Little learning and much pride come of hasty reading. —C.H. Spurgeon

Ek soek God se wil

Wat is God se wil vir my lewe? Dit is ‘n vraag waarmee baie van ons worstel. Ons word bang as ons aan ons toekomsplanne dink. Hoe weet ek wat is die regte besluit? Ons glo dat as ons net lank genoeg en hard genoeg soek, sal ons weet wat om te doen.

 In sy boek Just Do Something sê Kevin DeYoung dat ons nooit God se wil vir ons toekoms sal kry nie. Wat hy sê, is:  ons is vry van die las om God se plan te probeer vasstel voor die tyd. Die lewe is nie ‘n doolhof wat ons moet navigeer om by die eindpunt uit te kom nie. Nee. God vra dat ons Hom om al die draaie moet vertrou. Ja, God is in beheer van my lewe; Hy het spesifieke planne vir my toekoms, maar Hy verwag nie dat ek al die besonderhede van sy plan moet ken voor ek daar kom nie. Dit is nutteloos om na iets te soek wat God nie wil openbaar nie.

Hoekom weerhou God sy planne van ons? ‘n Onbekende toekoms lei tot geloof in ‘n bekende God. As ek elke stap en besonderheid van my lewe vorentoe geken het, was dit nie nodig vir my om te glo nie. God het nie net ‘n unieke plan vir jou lewe nie, maar Hy wil hê dat jy Hom moet vertrou. God gee aan ons meer as wat ons op ons eie kan hanteer, sodat ons kan besef dat ons sy hulp nodig het. Vertrou volkome op die Here en moenie op jou eie insigte staat maak nie. Ken Hom in alles wat jy doen en Hy sal jou die regte pad laat loop (Spreuke 3:5 – 6). In plaas van bid dat ons God se wil sal ken, moet ons eerder bid dat ons op sy leiding sal vertrou.

Ons dink aan God se wil vir ons lewe in terme van die toekoms. God wil egter hê dat ons Hom nou en hier moet soek en verheerlik. God se wil is dat jy meer soos Jesus Christus sal wees en Hom sal verheerlik. Hy wil ons hart en denke verander. As God aan ons ‘n nuwe hart gegee het wat begeer wat Hy begeer, sal ons besluite by sy plan inpas. Ons werk deur hierdie besluite met die wysheid wat Hy aan ons deur sy Gees gee.

Ons is so vasgevang in ons soeke vir God se verborge plan vir ons dat ons skoon van die passie en begeertes wat Hy aan ons gegee het, vergeet.

Kry die passies en begeertes wat God aan jou gee en volg hulle.

Neem jou besluite en staan vas in hulle.

Vertrou God – Hy is groter as jou taak en baie groter as jou bekommernis oor die toekoms.

“Jesus Christ carries on intercession for us in heaven; the Holy Ghost carries on intercession in us on earth; and we the saints have to carry on intercession for all men.” – Oswald Chambers

Verstaan God se wil

Elke dag is vol keuses en besluite – sommige minder belangrik, ander baie belangrik. Almal van ons het groot besluit om te neem: Met wie moet ek trou? Watter werk moet ek doen? Ens. God gee aan ons leiding sodat ons keuses kan maak wat Hom tevrede stel. Paulus bid vir die gemeente in Kolosse: Ons vra God dat Hy deur al die wysheid en insig wat die Gees gee, julle sy wil duidelik sal laat ken, sodat julle tot eer van die Here sal lewe deur net te doen wat Hy verlang (1:9 – 10).

Maar wat beteken die “wil van God?” In die Bybel verwys dit soms na God se ewige plan waarin Hy alles aan sy wil laat voldoen. Daar is ook God se voorskriftelike wil. Dit is soos die voorskrif van ‘n geneesheer – as ons dit neem is dit voordelig, maar ons kan weier om dit te neem. God se voorskriftelike wil is wat God wil hê dat ons moet kies in die lewe. Dit sluit die duidelike opdragte in sy Woord in, maar ook onderskeiding en wysheid Die soewereine wil van God is hoe dinge is; die voorskriftelike wil van God is hoe dinge behoort te wees.

God gebruik nie twyfelagtige tegnieke of allerhande foefies om sy wil bekend te maak nie. Maar hoe kan ons God se wil ken?

• Duidelike opdragte van God

God het reeds vir ons in sy Woord gesê wat sy wil vir ons lewens is. Daar is sekere gedeeltes wat vir ons sê dat sekere dinge die wil van God is. Wees altyd bly. Bid gedurig. Wees in alle omstandighede dankbaar, want dit is wat God in Christus Jesus van julle verwag (1 Tessalonisense 5:16 – 18); Dit is die wil van God dat julle heilig moet lewe (1 Tessalonisense 4:3). Daar is nog baie soortgelyke verse. Ons kan met sekerheid weet dat hierdie dinge God se wil vir ons lewens is. Hoe meer ons God se woord lees, hoe duideliker is God se wil vir ons lewens. Dwarsdeur  sy woord gee Hy vir ons leiding.

