The whole Bible is about God’s mission, with Christ as the central character – Michael Horton

Bybelverse wat verkeerd gebruik word: Moenie ander oordeel nie

Eric J. Bargerhuff het ‘n baie interessante boek – The Most Misused Verses in the Bible – geskryf. In hierdie reeks gaan ek onder andere van hierdie boek gebruik maak.

Moenie oordeel nie, sodat oor julle nie geoordeel word nie (Matteus 7:1)

Hierdie is waarskynlik die vers in die Bybel wat die meeste verkeerd toegepas word. Mense gebruik dit soms as ‘n skild vir sonde – ‘n muur om ander weg te hou; ‘n verskoning om te leef net soos hulle wil sonder enige grense en aanspreeklikheid. Hulle argument: ons is almal sondaars; wie gee aan my die reg om ander te oordeel; dit is God se taak om mense te oordeel. Maar as ons na die konteks, en die res van die Bybel kyk, kan hierdie vers nie gebruik word om onbeperkte vryheid, outonomie en onafhanklikheid te verdedig nie. Dit was nie Jesus se bedoeling met hierdie vers nie. Jesus is hier besig om die valsheid van die Fariseërs te kritiseer. Hulle het gou die sondes van ander raakgesien, maar was onwillig om hulleself aanspreeklik te hou vir dieselfde standaard as wat hulle van ander mense verwag het.

Hierdie is deel van Jesus se bergrede – die plek waar Jesus leer wat dit beteken om as toegewyde volgeling van Hom getrou te lewe. Hy verkondig hier ‘n hoë morele standaard – die standaard wat van ‘n burger van die koninkryk van God verwag word. Diegene wat hulle bekeer en hulle geloof en vertroue in Jesus stel, word kinders van God en word aangeneem in sy familie.             Inwoners van God se koninkryk moet anders lewe. Jesus is hier besig om op ‘n praktiese wyse te beskryf wat dit beteken. In hierdie lig moet ons Matteus 7:1 – 5 lees.

Jesus het dikwels die Fariseërs gekritiseer vir hulle blatante valsheid en onmoontlike mensgemaakte standaarde. Hulle was berug daarvoor dat hulle die tekortkominge in ander gekritiseer het terwyl hulle presies dieselfde dinge gedoen het. Nou sê Jesus vir hulle: Met dieselfde oordeel waarmee julle ander oordeel, sal julle ook geoordeel word, en met dieselfde maat waarmee julle vir ander meet, sal vir julle gemeet word. Jesus gaan verder: die vals persoon se probleem is groter. Hulle sonde was nie net ‘n splinter nie, maar ‘n balk in hulle oog … en hulle weier om dit te verwyder.

Die oordeel van die persoon wat doelbewus nie sy eie sondes raaksien nie terwyl hy die sondes van ander uitwys, is groter. Jesus sê dat dit moet verander. Hy gee twee opdragte:

• Moenie ander op ‘n vals manier oordeel nie; en
• Verwyder die sonde uit jou eie lewe.

Jesus sê nie dat ons nie ‘n morele oordeel oor die gedrag van mense mag maak nie; Jesus veroordeel nie wedersydse aanspreeklikheid en morele verantwoordelikheid nie. Jesus hanteer hier valsheid. Dit maak geen sin om iemand te  nader oor ‘n spesifieke sonde as jy dieselfde sonde doen nie – veral as jy onwillig is om daarvan los te breek.

Die kerk het al baie skade gelei deur gelowiges wat een ding sê en ‘n ander ding doen. Ons moet Christus, wie ons verteenwoordig, se Naam beskerm deur lewens van integriteit te lewe. Almal van ons moet hartseer wees oor ons sondes; as ons dit raaksien, moet ons dit hanteer – dit bely en daarvan afstand doen. Dit is slegs as ons dit self doen wat ons in staat is om die sondes in die lewens van ons medegelowiges kan hanteer.

Die Bybel maak dit baie duidelik dat ons ons medegelowiges moet aanspoor om so te lewe dat dit God verheug:

• Ons lewens moet bewys lewer dat ons ons sondes bely het en Christus in geloof ontvang het.
• Ons moet mekaar in liefde reghelp, teregwys en bemoedig. Saam moet ons teen die sonde veg.
• Ons kan dit slegs regkry met die hulp van die inwonende Heilige Gees en die wedersydse bemoediging van ons medegelowiges. Ons kan dit nie alleen regkry nie.

My broers, as een van julle van die waarheid afdwaal en iemand sou hom terugbring, weet dan dat hy wat ‘n sondaar van sy dwaalweg terugbring, hom uit die dood red en maak dat ‘n menigte sondes vergewe word (Jakobus 5:19 – 20).

