Wat moet ek oor God se woord voel?

The best portion of a good man’s life is his little, nameless, unremembered acts of kindness and of love. -William Wordsworth, digter (1770-1850)

Wat moet ek oor God se woord voel?

Kevin deYoung (Taking God at His word, 2014) het ‘n boek oor God se woord vir die mense van vandag geskryf. Ons gaan ‘n hele aantal blogs aan hierdie boek spandeer.

 Weereens is daar drie gevoelens oor God se woord.

  • Ek moet my in sy woord verheug

Om volgens u verordening te lewe, gee my meer vreugde as al die rykdom van die wêreld (119:14). [Ons kry basies dieselfde in verse 24, 47, 70, 77, 143 en 174.] Die psalmis praat emosioneel oor God se woord. Hy sê die woord is soeter as heuning in sy mond (vers103); is wonderlik (vers 129) en dat hy God se verordeninge baie liefhet (vers 167).  Almal van ons word opgewonde as die woorde wat ons lees tot ons voordeel is. Die Bybel se woorde is vir ons tot voordeel.

Daar is egter ook ernstige waarskuwings. Dit gaan oor ons en diegene wat ons liefhet; dit bring ons van aangesig tot aangesig met Hom wat alle mag het. Die Bybel is die grootste storie wat nog ooit vertel is. Daarom sê die psalmis hy het God se woord lief: U woord is baie suiwer, ek het dit lief (119:140).

Die psalmis word ook kwaad as mense hulle nie in God se woord verheug nie: Ontsteltenis verteer my omdat my teëstanders u woord verontagsaam (119:139); Ek het die verraad van die ontroues gesien, en dit het my met walging vervul dat hulle u woord nie gehoorsaam nie (119:158). Hoe voel jy as iemand God se woord minag? Niemand wat hom waarlik in God se woord verheug, sal ongevoelig wees as dit verontagsaam word nie.

  • Die woord moet my begeerte wees.

Ek kwyn van verlange na u bepalings (119:20). Nie minder as veertien keer druk die psalmis die begeerte uit om God se woord te ken en te verstaan. Een voorbeeld is: Here, leer my hoe om u voorskrifte uit te voer, sodat ek my tot die einde daaraan kan hou (119:33). ‘n Begeerte is dit waaroor ons droom en dink en waarvoor ons bid. Sommige begeertes is goed; ander begeertes is sleg. Dit is vir my goed dat ek swaargekry het, want daardeur het ek u voorskrifte geleer (119:71)

  • Ek is van God se woord afhanklik

Ek hou vas aan u verordeninge, Here,moet tog nie dat my lewe ‘n teleurstelling word nie (119:31). Daar is baie dinge wat ons in die lewe wil hê, maar daar is min dinge wat ons werklik nodig het. Maar daar kom dae, sê die Here my God, dat Ek ‘n honger oor die aarde laat kom: ‘n honger nie na kos nie, ‘n dors nie na water nie, maar om die woord van die Here te hoor (Amos 8:11). Ons is almal afhanklik van God se selfopenbaring in sy woord. Alles wat die psalmis glo en voel oor God, moet ons ook glo en voel oor Jesus Christus.

Noudat ons gesien het hoe ons oor God se woord moet voel, kan ons volgende keer kyk na wat ons met sy woord moet doen.



Wat moet ek oor God se woord glo?

. —Thomas Brooks

Wat moet ek oor God se woord glo?

Kevin deYoung (Taking God at His word, 2014) het ‘n boek oor God se woord vir die mense van vandag geskryf. Ons gaan ‘n hele aantal blogs aan hierdie boek spandeer.

In Psalm 119 kry ons drie noodsaaklike kenmerke wat ons oor God se woord moet glo.

  • God se woord vertel die waarheid

Dan sal ek dié wat my vals beskuldig, kan antwoord, want ek vertrou op u woord (119:42).

U is altyd getrou en regverdig, u wet staan altyd vas (119:142)

Ons kan weet God se woord is waar en ons kan daarop vertrou. Dit is belangrik, want ons kan nie alles glo wat ons op die Internet lees, of in die klaskamer hoor of by politici hoor nie. Statistiek word gemanipuleer, foto’s word aangepas, maar God se woord kan nie aangepas of gemanipuleer word nie

. U woord, Here, staan altyd vas in die hemel (119:89); Ek het ondervind dat alle volmaaktheid perke het, net u gebod het geen begrensing nie (119:96); Op u woord kan ‘n mens hom geheel en al verlaat (119:160). Daar is geen perke op die volmaaktheid van God se woord nie. Luister net na Jesus se woorde: Laat hulle aan U toegewy wees deur die waarheid. U woord is die waarheid (Johannes 17:17).

