11:28 Na haar belydenis (v27) gaan roep Marta haar suster Maria ‘in die geheim’ sodat die besoekers nie hoor nie en sy alleen met Jesus kan gaan praat, wat haar laat roep het. Marta verwys na Jesus as ‘die Leermeester (ho didaskalos)’ – Marta en Maria is ook leerlinge van ‘die Leermeester.’ ‘n Joodse rabbi het nie vroue leerders gehad nie; Jesus aanvaar mans en vroue as sy leerders.
11:17 Die inwoners van Betanië het Jesus skynbaar tegemoet gegaan en die nuus meegedeel oor Lasarus se dood vier dae tevore. Volgens gebruik is Lasarus op die dag van sy dood begrawe (in die Joodse gedagte het die gees van die mens nog vir drie dae naby die graf vertoef, en dan eers finaal verhuis). Vir almal is dit duidelik dat die ontbinding reeds begin het. Terwyl die opwekking van die dogtertjie van Jaïrus en die seun van die weduwee van Nain op die dag van hulle sterwe geskied het, is daar geen twyfel dat Lasarus finaal dood is nie.
Die skrywer bied die dood en opwekking van Lasarus aan as die laaste van die wondertekens van Jesus wat al die voorafgaande tekens en gesprekke tot ‘n klimaks bring en die dood en opstanding van Jesus, sy grootste wonderteken, verhaas en suggereer.
10:31-32 In 8:59 wou hulle Hom al stenig omdat Hy gesê het: voor Abraham gebore is, was Ek al wat Ek is. Nou dra hulle weer klippe aan (in die pilaargang is daar nie klippe nie), maar Jesus gee nie weer pad nie. Hy daag hulle met ironie uit: baie goeie/mooi/edele (kala) dade vanuit die Vader het Ek vir julle gewys – die dade is deur die Seun gedoen in opdrag van en met die gesag van die Vader, as getuienis daarvan dat Hy en die Vader een is – vir watter een wil julle my (die goeie kalos Herder) stenig?