Die Eerste Brief van Johannes (17) – Jan van der Watt

Deel 4: Al die verskil – in wat die gemeente doen

Hoofstuk 16: Christenskap ontplof in liefde

Wie is ’n ware Christen? Dit is iemand wie se Christenskap in liefde ontplof omdat God se liefde in sy hart ontplof het! Maar dit is nie die soort ontploffing wat stil word tussen stof en rook en dood nie…

Soos ’n persoon wat lank op ’n plek vertoef het vir oulaas weer by al die bekende plekke langs stap voordat hy vertrek, so gaan ons vir oulaas weer deur 1 Johannes “stap”.

Wat is ware Christenskap?

Johannes draai nie doekies om nie. Hy sê reguit waarom hy die brief geskryf het. Hy sit hierdie “doel” van die brief egter nie in die eerste hoofstuk van sy brief nie, maar aan die einde van sy brief. ’n Rede is omdat niemand nou sy doel kan misverstaan nie. Hy het immers in die res van die brief aan hulle verduidelik wat hy bedoel. So deur die loop van die brief moes hulle immers al agtergekom het wat hy presies vir hulle wou sê.

Waarom het hy die brief geskryf? (1 Joh. 5:13.)

Daar is twee dinge wat vir Johannes sentraal staan:

’n Christen moet seker wees van sy of haar belydenis van Wie Jesus is en wat Hy vir ons kom doen het.

’n Christen moet soos Jesus lewe, ewig lewe … en die lewe moet liefde van voor tot agter wees!

Hierdie twee sake hou direk met mekaar verband. Wie onthou dat Johannes sê die gemeente kan met ’n antieke gesin vergelyk word, verstaan ook makliker hoe hierdie dinge saamhang. Wie Jesus ken, weet dat Hy ons deur geboorte deel van God se gesin maak. Ons is dan kinders binne hierdie gesin.

Soos dit met ’n tipiese gesin van daardie tyd was, moes die kinders optree soos die Pa van hulle verwag. So kan almal hulle uitken as kinders van God.

Ware Christenskap is om deur God sy kind gemaak te word omdat jy in sy Seun glo en dan soos ’n kind van God in die wêreld te leef soos sy Seun jou geleer het om op te tree.

 

Die brief in ’n neutedop

Daar is in die loop van hierdie Bybelstudiegids aan verskillende belangrike onderwerpe aandag gegee. Die onderwerpe wat behandel is, is oor die hele brief van 1 Johannes heen versprei. As afsluiting sou dit goed wees om soos ’n arend oor die landskap van die brief te vlieg en te kyk hoe die brief opgebou is.

1 Joh. 1:1–4

Gee in jou eie woorde weer wat Johannes hier wou sê.

1 Joh. 1:5–2:11

’n Gelowige moet daarna strewe om reg te lewe.

(1) Watter verse in hierdie gedeelte verwys na die stelling hierbo en wat word verwag?

Hoewel ’n mens goed wil leef, is en bly sonde tog nog ’n realiteit. Daarvan moet ons ontslae raak!

(2) Watter verse ondersteun hierdie stelling, en hoe ondersteun dit die stelling?

Oor godsdiens moet ’n mens nie huigel nie. Jy is of ’n gelowige of nie! Iemand wat net voorgee om God te dien maar dit nie regtig doen nie, moet hom of haarself nie Christen noem nie!

(3) Watter verse vertel hiervan?

1 Joh. 2:12–17

Die gelowiges moet God liefhê en nie hulleself nie, want hulle behoort aan God!

(1) Watter verse verduidelik hoe hulle aan God behoort?

(2) Hoekom is wêreldliefde en selfliefde eintlik hier dieselfde?

1 Joh. 2:18–27

’n Gelowige moet God heelhartig deur sy Gees se krag dien.

Iemand wat egter nie vir Jesus as die Verlosser wil erken nie, word Jesus se vyand, die antichris, al sit hy of sy in die banke van die kerk!

(1) Watter verse bevestig die tweede stelling hierbo?

(2) Watter verse bevestig die eerste stelling hierbo, en hoe bevestig die verse dit?