  • God se woord eis wat reg is

Die psalm erken God se reg om voorskrifte uit te vaardig. Dit weet ook dat God se voorskrifte regverdig is: Ek weet, Here, dat u bepalings regverdig is. Dat U my laat swaarkry,  is ‘n teken van u trou (119:75).Dit is baie belangrik dat ons die goedheid en regverdigheid van God se gebooie insien. Ons moet liefhê wat Hy liefhet; ons moet ons verheug in alles wat Hy sê. God gee nie voorskrifte om ons aan bande te lê of om die vreugde uit ons lewens te neem nie. Sy voorskrifte is nie arbitrêr nie. Dit vereis nooit iets wat onwys of liefdeloos of onrein is nie.

  • God se woord voorsien wat goed is

God se woord is die pad na:

Geluk: Dit gaan goed met dié wat onberispelik lewe, dié wat wandel volgens die woord van die Here (119:1).

Wysheid: As ek al u gebooie in ag neem, sal ek nooit raad-op wees nie (119:6).

Veiligheid: Hoe kan ‘n jongmens sy lewe skoon hou? Deur hom te hou aan u woord (119:9).

Goeie raad: U verordeninge is my vreugde, hulle is my raadgewers (119:24)

Maar God se woord gee ook vir ons:

Krag: Ek kwyn weg van kommer, skenk my krag soos u in u woord beloof het (119:28).

Hoop: In u bepalings stel ek my vertroue (119:43).

Insig: Wanneer u woord vir mense oopgaan, bring dit lig; dit gee insig aan dié wat nog onervare is (119:130).

Die pad: U woord is die lamp wat my die weg wys, die lig op my pad (119:105).

God se woord is volmaak; ons kan dit vertrou. Dit vertel altyd die waarheid, dit eis wat reg is en voorsien wat goed is.

Volgende keer gaan ons kyk na wat ons oor God se woord moet voel.



God se woord vir vandag

Scripture itself is alone competent to judge our doctrine of  Scripture – J. I. Packer

God se woord vir vandag

Kevin deYoung (Taking God at His word, 2014) het ‘n boek oor God se woord vir die mense van vandag geskryf. Ons gaan ‘n hele aantal blogs aan hierdie boek spandeer.

Ek kom u verordeninge na, ek het hulle baie lief (Psalm 119:167).

Uit die 1 189 hoofstukke versprei oor 66 boeke geskryf oor 2 000 jaar is Psalm 119 die langste. In 176 verse kry ons een of ander verwysing na God se woord  – voorskrifte, bepalings, wette, verordeninge, ens. Hierdie woorde se betekenis verskil, maar almal sentreer op een groot idee: God se openbaring in woorde. Dit gaan hier oor die Bybel self

Daar kan drie reaksies op die lang, herhalende passie vir die woord van God in Psalm 119 wees:

 

  • Die sinikus of skeptikus sal sê dit is goed dat die antieke mense sulke respek vir God se woorde gehad het. Ons kan dit nie so ernstig opneem nie. Ons weet dat mense dikwels woorde in God se mond plaas vir hulle eie doel. Ons weet dat elke goddelike woord deur menslike denke, redigering en interpretasie gekontamineer is. Die Bybel is soms inspirerend, maar dit is oud en op plekke onverstaanbaar. Op sekere plekke is dit selfs verkeerd.
  • Ander sê: Ek het geen besondere probleme  om die Bybel te glo nie. Om die waarheid te sê, ek het agting vir die Bybel. In die praktyk is dit egter van geen toepassing nie. Al mag jy so dink, sal jy dit nie hardop sê nie. Psalm 119 is te lank; dit sê dieselfde ding oor en oor; dit kry net nie end nie. Psalm 23 is baie beter. Nie negatief nie, nie positief nie, net lou.
  • Maar daar is diegene wat uitskreeu dat elke vers van Psalm 119 waar is. Die psalmis vang jou passie vas. Jy hou van hierdie psalm.

