Bonhoeffer (17)

Affliction is often that thing which prepares an ordinary person for some sort of an extraordinary destiny. C. S. Lewis

Bonhoeffer (17)

Ek wil enkele gedeeltes uit 40-Day Journey with Dietrich Bonhoeffer (Augsburg Books) hanteer.

Kosbare genade is die verborge skat waarvoor mense met blydskap alles wat hulle het, sal verkoop. Dit is die kosbare pêrel waarvoor die handelaar alles sal verkoop. Dit is die oproep van Jesus wat maak dat ‘n dissipel sy nette verlaat en Hom volg.

 

Kosbare genade is die Blye Boodskap wat weer en weer gesoek moet word; die gawe waarvoor ons moet vra; die deur waar ons moet klop. Dit is kosbaar, want dit vereis dissipelskap; dit is genade, want dit vra dat ons Jesus Christus moet volg, Dit is duur, want dit kan mense se lewens opeis; dit is genade, want dit laat hulle leef. Dit is duur, want die veroordeel sonde; dit is genade, want dit koop die sondaar vry. Dit is veral duur, want God moes sy Seun opgee – Hy het ons vir ‘n prys gekoop. Niks kan tog vir ons goedkoop wees as dit vir God duur was nie. Dit is veral genade, want die lewe van sy Seun was nie vir God ‘n te groot prys om te betaal sodat ons kan lewe nie. Genade is duur, want dit dwing mense om God se juk te dra; dit is genade, want Jesus sê: My juk is sag en my las is lig (Matteus 11:30).

 

Bonhoeffer gee weer twee Bybelgedeeltes om ons te help:

  • Julle is gekoop, en die prys is betaal. Julle moet God dus in julle liggaam verheerlik (1 Korintiërs 6:20).
  • Roem sy heilige Naam, laat dié wat die teenwoordigheid van die Here soek, bly wees. Soek hulp en beskerming by die Here, soek gedurig sy teenwoordigheid (Psalm 105:3 – 4)

 

Duur genade beteken dat ek Jesus volg; goedkoop genade beteken dat ek sekere dinge aangaande Hom glo, maar Hom nie volg nie. Wat sou dit vir ons beteken as ons ons nette los en Jesus volg?

 

Dankie, o God, vir die duur genade wat U vryelik aan ons bied en wat my ‘n dissipel van Jesus Christus gemaak het. Amen.



Gehoorsaamheid en Genade

Gehoorsaamheid en Genade

Tim Keller het by The Gospel Coalition’s Women’s Conference hieroor gepraat. Hy glo dat die volgorde belangrik is. God het nie vir die Israeliete die wet – die tien gebooie – gegee en gevra dat hulle moet sê dat hulle alles sal doen wat die wet sê nie. Daarna sê Hy nie: “Goed, nou sal Ek julle uit Egipte lei en julle van slawerny verlos,” nie. God het hulle eers gered en toe gesê: “Omdat Ek julle gered het, moet julle my gehoorsaam.”

 

Interessant dat die Israeliete niks moes doen om uit Egipte verlos te word nie – geen burgeroorlog nie. Dit was alles net genade. Keller beklemtoon die volgorde van gebeure tydens die uittog: die verlossende optrede van God, gehoorsaamheid van die volk in reaksie op wat God gedoen het en seën as gevolg van hulle gehoorsaamheid.

In ‘n neutedop: verlossing deur genade, gehoorsaamheid en dan seën. Hierdie volgorde is vas. Die evangelie is dat ek aanvaar dat ek verlos is as gevolg van die bloed van Jesus Christus en daarom gehoorsaam ek. Die alternatiewe benadering – eers gehoorsaam en dan verlos – berus op vrees – hulle gehoorsaam, want hulle is bang. Maar as ons verstaan dat God ons eers verlos het en daarom is ons gehoorsaam, is die motiverende faktore liefde en dankbaarheid.

As ek sê dat as ek gehoorsaam is, God my sal seën, tree ek selfgesentreerd op. Hoekom gehoorsaam jy vir God? Om dinge te kry. Sulke gehoorsaamheid is altyd voorwaardelik. As ek egter weet dat ek reeds alles in Jesus Christus het, is ek nie gehoorsaam omdat ek dinge wil hê nie – ek is gehoorsaam om God te verheerlik.



Geloofsvrae: Begrippe vir die heilsweg: Geloof

Geloofsvrae: Begrippe vir die heilsweg: Geloof – Adrio König

Geloof

Ons word deur geloof geregverdig, nie op grond van ons geloof nie, maar op grond van Christus se geregtigheid. Die evangelie is dat Christus vir ons gesterf het toe ons nog God se vyande was. Glo dit. Vertrou Hom dat Hy gedoen het wat Hy in die evangelie sê. Dan spreek God jou vry van jou sonde. Dan beskou Hy jou asof jy nooit self enige sonde gedoen het nie, ja, asof jy self vir al jou sonde betaal het.

Ons geloof is dus leeg. Dit is op Christus gerig. Dit is ‘n belydenis dat wat ons kan doen, geen besondere waarde het op grond waarvan God ons kan regverdig nie. Ons erken en beklemtoon dit juis deur op Christus te vertrou. Net sy werk het voor God waarde om ons te regverdig.

