Wat is ‘n dissipel?

Over-value not the manner of your own worship, and over-vilify not other men’s of a different mode. —Richard Baxter

Wat is ‘n dissipel?

Ek gaan heelwat blogs oor dissipelskap skryf. Ek gaan onder andere van Francis Chan se boek Multiply gebruik maak.

Jesus se dissipels was gewone mense – net soos ons. Hulle het werke, families en sosiale lewens gehad. Jesus stap na hulle en sê vir hulle: Volg My. Nie een van hulle het verwag dat oor die volgende drie jaar hulle lewens so drasties sou verander nie. Hulle het nie geweet waarvoor hulle hulle inlaat toe hulle op Jesus se oproep geantwoord het nie. Dit sou elke aspek van hulle lewens vorm. Wat begin het as ‘n eenvoudige gehoorsaamheid aan die oproep van Jesus eindig met lewens wat totaal verander is – en uiteindelik is die wêreld ook verander.

Die woord dissipel word vertaal met leerling, vakleerling of volgeling. In die tyd van Jesus Christus het die dissipels hulle rabbi (= leermeester) gevolg. Waar hy gegaan het, het hulle gevolg. Hulle leer van sy onderrig, maar ook deur te sien wat hy doen – hulle doen wat hy doen. Jesus Christus het sy dissipels geroep om Hom te volg. Hulle het nie geweet waarheen Jesus hulle gaan neem nie. Hulle weet wel wat dit beteken om te volg – hulle gaan oral waar Hy gaan en sien wat Hy alles doen. ‘n Leerling is nie hoër as sy leermeester nie, maar iemand wat volleerd is, sal aan sy leermeester gelyk wees (Lukas 6:40).

As Jesus Christus ons roep om sy dissipels te wees, moet ons Hom volg. Ons boots Hom na en volg sy bediening. In die proses word ons meer en meer soos Hy. Maar ons glo vandag dat ons ‘n Christen kan wees sonder om Jesus Christus te volg of soos Hy te wees. ‘n Volgeling wat nie volg nie, is tog ‘n onsinnige idee. Dit is glad nie wat dit beteken om ‘n Christen te wees nie.

Die konsep van ‘n dissipel wees, is maklik om te verstaan, maar nie so maklik om uit te leef nie. Hoekom nie? Want as ek sê dat ek ‘n dissipel van Jesus Christus is, beïnvloed dit my hele lewe.

Nou dat ons weet wat ‘n dissipel is, is die volgende vraag: Hoe word ek ‘n dissipel?

Die Dissipel vir wie Jesus baie lief was. Vraag

Die Dissipel vir wie Jesus baie lief was – Francois Malan

Japie vra:

Volgens Johannes 13:23 en 19:26 word gepraat van die dissipel wie Jesus baie lief gehad het. Wie was dit? Baie dankie.

Antwoord

Prof. Francois Malan antwoord:

Die skrywer praat in die laaste deel van die Evangelie van ‘die dissipel vir wie Jesus liefgehad het: in 13:23-26 lê hy op die bors van Jesus, in 19:25-27 gee Jesus sy moeder oor in die sorg van die dissipel, in 20:1-10 hardloop hy en Petrus graf toe, in 21:1-14 is dit hy wat die opgestane Jesus aan die strand herken, in 21:20-24 sê die skrywers van die Evangelie dat hulle sy getuienis oor Jesus gehoor het en dat hy van die dinge opgeteken het wat hulle in die Evangelie geskryf het.

Hy is moontlik ook ‘die ander dissipel’ vir wie die hoëpriester geken het, en wat vir Petrus toegang tot die binnehof verkry het (18:15-16). Dit is onwaarskynlik dat die ongeleerde Johannes uit Galilea (vgl. Hand 4:13) bekend was by die hoëpriester in Jerusalem.

Daar is ook ‘n moontlikheid dat dit die geliefde dissipel was wat saam met Andreas vir Jesus opgesoek het nadat Johannes die Doper vir Jesus as die Lam van God aangewys het (Jn 1:35-40), omdat die skrywer hom nie identifiseer nie.