Die doel van hierdie boek is om ons so ver te kry om hierdie laaste reaksie vas te vang. Dit moet ‘n uitdrukking wees van wat in ons verstand en harte is. Dit gaan daaroor om ons te oortuig dat die Bybel geen foute maak nie; dit kan verstaan word; dit is die belangrikste woord in ons lewens; dit is die relevantste iets wat ons elke dag kan lees.

Psalm 119 vertel vir ons wat ons van die woord van God kan glo; hoe ons oor die woord van God moet voel; wat ons met die woord van God moet doen. Die boek hanteer vier temas:

  • Die woord van God is voldoende.
  • Die woord van God is duidelik.
  • Die woord van God is finaal.
  • Die woord van God is noodsaaklik.

Vandag word die Bybel van alle kante bevraagteken. Hierdie boek help ons om weer die plek van die Bybel in ons lewens te verstaan.

Volgende keer gaan ons die vraag vra: Wat moet ek oor God se woord voel.



Wat is die groot probleem?

John Wesley sê: “God knows nothing of solitary religion.  No man ever went to heaven alone.” 

Wat is die groot probleem?

Die ware strydpunt tussen gelowiges in die nabye toekoms sal nie homoseksualiteit of kerkeenheid wees nie, maar die Bybel. Hoe sien ons God se Woord? Dit gaan nie net oor verskillende interpretasies of ons verstaan van die onfeilbaarheid van die Skrif nie. Dit gaan basies oor hoe ons die Woord van God benader – selfs voor ons by die interpretasie kom.

  • Konsensus is koning

Een benadering is om te sê dat gelowiges se verstaan van die Bybel deur die waardes van die kerk bepaal moet word. Die gesag is nie die Bybel nie, maar wat die kerk as geheel sê. Maar waar kom hierdie benadering vandaan? Dit word deur konsensus binne die kerk gevorm – wat dink die kerk kollektief. Wat dus geld, is wat die kerk dink belangrik is. Maar hoe weet ons wat belangrik is? Dit kom deur die leiding van die Gees. Klink mooi, maar hoe kan ons die Gees volg as ons die teks wat hy verlig, verontagsaam? Hoe kan ons die Gees hoor as die Woord stilgemaak word? Sommige gelowiges glo dit is reg, want ons verskil met sekere dinge in sy Woord!

 

  • Ons volg die verkeerde Gees

As dit wat belangrik is deur die kerk se gevoelens, los van God se Woord, bepaal word, is die enigste wettige motivering vir die konsensus druk uit die samelewing. Nou word God se Woord in hierdie konsensus ingedruk en daardie dele waarmee ons nie saamstem nie word net eenvoudig weggesny. En as ons standpunt moet inneem en daar is geen konsensus nie, is die enigste uitweg om aanspraak op neutraliteit te maak – ons wen tyd deur op die kantlyn te staan.

 

Hierdie is beslis nie die benadering waartoe Christus ons as sy dissipels oproep nie: Leer hulle om alles te onderhou wat Ek julle beveel het (Matteus 28:20). Die populêre konsensus speel hier geen rol nie. Ons kan nie kalm bly en hoop almal hou van ons nie.

 

  • Nederig in hoop

Daar is ‘n beter manier. Dit is nie nuut nie: Laat die Skrif self sê. Natuurlik moet die Bybel geïnterpreteer word – en dit is belangrik. Daar sal oor sekere dele verskille wees. Maar nederigheid beteken nie dat ons ons hande in die lig opgooi en sê elke ou se siening is wettig nie. Nederigheid beteken nie dat ons vir mekaar kyk en uitleg met menswaardigheid verwar nie.

 

Nederigheid gaan oor hoe ons die Bybel benader. Ons gaan na die Bybel in vertroue op God en nie op onsself nie – selfs voor ons nog die bladsye oopmaak. Ons kom met gretige ore en bid dat God ons gedagtes sal suiwer. Ons rede moet verdwyn en ons moet onsself aan die Heilige Gees onderwerp.

 

Die nederige hart maak plek vir God se woord al is dit ongewild en bid:

Maak my u wil bekend, Here, leer my u paaie.

Laat u waarheid my lei en onderrig my daarin,

 Want U is God, my redder.

In U stel ek elke dag my verwagting. (Psalm 25:4 – 5).