• Interpreteer en pas die Skrif akkuraat toe

Paulus sê vir Timoteus dat hy die woord van die waarheid suiwer verkondig (2 Timoteus 2:15). Romeine 12:1 – 2 help ons baie: En nou doen ek ’n beroep op julle, broers, op grond van die groot ontferming van God: Gee julleself aan God as lewende en heilige offers wat vir Hom aanneemlik is. Dit is die wesenlike van die godsdiens wat julle moet beoefen. ²Julle moenie aan hierdie sondige wêreld gelyk word nie, maar laat God julle verander deur julle denke te vernuwe. Dan sal julle ook kan onderskei wat die wil van God is, wat vir Hom goed en aanneemlik en volmaak is. Die ontdekking van God se wil is ‘n proses wat soos volg verloop: Ons gee ons lewe oor aan God. Dit beteken dat ek die gedrag van die heidense kultuur verwerp en my denke en lewe vernuwe. Hierdie oorgawe van my lewe aan God lei tot onderskeiding. Soos ons dan akkuraat lees en nadink oor God se woord groei ons nader aan God en voer sy wil uit. Nadenke en gebed oor die woord verhoed dat ons lees net ‘n intellektuele oefening bly.

• Gebed en die leiding van God.

As een van julle wysheid kortkom, moet hy dit van God bid, en Hy sal dit aan hom gee, want God gee aan almal sonder voorbehoud en sonder verwyt. Maar ‘n mens moet gelowig bid en nie twyfel nie (Jakobus 1:5 – 6). Ons moet vra vir wysheid. Gebed en tyd saam met God maak ons harte oper en meer bereid om besluite te neem.

• Verbly jou in die Here

Vind jou vreugde in die Here, en Hy sal jou gee wat jou hart begeer (Psalm 37:4). God gee nie aan ons ‘n volledige padkaart vir die lewe nie; God roep ons om ‘n verhouding met Hom te hê en dit sal al die besluite wat ons moet neem, vorm.

• Soek wyse raad

Hy weerhou die goeie nie van dié wat reg lewe nie (Psalm 84:12). Om reg te lewe is moeilik, maar God het ons nie alleen op aarde gelos nie. Daar is mense beskikbaar wat God gebruik om wyse raad te gee. Waar daar nie beraadslaging is nie, slaag planne nie; dit slaag wanneer daar baie raadgewers is (Spreuke 15:22). In die Spreuke-boek is daar baie verse wat die belang van raadgewers beklemtoon.

• Evalueer omstandighede

As jy al bogenoemde maniere gebruik om God se leiding te soek, kan jou omstandighede baie behulpsaam wees. Niks gebeur toevallig nie. Maar omstandighede is nie belangriker as die ander nie – veral nie sy Woord nie.

• Gebruik suiwer oordeel

Gesonde oordeel is goed. Die menslike rede is ‘n gawe van God en is goed as dit in ooreenstemming met God se woord is. In Handelinge 6 lees ons van die suiwer oordeel van die apostels toe hulle sewe diakens aangestel het sodat hulle al hulle aandag aan gebed en bediening van die woord kon gee.

• Ondervind God se intrede.

En dit terwyl ons God in die hemel is! Alles wat Hy wil, doen Hy (Psalm 115:3) Daarom moet ons nie verbaas wees dat God ons soms op wonderbaarlike wyse lei nie. So verander God Paulus se sendingplanne toe hy ‘n man van Masedonië sien wat hom smeek om na hulle toe te kom (Handelinge 16:9 – 10). God tree volgens sy diskresie in om ons te lei.

Ons kan die wil van God agterkom. Die vraag is of ons dit wil doen.

Those who observe suffering are tempted to reject God, those who experience it often cannot give up on God, their solace and their agony – Miroslav Volf

Dink nuut oor God se wil (2)

Frank Viola (Rethinking the will of God) het ‘n baie interessante siening oor die wil van God. Dit laat ‘n mens waarlik weer dink.

In die vorige blog het ons gesien dat dit verkeerd is om God se wil as ‘n treinspoor te sien – ons moet dit eerder as ‘n parkeerplek sien waarbinne ons ons vryheid moet ontdek.

Enige parkeergebied het grense, maar binne die gebied is daar baie keuses – parkeerplekke. Sekere keuses is beter  as ander, maar daar is baie plekke waar dit geen verskil maak waar ek parkeer nie.