1 Joh. 2:28–3:10

Deur Jesus is ons vir ewig kinders van God! Ons het geen begeerte om anders te leef of iets anders te wees nie! Ons wil God tevrede stel en glad nie sondig nie!

(1) Watter verse ondersteun die gedagte?

(2) Wat doen Jesus vir ons?

1 Joh. 3:11–18

Liefde beteken lojale selfopoffering vir jou naaste. Daarvan het Jesus ons self kom leer.

Watter verse vertel vir ons hoe die gelowige se gedrag moet lyk?

1 Joh. 3:19–24

’n Kind van God kan in ’n vrymoedige, oop verhouding met God leef.

Hoe word hierdie verhouding hier beskryf?

1 Joh. 4:1–6

Oppas vir mense wat verkeerde dinge oor Jesus sê, byvoorbeeld dat Hy nie mens geword het nie. Sulke mense is vals profete.

Wat sê Johannes van die verhouding tussen die vals profete en die gelowiges?

1 Joh. 4:7–21

God is liefde en daarom kan ’n gelowige nie anders as om ook lief te hê nie!

Waarom nie?

1 Joh. 5:1–5

’n Gelowige is ’n oorwinnaar deur geloof en liefde … omdat Jesus hulle oorwinnaars maak!

Wat word hier alles verder oor Christene gesê?

1 Joh. 5:6–13

Wie Jesus het, het die lewe. Daarvoor staan God self in!

1 Joh. 5:14–17

Bid en jy sal ontvang. Oppas vir die sonde wat jou van Jesus weghou!

Kan jy nog onthou wat Jesus oor gebed sê?

1 Joh. 5:18–21

Hoe wonderlik om die Jesus te ken—Hy wat ons teen die Bose en Satan bewaar!

Hoe sal jy die aanslae van die lewe die hoof kan bied?

Kyk weer

Kyk nou weer ’n keer na al hierdie wonderlike dinge wat Johannes vir ons in sy brief meedeel.

(1) Wat is die saak wat jou die meeste in hierdie brief getref het?

(2) As jy die kans het om twee verse aan iemand uit die brief voor te lees, watter twee sal dit wees?

 

Skrywer: Prof Jan van der Watt

Die Eerste Brief van Johannes (16) – Jan van der Watt

Deel 4: Al die verskil – in wat die gemeente doen

Hoofstuk 15: Liefde oorwin en bring die lewe

Wie die Seun van God het, het die lewe. Wie die Seun van God nie het nie, het nie die lewe nie. (1 Joh. 5:12). Elkeen van hierdie stellings veroorsaak rimpelings in die lewe. Hoe raak dit jou?

1. Die wêreld haat julle. En hoe reageer julle?

Ons het reeds uit ’n vorige hoofstuk agtergekom dat die wêreld die gesin van God haat. Hulle probeer alles om die gelowiges te probeer skade berokken.

(1) Lees weer 1 Joh. 3:13 en Joh 15:18–21. Waarom haat die wêreld die gelowiges? (Probeer in gesinsterme dink.)

(2) Die groot vraag is nou: Hoe moet die gesin van God optree teenoor die wêreld wat hulle haat? Motiveer jou antwoord en probeer gedeeltes uit die Bybel noem om jou standpunt te ondersteun.

Uit die gesinskonteks het ons gesien dat die persoon in die gesin wat bepaal hoe die res van die gesin moet optree, die pa is. Hy bepaal die karaktertrekke van die gesin. Die res van die gesin moet soos hy optree.

(3) Joh. 3:16 sê wat die Vader van die Goddelike gesin se houding teenoor die sondige wêreld is. Wat sê dit van die gelowige se houding teenoor die sondige wêreld?

(4) Wat moet die doel van die “liefde vir die wêreld” wees volgens Joh. 3:16?

God het die wêreld lief. Sy liefde het een doel, naamlik om aan die mense wat in hulle sonde dood is die ewige lewe te gee sodat hulle nie verlore gaan nie.

Dit moet ook die doel van die gelowige se liefde vir die wêreld wees. Op die haat van die wêreld antwoord die gelowige met liefde, liefde wat ’n uitnodiging rig tot redding!

’n Gelowige kan nie anders as om gedurig die vraag aan homself te stel nie: “Nooi my gedrag en optrede ander uit tot redding in Jesus?”