Die naam van Johannes (die seun van Sebedeus en dissipel van Jesus, volgens die ander Evangelies) word nie in hierdie Evangelie genoem nie, behalwe die verwysing in 21:2 na die seuns van Sebedeus wat ná Jesus se opstanding saam met Petrus en ander gaan visvang het, waar die lieflingsdissipel in 21:7 ook genoem word.

In die Evangelie word nie gesê dat Johannes dit geskryf het nie. Die slot van die Evangelie veronderstel dat volgelinge van die ‘geliefde dissipel’ sy herinneringe en die betekenis daarvan opgeteken het in die Evangelie. Of die ‘geliefde dissipel’ die dissipel Johannes was, word betwyfel, maar is ‘n moontlikheid, wat in die vroeë kerk aanvaar is..

Ons is vandag nie meer seker wie hierdie Evangelie geskryf het, waar dit geskryf is of wanneer nie. Die opskrifte van die vier Evangelies wat hulle aan bepaalde persone verbind, is later bygevoeg.

Skrywer: Prof Francois Malan

Wat is die definisie van ‘n dissipel?

The Church exists to glorify God, to edify believers and to extend the gospel throughout all the nations and the languages of the world — Thomas Murphy, Pastoral Theology

Wat is die definisie van ‘n dissipel?

Daar word baie oor dissipels en dissipelskap geskryf, maar as jy teoloë vra wat ‘n dissipel is, kry jy geen eenstemmigheid nie. Jesus het vir ons ‘n beskrywing gegee van wat ‘n dissipel moet wees. Op ‘n paar plekke sê Hy: As jy my dissipel wil wees, moet jy … Kom ons kyk na ‘n paar voorbeelde:

Jy moet die Here bo alles liefhê

As iemand na My toe kom, kan hy nie my dissipel wees nie, tensy hy afstand doen van sy eie vader en moeder en vrou en kinders en broers en susters, ja, selfs van sy eie lewe (Lukas 14:25 – 26).

Leef in die lig van God se woord

As julle aan my woorde getrou bly, is julle waarlik my dissipels; en julle sal die waarheid ken, en die waarheid sal julle vry maak (Johannes 8:31 – 32).

Neem jou kruis op

As iemand agter My aan wil kom, moet hy homself verloën, elke dag sy kruis opneem en My volg (Lukas 9:23).

Jesus herhaal hierdie stelling by ‘n paar geleenthede. Let op die vooruitgang van die drie elemente: verloën … kruis opneem … volg.

Aanvaar die wil van die Vader

Die frase om jou kruis op te neem (Lukas 9:23) beteken dat ons die Vader se wil aanvaar – sonder voorwaardes. Dissipels aanvaar die wil van die Vader net soos Jesus dit gedoen het.

Gehoorsaam Jesus

Om Jesus te volg (Lukas 9:23), beteken dat ons op sy pad loop. Dit beteken ons is gehoorsaam aan die Een wat ons volg. Ons moet Hom gehoorsaam al is dit ongemaklik en kos dit ons iets.

Jy moet jou medegelowiges liefhê soos Jesus hulle liefhet.

Ek gee aan julle ‘n nuwe gebod: julle moet mekaar liefhê. Soos Ek julle liefhet, moet julle mekaar ook liefhê. As julle mekaar liefhet, sal die wêreld almal weet dat julle dissipels van My is (Johannes 13:34 – 35).

Liefde vir hulle medegelowiges is ‘n kenmerk van dissipels.

Sluit aan by Jesus se sending

My Vader word juis daardeur verheerlik dat julle baie vrugte dra, en my dissipels is … Julle het My nie uitgekies nie, maar Ek het julle uitgekies en julle aangestel om uit te gaan en vrugte te dra, vrugte wat sal hou. So sal die Vader aan julle gee wat julle ook al in my Naam vra (Johannes 15:8 en16).

