Christene moet groei – Gebed

Let us believe that when the need comes the help will come also. Let us not carry our crosses before they are laid upon us –  J. C. Ryle

Christene moet groei – Gebed

R. C. Sproul het ‘n kort boekie – Five Things every Christian needs to grow – geskryf. Hierin identifiseer hy vyf dinge waarin ‘n Christen moet groei. Ons gaan ‘n paar blogs hieraan spandeer.

Hoekom moet ons bid? Daar is baie antwoorde op hierdie vraag – ons gaan op drie fokus:

  • Gebed as plig

Die Bybel maak dit baie duidelik dat God se mense opgeroep word om te bid. In die Ou Testament kry ons baie voorbeelde van mense wat gebid het. Dink maar net aan Hanna wat God gesmeek het vir ‘n seuntjie – tot so ‘n mate dat Eli gedink het dat sy dronk was (1 Samuel 1:8 – 18). Dink aan die gebed van Maria  – die Magnificat (Lukas 1:46 – 55). Die Psalms is grotendeels ‘n versameling van gebede. Jesus self het gereeld gebid. Gebed is ‘n plig.

 

  • Gebed is ‘n voorreg

Die kern van gemeenskap met God is gebed. God het Hom in Jesus Christus aan ons gegee. Die basis waarop ons verhouding met God gebou is, is genade – iets wat ons nie kan verdien of koop nie. Ons gemeenskap met Christus vind plaas deur gebed. Net soos ‘n verhouding tussen twee mense nie sonder kommunikasie kan werk nie, kan ons verhouding met God nie sonder kommunikasie (gebed) werk nie. Gebed is ‘n liefdesgemeenskap tussen God en die gelowige.

  • Gebed as metode waardeur God sy wil laat geskied

Gebed verander ons en gebed verander dinge. Die gebed van die gelowige het ‘n kragtige uitwerking (Jakobus 5:17).  Gebed is ‘n manier wat God gebruik  om sy doel te bereik.

Hoe moet ons bid? Meeste Christene sal erken dat hulle gebedslewe nie is wat dit behoort te wees nie. Een van die redes hiervoor is dat mense nie weet hoe om te bid nie. Selfs die dissipels het vir Jesus gevra om hulle te leer bied. Hy antwoord hulle – en vir ons – deur aan hulle die Ons Vader gebed te gee. Hierdie gebed moet vir ons as ‘n model dien.

Jesus begin deur vir God Vader te noem en Hy nooi sy dissipels uit om dieselfde te doen. Ons moet ons gebede begin deur in eerbied voor God te buig en Hom as ons liefdevolle Vader te erken. Ons moenie net vir ons eie omstandighede bid nie, maar ook vir God se werk in die res van die wêreld. Luther se A Simple Way to Pray bevat praktiese voorstelle oor hoe om te bid.

  • Ruim elke dag tyd vir gebed in – moenie dat werksdruk die tyd oorneem nie.
  • Gaan na ‘n stil plek waar dit makliker is om te konsentreer.
  • Bid hardop. In die tuin van Getsemane het Jesus hardop gebid al was Hy alleen.
  • Bid deur drie dinge: die Ons Vader gebed, die tien gebooie en die Apostoliese Geloofsbelydenis. Fokus jou aandag op elke afdeling
  • Amen beteken: Dit is waar. Ek wy my hieraan toe. Ek glo wat ek pas vir U gesê het Here.

In ons besige lewe maak ons nog tyd om te bid?

Volgende keer gaan ons na die volgende dissipline – aanbidding – kyk.



Die plek van gebed in die lewe van ‘n Christen.

 “Exaggeration” is actually a proud, unbroken word for “lying.” —Nancy Leigh DeMoss

Die plek van gebed in die lewe van ‘n Christen.

R.C. Sproul het ‘n interessante blog hieroor geskryf. Wat is die doel van die Christelike lewe? Goddelikheid gebore uit gehoorsaamheid aan Christus. Gebed ondersteun gehoorsaamheid, want dit skep die regte raamwerk vir ‘n begeerte na gehoorsaamheid.  Natuurlik is kennis ook belangrik, want daarsonder sal ons nie weet wat God verwag nie. Kennis en die waarheid bly abstrakte begrippe tensy ons met God in gebed verbind. Die Heilige Gees leer, bemoedig en verlig God se Woord vir ons. Die Heilige Gees help ons om in gebed met die Vader te verkeer.

 

Gebed beklee ‘n lewensbelangrike plek in die lewe van ‘n Christen. ‘n Mens mag bid en nie ‘n Christen wees nie, maar jy kan nie ‘n Christen wees en nie bid nie. Gebed vir die Christen is soos asemhaal vir die lewe. Tog verwaarloos ons dikwels gebed.

Gebed is die geheim van heiligheid. Ons word uitgenooi – selfs gebied – om te bid. Gebed is beide ‘n voorreg en plig. Gebed, soos enige  ander manier om geestelik te groei, vereis werk. In ‘n sekere sin is gebed onnatuurlik vir ons. Daarom is ons dikwels lui en onverskillig as dit by gebed kom.

Gelukkig ken God ons harte en hoor selfs daardie versoeke van ons wat ons nie uitspreek nie. As ons nie ons diepste gevoelens en emosies in woorde kan uitdruk nie, as ons nie weet wat om te bid nie, tree die Heilige Gees vir ons in. Romeine 8:26 – 27.    Gebed is die geheim van heiligheid. As ons die lewens van groot gelowiges ondersoek, is dit duidelik dat gebed ‘n belangrike rol in hulle lewens gespeel het. John Wesley het gesê dat hy nie veel van ‘n leraar dink wat minder as vier uur per dag bid nie. Martin Luther het gesê dat hy ten minste ‘n uur elke dag bid, tensy hy ‘n moeilike dag verwag – dan bid hy vir twee uur.

