Slaap by die koning se vrou

Slaap by die koning se vrou – Marius Nel

Jan vra:

Toe koning Dawid oud en ver op sy dae was, kon hulle hom nie warm kry nie. Toe soek hulle ‘n jongmeisie om hom te verpleeg en wat daarop volg. Terwyl Dawid nog leef besluit sy seun Adonia hy sal koning wees maar sy poging word verydel omdat Salomo bestem was om Dawid op te volg. Adonia kom by Batseba en vra dat sy vir Salomo moet vra of hy nie die jongmeisie wat Dawid verpleeg het as vrou kan kry nie. Salomo se reaksie is dat Adonia net sowel kon gevra het om koning te wees. Dit kos Adonia sy lewe. Hoekom sou Salomo so onsteld oor Adonia se versoek gewees het, asb?

Antwoord

Prof Marius Nel antwoord

Die antwoord op jou vraag hou verband met 2 Samuel 16:21-22. Deur by die vrou te slaap wat by die koning geslaap het, het die antieke mens geglo, kom iets van die gesag en waardigheid van die koning na jou kant toe en bemagtig dit jou om in sy plek op te tree.

Alhoewel die teks beklemtoon dat Dawid nie met die jongmeisie gemeenskap gehad het nie, het die volk dit moontlik nie geweet nie (hoekom anders sal die skrywer dit beklemtoon?) en is dit ook nie so belangrik nie. Feit is: sy was die naaste aan die koning van almal.

Dawid se reaksie hou dan verband, nie met die feit dat sy seun by die meisie wil slaap nie, maar met die ambisie van die seun om sy pa se koningskap omver te werp.  Adonia se versoek is niks anders as ‘n poging om die troon te gryp nie. En daarom Dawid se besluit om Adonia se lewe te laat neem.

Skrywer:  Prof Marius Nel