(5) Wat antwoord jy oor jouself?

2. Jesus bly die antwoord

In Hoofstuk 1 en 6 het ons gesien dat die Christendom ’n openbaringsgodsdiens is. Dit beteken dat mense nie alles uitdink nie, maar dat God aan mense kom vertel hoe Hy dinge wil hê en doen.

(1) Wat was God se hoofgetuienis op aarde volgens 1 Joh. 5:9–12?

(2) Hoe het God beplan om ’n verskil in hierdie wêreld te maak volgens hierdie gedeelte?

(3) As ons die wêreld regtig liefhet soos God die wêreld liefhet, wat moet ons volgens hierdie verse in die wêreld doen?

God het eintlik ’n slim plan gemaak. As die gelowige ’n ongelowige in liefde na Jesus lei, beteken dit dat hy of sy die ongelowige na die liefdesgemeenskap van God, na sy gesin, lei.

As daardie persoon deel word van hierdie gesin sal hy in alles wat hy doen in liefde deur die Vader en die kinders omvou word.

God is liefde en daarom is alles wat Hy doen van begin tot einde “liefde”.

Ons hoor baie dat gelowiges ander “na Jesus moet lei”. Tog is dit nie altyd so maklik nie omdat die meeste mense sê dat hulle wel al van Jesus gehoor het of aan ’n kerk behoort. Dit maak dit nogal moeilik om presies te weet waar jy “sendingwerk” moet doen.

(4) Dink ’n bietjie na oor jou eie omgewing (wat jou hele leefwêreld insluit). Is daar iemand aan wie jy kan dink vir wie jy tot die “Lewe” kan lei? Hoe kan jy dit doen?

3. Waarheen lei alles?

Niemand hoef die gelowige daaraan te herinner dat die wêreld gebroke is nie. Ook die gesin van God het sy gebreke. Daarom is sondebelydenis so belangrik.

Is daar vooruitsigte op iets beters as wat ons nou het?

Beter vooruitsigte?

(1) Lees 1 Joh. 3:2–3 en sê wat ons van die toekoms kan verwag. Wat sê dit vir jou van die hemel?

(2) Wat sê dit vir jou oor die rede waarom jou nou hier op aarde op ’n Christelike manier moet leef?

Wat van die dag van oordeel?

(1) As jy besef dat God as die GROOT REGTER beskryf word wanneer die Bybel oor die finale oordeel praat, maak dit jou nie ’n bietjie bang oor wat Hy van jou gaan sê as jy eendag voor Hom moet verskyn nie?

(2) Wat sê 1 Joh. 2:28–29 hieroor?

Wat gebeur by die dag van oordeel met die gelowige?

Jy wag… Jou naam word gelees en jy stap die troonsaal in. Op die troon sit die Regter. Langs Hom lê die boeke met die aanklagte teen jou. Jy weet wat dit kan beteken!

Jou oog val op die aanklaer! Dit is niemand anders as jou eie broer Jesus nie. Jy skep moed! Hy het jou mos lief. Meer nog, jy weet Hy sal alles doen om jou te help! Die prys wat Hy betaal het, sal Hy ook vir jou aan die Regter aanbied.

Jou oë draai na die troon. Daar sit niemand anders as jou eie Vader nie, die Een wat jou liefhet!

Nou wonder ek wat die kanse is dat jy skuldig bevind sal word?

Maar wat van die arme persoon wat nie die Vader of die Seun ken nie? Wat is sy kans?

Ons kan die finale oordeel sonder vrees tegemoet stap, omdat Jesus die pad voor en vir ons gestap het!

Maar ’n mens bly maar ’n mens! Kan ’n mens heeltemal seker wees? Meer nog, kan jy seker wees God sal jou beskerm en versorg soos Hy belowe het, veral as jy struikel en nie altyd die kind vir Hom is wat jy behoort te wees nie?

Wat sê 1 Joh. 3:20 oor ons gewete?

Hierdie vers wil vir ons sê dat as ons self begin wonder, moet ons weer dink wie ons God presies is. As ons gewete ons begin pla en ons onseker begin raak, moet ons maar weer ’n slag mooi na God kyk!