Broers, as iemand in die een of ander sonde val, moet julle wat julle deur die Gees laat lei, so iemand in ‘n gees van sagmoedigheid reghelp. En pas op: Jy kan self ook in versoeking kom. Dra mekaar se laste, en gee op dié manier uitvoering aan die wet van Christus (Galasiërs 6:1 – 2)

Jakobus en Paulus aanvaar twee dinge:

• Daar kom tye wanneer medegelowiges sal afdwaal.
• Ander Christene sal in liefde langs die broer/suster kom staan in ‘n poging om hom/haar terug te bring.

Jesus verbied nie alle oordeel nie – Hy verbied kras en vals oordeel wat ander veroordeel sonder om eers jou eie geestelike toestand te evalueer.

Die verkeerde gebruik van moenie oordeel nie, is deel van ons kultuur wat alle aanspreeklikheid en verantwoordelikheid vir persoonlike optrede vermy. Die kollektiewe onderrig van die Bybel sê dat diegene wat na die beeld van God gemaak is moreel verantwoordelik aan God en aan mekaar is. Ons kan nie hierdie vers gebruik om te sê ons het geen morele verantwoordelikheid teenoor mekaar nie – dan plaas ons hierdie vers teenoor die res van die Bybel. Ons leer dat die Bybel nie homself weerspreek nie. Daarom moet ons altyd ‘n vers vergelyk met die beginsels en onderrig wat ons in die res van die Bybel kry.

Volgende keer kyk ons na Jeremia 29:11 – 13.

The truth of the faith can be preserved only by doing a theology of Jesus Christ, and by redoing it over and over again – Karl Rahner

Bybelverse wat verkeerd gebruik word: Inleiding (2)

Eric J. Bargerhuff het ‘n baie interessante boek – The Most Misused Verses in the Bible – geskryf. In hierdie reeks gaan ek onder andere van hierdie boek gebruik maak.

Bybelverse word vandag steeds verkeerd aangehaal en gebruik. Wat glo ons? Ons glo dat kennis die grootste deug is en dat onbeperkte menslike vryheid noodsaaklik is. Dit alles kan ons na Genesis terugvoer. Ons weet wat daarna met Adam en Eva gebeur het – hulle oë gaan oop en hulle sien dat hulle kaal is. Hulle kruip vir God weg.

Dit is die hart van sonde: die mens is trots en wil sy eie god wees; ons wil ons eie bestemming bepaal; ons wil van alle beperkings ontslae raak. Die mens begin nou die betroubaarheid van God se woord betwyfel. En al wat nodig is, is om aan die Bybel ‘n nuwe konteks te gee – om sy betekenis so effens te verdraai.

Niks het nog verander nie. In Lukas 4 lees ons van die versoeking van Jesus. Hy staan aan die begin van sy bediening. Hy is pas deur Johannes die Doper gedoop en die Heilige Gees lei Hom die woestyn in waar Hy deur die duiwel versoek en getoets word. Dit alles is ter voorbereiding van Jesus se aardse bediening. Satan versoek Hom eers met kos – Hy het veertig dae lank niks geëet nie. Daarna versoek die duiwel Hom met mag – hy sal al die koninkryke van die wêreld aan Jesus oorgee. Daarna versoek die duiwel Jesus om van die hoogste punt van die tempel af te spring. Die interessante is dat die duiwel hier Psalm 91:11 vir sy eie doeleindes gebruik: Hy sal sy engele opdrag gee om jou te beskerm. Daarna haal hy ook vers 12 aan: Op hulle hande sal hulle jou dra sodat jy nie jou voet teen ‘n klip sal stamp nie. Satan ken die woord van God. Hy haal dit korrek aan. Hier het ons nie met ‘n verkeerde aanhaling te doen nie, maar die verkeerde gebruik van die Bybel. Psalm 91 is ‘n algemene belofte van God om vir sy mense te sorg, maar Satan gebruik dit om God se soewereiniteit te toets – totaal ontoepaslik. Jesus antwoord hom met ‘n aanhaling uit Deuteronomium 6:16: Daar is gesê: Jy mag die Here jou God nie op die proef stel nie.

In Efesiërs 6 versoek Paulus Christene om die volle wapenrusting wat God gee, aan te trek sodat hulle staande kan bly ondanks die listige aanslae van die duiwel. Hierdie wapenrusting sluit in die waarheid as gordel … die vryspraak deur God as borsharnas en die bereidheid om die evangelie van vrede te verkondig as skoene aan die voete … geloof as skild in die hand … verlossing as helm … die swaard van die Gees, dit is die woord van God. Almal behalwe die swaard is wapens om jou mee te verdedig.

Korrek gebruik is die woord van God die bron van die gelowige se mag en krag. Maar, verkeerde aanhaling en wangebruik van die Bybel was nog altyd een van Satan se sleutelstrategieë om die gesag van God in die wêreld te ondermyn. Dit is hoe Satan die mensdom op die vernietigingspad gelei het. As ons vandag die Bybel verkeerd gebruik of manipuleer, sit ons die leuens van Satan voort en lei mense op die dwaalspoor. Ons moet die Bybel in sy regte konteks en so akkuraat as moontlik lees en verkondig.