Dit beteken ook dat ons in die geloof wegkyk van onsself, en ons oë net op Hom hou. Ons geloof is so onbelangrik dat dit nie eens saak maak of ons presies reg glo of regtig genoeg geloof het nie. Net Hy maak saak en Hy het meer as genoeg gedoen vir al my sonde, selfs vir die hele wêreld se sonde. As ek by wyse van spreke net so skuins na sy kant toe loer, regverdig God my al. Hy is gretig om dit te doen. Dit is presies waarvoor Hy sy Seun gegee het. Hy sal nie vitterig wees oor presies hoe my geloof lyk nie. Al is dit net so groot soos ‘n mostertsaad. Al sê ek net: `Ek glo, help my waar ek nog ongelowig is’ (Mark 9:24).

Maar dit beteken ook dat my geloof beslissend is. As ek nie in Hom glo nie, as ek nie vertrou dat Hy alles wat nodig is, vir my gedoen het nie, gaan ek verlore. Juis omdat my geloof leeg is, geen reddende waarde het nie, maar volkome van die waarde van Christus leef, is ek verlore as ek Hom nie toe-eïen nie. Dan het ek niks.

 

Mense wonder dikwels oor verskeie aspekte van die Christelike geloof. Fokus op 300 Geloofsvrae deur prof Adrio König is ʼn baie nuttige naslaanwerk wat ʼn verduideliking van 300 geloofsvrae bied.

Bybelkennis gaan gereeld gedeeltes uit hierdie bron publiseer. Ons dank aan prof König en Lux Verbi.BM vir hierdie vergunning.

 

Skrywer: Prof Adrio König



Geloofsvrae: Begrippe vir die heilsweg: Genade

Geloofsvrae: Begrippe vir die heilsweg: Genade – Adrio König

Genade

Ons kan nie anders nie as om hier te begin. Alles wat ons kan sê oor die wyse waarop God ons in die heil laat deel, het sy genade as basis. Ons verdien nie dat God ons red uit die ewige dood nie. Ons het ook niks wat ons kan aanbied wat enige heilswaarde voor Hom het nie. Ons staan met leë hande en bédel voor Hom. As daar iets moet gebeur, moet dit van sy kant af kom.

Trouens dit moet Hyself wees, nie maar net iets van Hom nie. Genade is nie iets wat God ons gee en dan kan ons op ons eie verder gaan nie. God se genade is eintlik God self wat ons genadig is, wat vir ons glimlag terwyl Hy eintlik die oordeel oor ons moet uitspreek, wat ons sien as ons nog ver aankom en dan nie die sambok gaan haal nie, maar ons omhels en teen Hom vasdruk (Luk 15:11ev). Die tollenaar het dit goed besef. Nie: Gee my genade nie, maar: Wees my genadig (Luk 18:13).

Maak dit nie genade vernederend nie? Dis mos nie lekker om bakhand te staan en bédel nie. Dis mos baie lekkerder om te weet: ek kon dit self doen. Natuurlik. Maar dit is nie die genade wat ons verneder nie, dis ons sonde. Ons sonde stel ons onder die oordeel van God. Ons sonde veroorsaak dat ons nie iets wat heilswaarde het vir onsself kan doen nie.

Genade daarenteen is verheffend. God omhels ons, sit ‘n ring aan ons vinger, skoene aan ons voete, en slag vir ons die vetgemaakte kalf! Dit is telkens die sonde wat ons verneder – soos vir die wegloopkind én ook vir die oudste seun wat nie genade wil betoon nie. Dit verneder hom voor die Vader. Dit wys dat hy nie innerlik vry is nie, self nog nooit by die Vader was nie, self nog nooit die omhelsing van die Vader aanvaar het nie. Daarom leer die Here Jesus ons bid: `Vergeef ons ons oortredinge soos ons ook dié vergewe wat teen ons oortree‘ (Mat 6:12).

Niks verder nie? Alles sommer maar net só? Nee, alles om Jesus wil. Dit is nie so dat God se genade sommer goedkoop is, dat Hy sommer net vergewe en niks verder nie. In werklikheid is daar ‘n duur prys betaal sodat Hy ons kan vergewe. Elders is verduidelik dat dit nie so maklik is om te verstaan waarom daar juis so ‘n onsaglike prys betaal moes word nie. Wat hier bygevoeg kan word, is dat Hy dié prys wat Hy vereis, nie van ons vereis het nie – dit sou ons ewige dood gekos het – maar dit self betaal het! Dit is genade. En as dit so is, pla dit my ook nie meer so vreeslik baie waaarom Hy nie net vergewe het nie, maar waarom Christus eers moes gesterf het. Ek weet dit was nodig dat so ‘n vreeslike prys betaal word, en ek loof Hom vir ewig dat Hy bereid was om self daarvoor in te staan toe Hy sien ons kan nie. Dit beteken net een ding: Hy gee baie vir ons om, ons kan seker wees van sy genade. Hy is die God met die glimlag.

 

Mense wonder dikwels oor verskeie aspekte van die Christelike geloof. Fokus op 300 Geloofsvrae deur prof Adrio König is ʼn baie nuttige naslaanwerk wat ʼn verduideliking van 300 geloofsvrae bied.

Bybelkennis gaan gereeld gedeeltes uit hierdie bron publiseer. Ons dank aan prof König en Lux Verbi.BM vir hierdie vergunning.

 

Skrywer: Prof Adrio König