God sal sy kinders nooit vergeet nie. As jy ’n fout gemaak het, vergeet God nie dat jy sy kind is nie. Hy vergeet nie dat Jesus jou van jou sonde gereinig het nie. God is groter as ons gewete!

Daarom kan ons, soos 1 Joh. 3:21–22 sê, met vrymoedigheid na Hom gaan!

 

Skrywer: Prof Jan van der Watt

Die Eerste Brief van Johannes (15) – Jan van der Watt

Deel 4: Al die verskil – in wat die gemeentes doen

Hoofstuk 14: Vra en …?!.

1.  Bid en jy sal ontvang!

Die sprokie van die feë wat aan die arm man drie wense gegee het, het menige kind—en waarskynlik ook grootmense—se verbeelding al op hol gejaag. Dink aan die moontlikhede om te kan wens vir net wat jy wil hê en dit te kan kry! Ongelooflik!

(1) Lees 1 Joh. 3:22 en Joh. 14:13–14. Wat gebeur volgens hierdie verse as ons vra?

 

(2) As jy nóú kan kry wat jy vra, wat sal jy alles vra?

(3) Glo jy dat jy alles sal kry wat jy in gebed vra? Waarom sê jy so?

(4) Hoe weet ’n mens wanneer God gebede verhoor?

 

Gebed is ’n gesinsgesprek

Mense verstaan die beloftes wat God oor gebed maak dikwels verkeerd. Inderdaad sê Jesus dat Hy aan die gelowige sal gee wat hy vra, maar wat presies word daarmee bedoel?

Weer eens moet ons aan die gelowiges dink as die gesin van God. Hierdie gesin speel as groot span saam in die spel van die lewe. Hulle belange is verweef. Die indiwiduele gelowige is nie noodwendig oor homself bekommerd nie, maar oor die voordeel en die belang van die groep. As hy met die Pa van die gesin gaan praat, vra hy nie vir dinge wat homself maar nie die gesin kan bevoordeel nie. Wat vir hom belangrik is, is dat wat hy van die Pa vra, tot voordeel van die gesin moet wees.

Dit is eintlik baie logies as ’n mens besef dat Johannes nie wil hê gelowiges moet hulleself as indiwidue sien nie, maar as belangrike groeplede van die gesin van God (of van die liggaam van Jesus soos Paulus in 1 Kor. 12 sê). Kyk na die volgende voorbeeld:

Jy speel in die Springbokrugbyspan. Sal jy in die wedstryd vir die skeidsregter vra vir ’n roomys wat jy eers rustig langs die veld wil gaan klaar eet terwyl jou span op die veld swoeg? Nee, jy sal net die veld wil verlaat as jy seergekry het en nie jou beste kan lewer nie. Jy sal gou hulp gaan kry sodat jy so goed as moontlik ter wille van jou span verder sal kan speel. Wat jy dus vir die skeidsregter vra, is altyd tot voordeel van jou span. Anders is jy ’n swak, selfsugtige speler.

Presies dieselfde word met “vra en jy sal kry” bedoel. Jou gebede moet gerig wees op die voordeel van die gesin van God. As jy vir jouself bid, moet dit wees om jou so effektief as moontlik vir jou gesin te maak.

(1) Wie besluit uiteindelik wat effektief en goed vir die gesin van God is?

(2) Hoe pas die belofte van 1 Joh. 5:14–15 in by wat hierbo gesê is?

(3) Om dit nog duideliker te maak: Wat is die belangrike voorwaarde vir ’n gebed om verhoor te word? Waarom sê jy so?

Jou gebede moet die voordeel van die gesin as doel hê! Wie so bid, ontvang.

Daarom kan Johannes ook die woord “vrymoedigheid” in 1 Joh. 5:14 gebruik. Soos ’n kind wat die pa se gesin wil bevoordeel opgewonde na sy pa gaan, so moet en kan ons met vrymoedigheid na God gaan! God wil graag na ons luister.

 

So ’n gebed doen meer aan jou as aan God

Dit is interessant wat gebed “volgens die wil van God” aan jou as gelowige doen!

