit om te verduidelik waarom die persoon daar hang. Daar kon jy gaan lees wat jy nie moes doen nie. Anders hang jy netnou dalk ook daar. In Jesus se geval het daar gestaan “Koning van die Jode”. Hulle het natuurlik ook die persoon so ver as moontlik probeer verneder en het daarom al sy klere uitgetrek en met hom gespot. Ons weet hoe het hulle met Jesus tekere gegaan.

Kruise kon verskillende vorms aanneem. Dit kon soos ŉ maalteken lyk, soos ŉ T, kon net ŉ regop paal wees of soos die kruis lyk wat ons ken. Die persone is met toue aan die kruis vasgebind of kon met spykers vasgeslaan gewees het. Die mense is dan gewoonlik van uitputting, versmoring of so iets dood. Dit kon tot dae geduur het voordat ŉ persoon uiteindelik dood is.

Jesus is ook gekruisig. Die merkwaardige is egter dat hierdie skandelike gebeure die hoofteken van die Christendom geword het. Ons dra selfs vandag kruisies om ons nekke. Die rede is omdat Jesus juis deur hierdie skande en lyding heen vir ons redding gebring het. Meer nog, Hy is so brutaal dood, maar het nie dood gebly nie. Hy het uit die dood opgestaan. Die kruis word dus vir gelowiges die teken van Jesus se oorwinning oor die sonde en die dood. Dit het ŉ teken van hoop en oorwinning geword in plaas van ŉ skande. Terloops, dit is ook een van die sekerste bewyse dat die Christendom nie ŉ godsdiens is wat sommer deur mense uitgedink is nie. Wie sou, as jy ŉ godsdiens wou begin, die skandelikste ding waaraan jy kon dink as basis vir die nuwe godsdiens gebruik het? Nee, juis omdat die kruisgebeure regtig gebeur het, het die Christene die skandelike gebeure as die kern van hulle godsdiens aanvaar.

Die kruisgebeure het ook die voorbeeld geword vir hoe Christene moes optree. Christus het die hele manier waarop ons mag verstaan op sy kop kom draai. Christelike oorwinning en mag lê in opoffering en nederigheid. Ons moet dus ook bereid wees om vir ander te help al kos dit ons wat en al beteken dit lyding. Christelike mag bestaan in nederigheid en opoffering.

Boek: Geloof in Aksie-Bybel
Skrywers: Prof Jan van der Watt, Dr Stephan Joubert, Dr Johan Smith
Uitgewers: Christelike Uitgewers Maatskappy