Een van die kenmerke van dissipels is dat hulle by Hom in sy sending om die wêreld te verlos deur dissipels te maak, aansluit.

Leraars kan oor hierdie teksverse preek, maar dit sal geen verskil maak nie. Kerkleiers moet in die gemeente ‘n omgewing skep – akkurate inligting plus ondervindings – sodat mense die geleenthede het om dissipels te word.

Dissipelskap: Wat is ‘n dissipel?

The less we read the Word of God, the less we desire to read it, and the less we pray, the less we desire to pray. –George Mueller

Dissipelskap: Wat is ‘n dissipel?

Daar word baie geskryf oor dissipelskap. So byvoorbeeld het twee boeke onlangs verskyn: Follow Me van David Platt en Multiply van Francis Chan. Ook op heelwat blogs word daar geskryf oor hierdie onderwerp. Ek het besluit om ‘n reeks oor dissipelskap te skryf waarin ek gebruik maak van hierdie boeke en verskeie blogs. Die sentrale tema van al hierdie geskryf, is dat ons dissipels is en dat ons dissipels moet maak.

Kom ons begin deur na twee basiese vrae te kyk:

Wat is ‘n dissipel?
Hoe word ek ‘n dissipel van Jesus Christus?

Wat is ‘n dissipel?

Die woord dissipel word vertaal met leerling, vakleerling of volgeling. In die tyd van Jesus Christus het die dissipels hulle rabbi (= leermeester) gevolg. Waar hy gegaan het, het hulle gevolg. Hulle leer van sy onderrig, maar ook deur te kyk wat hy doen – hulle doen wat hy doen. Jesus Christus het sy dissipels geroep om Hom te volg. Hulle het nie geweet waarheen Jesus hulle gaan neem nie. Hulle weet wel wat dit beteken om te volg – hulle gaan oral waar Hy gaan en sien alles wat Hy doen.

Die konsep van ‘n dissipel wees, is maklik om te verstaan, maar nie so maklik om uit te leef nie. Hoekom nie? Want, as ek sê dat ek ‘n dissipel van Jesus Christus is, beïnvloed dit my hele lewe.

Hoe word ek ‘n dissipel van Jesus Christus?

Kom hier! Kom saam met My, en Ek sal julle vissers van mense maak (Matteus 4:19.

Dit was Jesus se woorde aan die eerste vier dissipels wat Hy geroep het om Hom te volg. Net voor dit sê Hy: Bekeer julle, want die koninkryk van die hemel het naby gekom (4:17). As iemand vir jou sê dat die koning op pad is, wat doen jy? Jy maak seker dat jy gereed is om hom te ontvang.

Bekering beteken omdraai; van rigting verander; loop in die teenoorgestelde rigting. Dit vereis optrede. Jesus Christus sê vir die mense dat hulle hulle moet voorberei, want die Koning is op pad. Hoe berei ons voor vir hierdie Goddelike koninkryk?

Besef dat jy op die verkeerde pad is: Almal het gesondig, en het nie deel aan die heerlikheid van God nie (Romeine 3:23).
Maar God in Jesus Christus het alles verander: Maar God bewys sy liefde vir ons juis hierin dat Christus vir ons gesterf het toe ons nog sondaars was (Romeine 5:8).

Alles gaan oor Jesus Christus: wie Hy was en wat Hy gedoen het. ‘n Belangrike aspek van bekering is dat ons ophou glo dat daar iets is wat ons kan doen om onsself te red. Iemand anders het reeds vir ons sonde betaal. Dit is vir ons iets vreemd, want dit is nie hoe ons moderne mense oor die lewe dink nie – elkeen vir homself is ons benadering. Dat ons op Iemand anders se offer vir ons moet vertrou, is nog vreemder vir ons. Maar hierdie optrede van God is reeds in die Ou Testament duidelik. Dink maar net hoe Hy sy volk uit Egipte gelei het.

Een aspek van dissipelskap wat ons dikwels ignoreer, is die koste – om ‘n dissipel van Jesus Christus te wees, kos iets. Daarna kyk ons volgende keer.