Kom ons gaan terug na die begin.  God plaas vir Adam en Eva in ‘n tuin en gee sy eerste opdrag: Van al die bome in die tuin mag jy eet soos jy wil, maar van die boom van alle kennis mag jy nie eet nie (Genesis 2:16 – 17). Adam kon van al die bome eet, behalwe die een. Let wel: God sê nie vir Adam van watter boom hy moet eet nie, wanneer hy moet eet nie, ens. Dit is Adam en Eva se keuse.

Terug na ons beeld. God gee vir ons ‘n parkeergebied en trek die grense van die gebied. Solank as ek binne die grense bly, kan ek enige plek parkeer. Maar hoe bepaal ek die grense van die parkeerplek?

• Innerlik:In die Ou Testament gee God ‘n gedetailleerde uiteensetting van sy wil – 613 wette. Hulle weet wat hulle moet eet, wat hulle nie mag aantrek nie, ens. Maar na Jesus Christus se opstandig gee God aan ons ‘n nuwe verbond (Hebreërs 8 – 10). Nou gee Hy aan ons sy inwonende Heilige Gees. God se morele wil leef nou in ons. Die Heilige Gees leer vir ons wat die grense van die parkeergebied is. Dit is tog duidelik dat julle ‘n brief van Christus is, deur ons diens geskrywe, nie met ink nie, maar met die Gees van die lewende God, nie op klip nie, maar op die harte van mense (2 Korintiërs 3:3). Die wil van God is iets wat in ons leef. Ons is nou nie meer onderhewig aan honderde wette nie – die liefde moet alles wat ons doen bepaal. Die innerlike impuls is altyd om te gee, te help, te dien en lief te hê.
• Uiterlik – buite onsself. Hier staan die Skrif sentraal: Die hele Skrif is deur God geïnspireer en het groot waarde om die waarheid te onderrig, dwaling te bestry, verkeerdhede reg te stel en ‘n regte lewenswyse te kweek, sodat die man wat in diens van God staan, volkome voorbereid en toegerus sal wees vir elke goeie werk (2 Timoteus 3:16 – 17). Die Skrif is die lewende woord van God: Die woord van God is lewend en kragtig. Dit is skerper as enige swaard met twee snykante en dring deur selfs tot die skeiding van siel en gees en van gewrigte en murg. Dit beoordeel die bedoelings en gedagtes van die hart (Hebreërs 4:12). Dit is belangrik om te onthou dat die Heilige Gees nooit iets teenstrydig tot die Skrif sal sê nie.

Die grense van die parkeergebied is getrek. Die Heilige Gees en die Woord van God sal my help om die grense te bepaal. Is daar dalk nog iets wat ons kan doen om die grense duideliker te sien?

• En nou doen ek ‘n beroep op julle, broers, op grond van die groot ontferming van God: Gee julleself aan God as lewende en heilige offers wat vir Hom aanneemlik is. Dit is die wesenlike van die godsdiens wat julle moet beoefen. Julle moenie aan hierdie sondige wêreld gelyk word nie, maar laat God julle verander deur julle denke te vernuwe. Dan sal julle ook kan onderskei wat die wil van God is, wat vir Hom goed en aanneemlik en volmaak is (Romeine 12:1 – 2). God openbaar nie sy wil aan diegene wat onwillig is om Hom te volg nie: As iemand gewillig is om die wil van God te doen, dan sal hy weet of hierdie leer van God af kom (Johannes 7:17). As ons ons geestelike instinkte wil verskerp, moet ons ons denke vernuwe. Dit doen ons deur tyd in die teenwoordigheid van God te spandeer.
• Volwasse gelowiges word volwasse deur te oefen:  Vaste kos is vir grootmense, vir mense wat oor insig beskik en wat deur ervaring geoefen is om tussen goed en kwaad te onderskei (Hebreërs 5:14).
• Elkeen het ‘n gewete – ‘n interne monitor; ‘n alarm wat afgaan as jy oortree: My gewete, wat deur die Heilige Gees gelei word, getuig saam met my (Romeine 9:1)

Ons het gesien daar is vyf vuurtorings wat  ons lei ten opsigte van God se morele wil:

• Die werking van die Heilige Gees geskrywe op ons harte en denke.
• Die getuienis in die Skrif.
• Die vernuwing van ons denke.
• Die oefening van ons geestelike sintuie.
• Die voorskrifte van ons gewete.

Moet daarom nie onverstandig optree nie, maar probeer te wete kom wat die Here wil dat julle moet doen (Efesiërs 5:17).

Ons het nou na die grense van die parkeergebied gekyk. Maar hoe kies ek nou ‘n parkeerplek?

It is better to have loved and lost than never to have loved at all ­– Alfred Lord Tennyson

Dink nuut oor God se wil (1)

Frank Viola (Rethinking the will of God) het ‘n baie interessante siening oor die wil van God. Dit laat ‘n mens waarlik weer dink.