Verwaarlosing van gebed is ‘n baie belangrike rede vir die afplatting van geestelike groei in die lewe van ‘n Christen. Die probleem is dat ons eers in ons private lewens val voor ons in ons openbare lewens val.

Is daar ‘n regte en verkeerde tyd om te bid. Jesaja 50:4 praat van soggens bid, maar ander gedeeltes sê dat ons enige tyd van die dag kan bid. Geen deel van die dag is heiliger as ander nie. Jesus het enige tyd van die dag gebid. Eintlik het gebed tussen Jesus en sy Vader nooit gestop nie.

1 Tessalonisense 5:17 sê dat ons sonder ophou moet bid. Dit beteken ons moet gedurig in gesprek met God wees. Gebed staan sentraal en is noodsaaklik in die lewe van ‘n Christen.



Gebed in die Bybel

In our day it’s worse to judge evil than to do evil. —Os Guinness

Gebed in die Bybel

So ‘n bietjie statistiek

  • Nie minder as 650 gebede kom in die Bybel voor nie.
  • Daar is ongeveer 450 antwoorde op gebede in die Bybel aangeteken.
  • Die eerste keer dat gebed in die Bybel vermeld word, is in Genesis 4:20. Vroeëre dialoë is deur God geïnisieer – Genesis 3:8 – 13 en Genesis 4:9.
  • In die Bybel lees ons dat Jesus 25 maal tydens sy bediening gebid het.
  • In die Bybel vermeld Paulus gebede – gebede, gebedsversoeke, oproepe om te bid – 41 keer.
  • Alhoewel gebede in verskillende posisies gedoen kan word, word vyf in die Bybel vermeld –  sit (2 Samuel 7:18), staan (Markus 11:25), kniel (Daniël 6:10 en ander),  met jou gesig na die grond (Matteus 26:39) en met hande opgelig (1 Timoteus 2:8).
  • In Jesus se modelgebed wat Hy aan sy dissipels gegee het, gee Hy vyf fokusareas:oDat God se naam geëer word – die fokus op sy ewige heerlikheid.
    • Dat God se koninkryk kom –  die fokus op sy ewige wil.
    • Dat God se voorsiening gegee word- die fokus op die huidige.
    • Dat God ons vergewe – die fokus op die verlede.
    • Dat God sy verlossing sal gee – fokus op ons toekoms.
  • Die Bybel noem verskillende tipes gebede:
  • Gebede van geloof (Jakobus 5:15)

Korporatiewe gebede ( Handelinge 2:42)

Gebede van versoeke of petisie (Filippense 4:6).

Gebede van danksegging (Psalm 95:2 – 3).

Gebede van aanbidding (Matteus 26:30).

Gebede van intrede (1 Timoteus 2:1).

Gebede van afsmeking (Psalms 69).

Bid in die Gees (1 Korintiërs 14:14 – 15).

  • Die woord Amen word vir die eerste keer in Numeri 5:22 gebruik.


Die kerk bid

Russiese spreekwoord

 

Die kerk bid

 

‘n Goeie voorbeeld is die kerk wat bid. Wat Jesus in die evangelie oor volgehoue gebed leer, sien ons in Handelinge in aksie wanneer Petrus gevange geneem word. In Handelinge 12 sien ons die kerk in gebed. Daar is veral drie belangrike aspekte wat ons moet raaksien.

 

  • Waaroor hulle bang was, het hulle met God oor gepraat

 

 

  • Gebruik bid soos kommunikasie tydens ‘n oorlog

Hierdie soort gebed weet daar is dinge in die wêreld wat verkeerd is; hierdie soort gebed kom in opstand teen die status quo. Hulle weet dat God se plan is dat die kerk die evangelie tot aan die eindes van die wêreld moet versprei – ten spyte van al Herodes se planne. Hulle het nie geweet of Petrus gaan leef of sterf nie, maar hulle het geweet dat God nie sy plan sal laat vaar nie. Daarom bid hulle, want hulle weet dat gebed situasies verander – dat gebed die arm van Hom wat die wêreld beweeg, beweeg.

 

  • Hulle het aangehou soos die weduwee in Lukas 18

Hierdie weduwee het die regter herhaaldelik kom vra dat reg aan haar moet geskied. Die regter geen nie om vir haar nie, maar om van haar ontslae te raak, hoor hy haar saak aan. Jesus sê dat dit is hoe ons moet bid – aanhoudend sonder om moedeloos te word. Die vroeë kerk het hierdie boodskap gehoor. Hulle bid aanhoudend. Toe God uiteindelik hulle gebede verhoor en Petrus uit die tronk kom, gaan hy na Maria se huis –  waar baie gelowiges saam was om te bid. Hulle klop aan God se deur.

 

Soms antwoord God nie ons spesifieke versoeke nie. Paulus bid drie maal dat God tog die doring uit sy vlees sal verwyder – en God sê vir hom dat hy moet ophou vra. Dit kan gebeur, maar gewoonlik hou ons te gou op met ons gebede. Maar Jesus het vir ons gesê dat ons moet aanhou vra. As die kerk so bid, gebeur daar dinge. Tronkdeure gaan oop; duisende mense kom tot geloof. Dit gebeur nie as gevolg van die inwoners se vaardighede of beplanning nie. Dit gebeur as gevolg van gebed.

 “The one concern of the devil is to keep the saints from prayer. He fears nothing from prayerless studies, prayerless work, prayerless religion. He laughs at our toil, mocks at our wisdom, but trembles when we pray… Prayer turns ordinary mortals into men of power…It brings fire. It brings rain. It brings life. It brings God. There is no power like that of prevailing prayer.” ~Samuel Chadwick