Met hierdie as agtergrond gaan ons nou na ‘n aantal teksverse kyk wat dikwels verkeerd gebruik word. Ons begin by die oordeel van ander.

Part of the difficulty is that Jesus was and is much, much more than people imagine. Not just people in general, but practicing Christians, the churches themselves – N. T. Wright

Bybelverse wat verkeerd gebruik word: Inleiding (1)

Eric J. Bargerhuff het ‘n baie interessante boek – The Most Misused Verses in the Bible – geskryf. In hierdie reeks gaan ek onder andere van hierdie boek gebruik maak.

Van die bekendste verse in die Bybel word dikwels verkeerd verstaan en/of verkeerd gebruik. Die Bybel is ‘n lewensveranderende boek –  dit vertel vir ons wie God is en hoe Hy besig is om in ons wêreld te werk; dit sê vir ons hoe hy in die verlede gewerk het en wat sy wil vir die toekoms is. Die Bybel is die werk van God en besit groot krag; dit is geskryf sodat ons kan glo en die verlossing en ewige lewe wat deur geloof in Jesus Christus kom, kan ondervind.

 

Volgens die Bybel self is die Bybel deur die Heilige Gees geïnspireer en het groot waarde om in die waarheid te onderrig, dwaling te bestry, verkeerdhede reg te stel en ‘n regte lewenswyse te kweek (2 Timoteus 3:16). Die Bybel is die stem en openbaring van God self. Maar as die Bybel verkeerd en ontoepaslik gebruik word, kan die Bybel ‘n baie gevaarlike boek wees. Hitler het die woorde van Jesus buite konteks geneem en vir propaganda doeleindes gebruik. So gebruik hy Jesus se veroordeling van die korrupte Joodse godsdiensleiers en sy reiniging van die tempel vir sy eie agenda – die uitwissing van die Jode. Hy eindig ‘n toespraak in 1922 in Munich met hierdie woorde: “Hoe geweldig was sy (Jesus se)  geveg nie vir die wêreld teen die Joodse gif nie.” Hitler gebruik woorde wat Jesus teen ‘n geselekteerde groepie mense gebruik het en maak dit op ‘n hele volk van toepassing – almal van hulle dra nou die etiket van gif.

Hierdie is ‘n uiterste voorbeeld. Maar ons kry ook Christene wat dit goed bedoel wat die Bybel verkeerd aanhaal en sy betekenis misverstaan. Dit lei tot verwarring en verkeerde besluite oor God se wil vir my lewe. Die toepassing van sekere verse kan verskil van geslag tot geslag, maar die oorspronklike skrywer se betekenis en bedoeling en die onderliggende beginsels daaruit afgelei, staan vas. Ons moet weet wat hierdie verse bedoel het toe hulle geskrywe is sodat ons hulle vandag korrek kan toepas.

Is dit nou ‘n nuwe ding wat by die kerk ingesluip het? Daar is niks nuuts in hierdie wêreld nie (Prediker 1:9). Reeds in Genesis 3 met die verskyning van die slang probeer Satan God se woord ondermyn. Hierdie strategie en taktiek wat hy gebruik het, gebruik hy steeds vandag. God sê self dat die skepping baie goed was (Genesis 1:31). Adam en Eva leef in volkome harmonie en gehoorsaamheid aan God. God gee spesifieke opdragte oor die boom in die middel van die tuin – die boom van die lewe. Van daardie boom mag Adam en Eva nie eet nie. En toe: Die slang was listiger as al die wilde diere wat deur die Here God gemaak is en het vir die vrou gevra: “Het God werklik gesê julle mag van geen boom in die tuin eet nie?” (Genesis 3:1). Let op Satan se tegniek. Hy begin deur twyfel te saai: Het God werklik gesê … Dan haal hy doelbewus vir God verkeerd aan: Geen boom in die tuin … God het hulle verbied om van ‘n sekere boom te eet, nie van alle bome nie. Die eerste vraag in die Bybel is ‘n verkeerde aanhaling van God se woorde.

Satan loods nou ‘n sterker aanval: Julle sal beslis nie sterf nie, maar God weet dat julle oë sal oopgaan die dag as julle van daardie boom eet en dan sal julle soos God wees deurdat julle alles kan ken (Genesis 3:4 – 5). Satan bevraagteken hier die wettigheid van morele beperkings en grense vir die gedrag van die mens. Satan probeer dus die vrou oortuig dat God se opdragte anders verstaan moet word as wat God oorspronklik bedoel het hulle verstaan moet word. Die Satan probeer God as selfsugtig, onseker uitbeeld – God is bang hulle sal Hom ignoreer tensy beperkings op die mens geplaas word.

Ons kry vandag steeds dieselfde probleme. Daarna gaan ons volgende keer kyk.