Dit is eintlik baie logies:

Jy word by ’n werk aangestel as iemand wat artikels moet aankoop. Maar jou aanstelling staan onder die streng voorwaarde dat jy alleen mag aankoop wat tot voordeel van die firma is—en nie noodwendig wat jy wil nie. Hoe sal dit die manier beïnvloed waarop jy die aankope doen? Verduidelik ook waarom dit jou aankope so beïnvloed.

“Gebed volgens die wil van God” beteken dat jy al meer en meer die wil van God vir jou eie lewe sal soek. In jou gebede sal jy besig wees om jou lewe meer en meer in ooreenstemming met die wil van God te bring.

Gebed sal jou dus nader en nader aan die wil van God bring. Dit sal jou meer in ooreenstemming bring met wat God vir jou en jou lewe beplan.

So is gebed nie eintlik ’n manier om God se “arm te draai” nie. Jy sal dit buitendien nie regkry nie. Volgens Johannes is gebed ’n belangrike manier om jou lewe meer en meer in die hand van God te plaas.

In jou gebed moet jy gedurig vra na jou plek en bydrae tot die gesin van God.

Eet jy “roomys langs die veld” of speel jy jou hart uit vir die “span van God”. As jy jouself met die “roomys in die hand” betrap, moet jy weer ’n keer nadink oor die rol wat God aan jou in sy gesin gegee het.

En die plek waar jy hierdie soort vrae uitsorteer, is natuurlik op jou knieë!

 

Kom bid

Gebed is nie eintlik iets om baie oor te praat nie, maar om te doen.

Uit wat tot nou toe gesê is, is dit duidelik dat daar ook baie “voorafdenke” in gebed gedoen moet word. Jy moet oor jou eie lewe nadink, oor jou rol in die gesin van God. Jy moet nadink hoe ’n goeie “spanlid” jy is en waarvoor jou Pa jou wil gebruik, en so kan jy aangegaan.

Gebruik nou die res van die tyd om presies dit te doen. (Gebruik tyd om met God te gesels. Moet dit nie te vinnig doen nie. Hoe rustiger, hoe beter).

(1) Hoe lyk jou gebedslewe? Voel jy dit is vir jou die moeite werd?

(2) Waaroor en waarvoor bid jy die meeste?

(3) Hoe sien jy jou rol in die gesin van God?

Gebruik nou tyd en bid

(1) Bid vir dit waarvoor jy dink God jou die graagste sal wil gebruik.

(2) Bid dat God jou meer en meer in pas met Hom sal bring.

(3) Sê vir God jy is syne.

 

Skrywer: Prof Jan van der Watt

Die Eerste Brief van Johannes (14) – Jan van der Watt

Deel 4: Al die verskil – in wat die gemeentes doen

Ons begin nou met die vierde en laaste deel van ons Bybelstudie oor 1 Johannes

Hoofstuk 13. Pasop vir die duiwel – hy is slinks

As Jesus sê ons is oorwinnaars, sê Hy eintlik ons is saam met Hóm; ons is niemand se slawe nie, veral nie die duiwel s’n nie. Om dus te leef asof jy nie werklik versoekings kan oorwin nie, is om ’n mosie van wantroue in Jesus se oorwinning te stel. Waarom voel ons dan nog soms moedeloos of magteloos oor sekere sonde in ons lewe?

Moenie die duiwel onderskat nie

Elke nou en dan word daar onder groot koerantopskrifte vertel van een of ander sel van duiwelaanbidders wat ontmasker is. Dan suis dit gewoonlik in al wat skool in die omgewing is en Bybelstudiegroepe bespreek dit met groot oë!

Wat mense nog meer kriewelrig maak, is as daar gesê word dat die Satansaanbidders “bid” vir die val van kerke of dat sekere jongmense die spoor byster moet raak.

Soms lyk dit of paniek en onsekerheid gelowiges beetpak as hulle sulke dinge hoor. Dit is al asof hulle bang is ’n sekere mag oorval hulle waaroor hulle nie beheer het nie.

(1) Dink jy die paniek onder gelowiges is nodig? Waarom sê jy so?

(2) Wat, dink jy, sê die “onsekerheid en kriewelrigheid” van hoe sulke Christene hulle geestelike verhouding met Jesus sien?

