2 Kor 4:7-5:10 (fokus 4:7-15)

Het jy al jou skat ondek? Dit is nou die skat hier binne in jou? Paulus vergelyk gelowiges met kleipotte waarin ‘n skat weggesteek is. (Dit was mos hoe destyds se ABSA’s of Standardbanke gelyk het). Jou ou kleipot mag vol barste wees maar aan die skat binne in jou kan niemand vat nie. Om die waarheid te sê, die Here sê dit is net joune en verwag dat jy uit daardie skat moet leef.

So van ‘n skat gepraat. Daar was ‘n omie wat in absolute armoede op sy plaas gebly het en so dood is ook. Met sy boedel kom dit toe uit dat hy ‘n multi-miljoenêr was – hy het van jongs af aandele gekoop en niemand het dit geweet nie. Mense het net hulle koppe geskud: hoe kan hy die lewe so by hom laat verbygaan het?

Gelowiges maak dikwels dieselfde fout. Ons konsentreer so op ons ou kleipotte en al die gestamp en gestoot in die lewe (4:7) dat ons vergeet wat regtig belangrik is: die skat binne in ons. Dit is eintlik wat ons ryk en die lewe die moeite werd maak.

As jy mooi kyk sal jy sien dat die Here ‘n goeie dosis van die skat by jou afgelaai het. Hy het jou nie afgeskeep nie. Die krag wat Jesus uit die kloue van die dood uitgeruk het, is joune ook (4:15). Die goeie nuus van God wat jou in sy hand vashou, kan jy vir ander vertel, want dis waar. Daar wag ‘n splinternuwe lewe vir jou wat nooit sal ophou nie, en dit saam met God (5:1). Ja-nee, die toekoms roep en wat ‘n toekoms is dit net nie! En die beste van alles is dat die Here wil hê dat ons nou al uit die krag van daardie toekoms moet leef. Byna soos iemand wat vorentoe beur om iets te gryp, moet ons elke dag vorentoe beur na die wonderlike skat wat God in ons gegee het.

Moet dus nie jou lewe versuur met jou kleipot wat maar bietjie gestamp word nie. Tel liewer jou skatte! Dan sal jy die hele lewe sommer vir jou skitter.

2 Kor 3:12-4:6 (fokus 3:12-17)

 Daar was ‘n voëlverskrikker wat so lelik was dat die voëls die saad wat hulle twee dae gelede gesteel het, teruggebring het. Niemand kan die voëlverskrikker daarvan blameer dat hy nie sy werk effektief doen nie.

Paulus sê dat gelowiges so van heerlikheid moet straal dat dit vir ander moet voel asof hulle by Jesus self staan (3:17). Ja, so effektief moet ons Jesus dien dat mense na ons toe wil terugkom as hulle die heerlikheid van God soek. Om dit te kan doen het ons ‘n groot voorsprong bo die voëlverskrikker. Die voëlverskrikker is maar net voëlverskrikker, maar ons het die Gees van die Here self in ons. Dit is nie ons alleen wat van heerlikheid hoef te straal nie. Nee, die Gees van die Here moet deur ons straal.

Dit kan net gebeur as jy vry is, sê Paulus (3:17). Vryheid beteken dat niks ons bind of keer om regtig die Here te dien nie. Niks verdof die staal van heerlikheid nie. Dit beteken om vry te wees van alles wat in jou pad mag staan om jou aan Jesus te kan bind. Dit is al manier hoe jy Jesus effektief kan dien en om al hoe meer te kan lyk en te leef soos Hy. Om vry te wees beteken dus om beskikbaar te wees – vry van jouself beteken om beskikbaar te wees vir die Gees; vry van onnodige wette en reëls beteken om gereed te wees om na die Gees te luister.

‘n Voëlverskrikker kan sowaar nie groter invloed hê as Christene nie, veral nie as die Gees deur hulle straal nie.

2 Kor 2:14-3:11 (fokus 2:14-17)

 Parfuum kruip nie weg nie, want dit kan nie. As iemand in ‘n vertrek instap met goeie parfuum aan weet almal dit. Net so kan Christene ook nie wegkruip nie. Hulle is God se parfuum in die wêreld. Hulle is die aangename geur in die wêreld wat mense van God bewus maak, sê Paulus (2:15).

Daarom kan ons as Christene ook nie wegkruip nie. Of jy nou wil of nie, jy is gedurig in situasies waar ander uit wat jy doen jou “geestelike aroma” optel. Hulle kom iets agter as jy daar is en hou iets oor as jy weg is. Soos iemand vandag kan sê: “Sy het Chanel 5 aan of Este Lauder Youth Dew” kan en moet hulle van gelowiges sê: “Jy het die aroma van Jesus”.

Hoe sit ‘n mens die aroma aan? Deur in gehoorsaamheid so naby aan Jesus te bly dat sy aroma teen jou afvryf – jy moet so graag sy wil doen, by Hom wees in gebed, in sy voetstappe loop dat dit die kenmerk, die geur word wat ander opmerk as jy by hulle kom.

Natuurlik sal nie almal hou van die aroma nie en sal hulle hulle neuse daarvoor optrek (2:16). Dit sê baie van hulle – dit sê hulle hou nie van Jesus nie. Hulle wil nie nader aan hom kom sodat sy geur teen hulle kan afvryf nie. Maar hulle moet dan net ‘n bietjie aan hulleself ruik. Waar hulle gaan laat hulle die geur van die dood agter. En dit is alles behalwe lekker.

Hoe ruik jy?

2 Kor 1:23-2:13 (fokus 2:5-11)

 Een van die grootste manipulasieinsturmente van Christene is vergifnis: “Jy moet vergewe, want die Here het so gesê”. So speel ons op ander se gewetens om te kry wat ons wil hê. Een ding vergeet ons egter te dikwels en dit is wat vergifnis presies is. Dit is God se instrument om stukkende verhoudings heel te maak; om verhoudings reg te maak wat gebreek het. As daar verhoudings betrokke is, is daar altyd twee kante.

As verhoudings stukkend gegaan het, moet daar ‘n rede vir die onmin wees. Vergifnis kan egter nooit werk as ons nie van daardie rede ontslae raak nie. Daardie verhouding sal dan maar net weer en weer verkeerd loop, want die doring is nie uitgetrek nie. Vergifnis is soos die salf wat die wond gesond maak, maar voor die doring nie uit is nie, kan die wond nie gesond word nie, al smeer jy al die salf of wat jy het.

As iemand dus iets slegs teen iemand anders gedoen het, moet daardie persoon eers erken dat hy dit gedoen het en daarvan “ontslae” raak. Soos ‘n doring moet hy dit uittrek en weggooi. Dan eers kan hy verwag dat die ander persoon die salf van vergifnis moet opsit. Dan eers kan die verhouding behoorlik genees.

Vergifnis werk met verhoudings en verhoudings kom van twee kante. Voordat daar vergewe kan word, moet daar eers reggemaak word wat verkeerd is. As die persoon wat verkeerd gedoen het nie wil regmaak nie, moet hy ook nie verwag om vergewe te word nie. Maar as die ander persoon wil regmaak, mag jy nie weier om te vergewe nie. Dit verwag die Here van ons.

Vergifnismanipulasie werk nooit. Jy hoef dit nie eers te probeer nie.