Ek wonder net waarom gelowiges nie altyd ’n gevoel van krag en oorwinning kry as ons sê dat daar kerke vol mense elke Sondag vir die ontvouing van die Christendom bid nie? Die derduisende gelowiges is tog baie meer as die paar Satansaanbidders. En hulle bid tot die almagtige God! Vir my lyk dit of die Satansaanbidders eerder moet begin bewe!

(3) Verduidelik waarom jy met die bewering direk hierbo saamstem of waarom jy nie daarmee saamstem nie.

Waar kom die sonde vandaan?

Die verhaal van die gevalle engel wat God se plek wou neem, kom nie uit die Bybel self nie, maar uit ’n buitebybelse bron. Ook Johannes sê nie presies waar die sonde vandaan kom nie. Tog laat hy ons nie heeltemal in die duister oor die sonde nie.

(1) Van wanneer af sondig die duiwel? (1 Joh. 3:8. Vergelyk dit met wat oor Jesus in 1 Joh. 2:13 en 14 gesê word.)

(2) In wie se mag is die ongelowiges, oftewel die wêreld? (1 Joh. 5:19.)

(3) Wat is die houding van die wêreld teenoor die gelowiges volgens 1 Joh. 3:13?

(4) Hoe pas die antwoorde wat uit die voorafgaande verse kom, volgens jou, by die gesinsbeeld in?

Johannes sê dat as ons deur ’n “geestelike” bril na die werklikheid kyk, sien ons twee “wêrelde”. Daar is die wêreld van lig en lewe, van God. En daar is die wêreld van die duisternis en dood, van Satan. (Vgl. 1 Joh. 1:5–6; 3:13–15.) Soos God ’n gesin het, het Satan ook ’n gesin. Satan se gesin was van hulle begin af gekenmerk deur sonde en haat (1 Joh. 3:13; 5:19. Vgl. ook Joh. 8:44).

’n Mens kan jou dit byna voorstel dat daar twee gesinne in ’n dorpie bly en dat die een gesin (Satan) die ander gesin so haat dat hulle alles in hulle vermoë doen om die ander gesin skade aan te doen. Hulle doen dit op allerhande agterbakse maniere, want hulle is immers baie bang vir die Pa van die ander gesin (God).

Sonde kom dus van Satan af. Hy het mense in sy mag gekry (1 Joh. 5:19) en hulle tree nou op soos hulle “heer”.

(5) Wat sê 1 Joh. 3:8 en 10, hoe kom ’n mens te wete aan watter gesin ’n persoon behoort?

Aan die lewenstyl van ’n persoon kan jy agterkom of hy of sy aan Satan of aan God se gesin behoort.

 

Tref voorsorg

Sê nou net jy sit by die werk. Iemand kom in en waarsku jou dat hy gehoor het dat ’n bende besluit het om jou op pad huis toe aan te val en te vermoor.

Wat sal jy doen?

Leef uit Christus se oorwinning

Satan het nie goeie voornemens met mense nie, dit vertel die Bybel vir ons oor en oor. Hy lê ons oral voor. Maar een ding waaraan die gelowige kan vashou, is die oorwinning van Jesus oor Satan. Kom ons kyk hoe praat Johannes oor hierdie oorwinning.

(1) Wat sê Johannes in 1 Joh. 3:8 in hierdie verband?

(2) Wie se oorwinning word dit ook? (1 Joh. 2:13–14.)

(3) Hoekom word dit ook ons oorwinning? (1 Joh. 4:4.)

Kol. 2:15 sê dat Jesus die Bose magte in sy triomftog meevoer.

Hierdie triomftog was destyds ’n tog waarin die oorwinnaar en sy mense met die verslane vyand kaal en aan kettings deur die skares van die oorwinnaar se tuisdorp gery het. Die skares kon daar sien hoe sterk die oorwinnaar is en hoe magteloos die vyand is.

Die duiwel en sy magte kan maar net in kettings in die Oorwinnaar, Jesus, se triomftog deur die wêreld aanstrompel!

Dit maak al die paniek en vrees wat soms vir die Satanisme losbreek so ’n bietjie belaglik, veral onder gelowiges!

 

Skrywer: Prof Jan van der Watt