Broers, moenie in julle denke kinders wees nie. Wees onvolwasse in die slegte dinge, maar in julle denke volwasse (1 Korintiërs 14:20).

Baie Christene sien die wil van God as ‘n treinspoor. God het ‘n plan tot in die fynste besonderhede uitgewerk vir my lewe. Ek is op ‘n treinspoor en kan nie links of regs afwyk nie. Sou ek wel afwyk gaan ek op ‘n plek beland waar ek nie wil wees nie.

As dit so is, hoe sou ek dan God se wil ontdek? Deur die Skrif te bestudeer, my innerlike gevoelens (gewete) te volg en deur die uitwendige tekens om my te dekodeer.

Hierdie siening van God se wil is nie waar nie. Hoekom nie?

• Dit is nie wat die Bybel sê nie. Die Bybel gebruik die wil van God op vier  maniere:

1. oGod se ewige wil – sy sentrale doel. Maar nou het God die ryke verskeidenheid van sy wysheid deur die kerk bekend laat word aan elke mag en gesag in die hemelruim, soos Hy Hom van ewigheid af voorgeneem het om dit deur Christus Jesus, ons Here, tot uitvoering te bring (Efesiërs 3:10 – 11). Ons het die voorreg om die geheim van die skepping en die wilte ken en daarvolgens te leef.
2. oGod se soewereine wil. Ook genoem God se toelatende wil. Dit is verborge vir die mens, behalwe as God dit aan ons openbaar. As iets gebeur is dit sy wil, want Hy het dit gesien en dit toegelaat.
3. oGod se morele wil. Dit is sy begeerte vir die optrede van mense. Hierdie wil is aan ons geopenbaar en dit geld vir alle mense op dieselfde manier. Sy toelaatbare wil laat byvoorbeeld toemense sy toenadering verwerp.
4. oGod se wil om sy gawes en roeping te versprei. Hy is die Hoof van sy kerk en hy bepaal die plek van elke lid van sy kerk. Dit verskil van persoon tot persoon.

God se wil verwys nooit na ‘n spesifieke, individuele plan wat van persoon tot persoon verskil nie.

• Hierdie siening is onleefbaar. Ons maak tallose besluite elke dag – ek gaan nou opstaan, ek gaan dit aantrek … Niemand van ons vra vir die Here wat sy wil ten opsigte van hierdie besluite is nie en wag dan tot Hy sy wil aan ons openbaar nie.
• Hierdie siening moedig onvolwassenheid aan. Ons kan nie soos Gideon vra dat dat God net op ‘n stukkie vlieswol dit laat dou nie (Rigters 6). Ons kan ook nie meer die lot gebruik nie, want na die uitstorting van die Heilige Gees lees ons nie meer dat die lot gebruik word nie. Nou speel ons maar Russiese roulette – laat die Bybel oopval en sit jou vinger op ‘n vers. Dit sou dan God se wil wees. Dit is ‘n onvolwasse siening van God se wil.
• Hierdie siening lei tot skuldgevoelens, vrees, twyfel en verwarring. As ons voel ons het ‘n besluit nie volgens God se wil geneem nie, voel ons skuldig – ons is dan nou kwansuis nie “geestelik” genoeg om God se leiding op elke besluit te kry nie. As ons later sou uitvind dat ‘n teken of innerlike indruk nie van God gekom het nie, oorweldig vrees ons.
• Hierdie siening nie ooreenkomstig God se verhouding met sy mense nie. God se verhouding met sy mense kan in drie beelde beskryf word:
• Skaapwagter – lei Hy ons in ‘n gevaarlike gebied, bly Hy elke oomblik by ons en lei ons uit gevaar. Lei Hy ons na groen weivelde, gee Hy aan ons vryheid van keuse – Hy sê nie vir ons watter graspol ons moet eet nie.

1. oKoning – Hy gee aan sy mense geestelike beginsels vir hulle lewens, maar binne hierdie beginsels is daar baie ruimte vir beweging.
2. oVader – ‘n vader gee baie opdragte aan kinders as hulle nog klein is, maar hy verwag hulle moet volwasse word. Hoekom? Om besluite in ooreenstemming met sy wil te kan neem.

Ek wil jou onderrig en jou die pad leer wat jy moet volg. Ek wil jou raad gee en my oog oor jou hou. Moenie onverstandig wees nie, soos ‘n perd of ‘n muil wat met ‘n stang in die bek beteuel moet word as jy hom wil lei (Psalm 32:8 – 9). ‘n Perd het geen onderskeidingsvermoë of oordeel nie. Daarom moet hulle met ‘n stang en teuel gelei word waarheen hulle moet gaan. Ons volg so graag leiers wat van ons ‘n perd maak – links … regs … vorentoe … Ons wil hê dat God ons met ‘n stang en teuels lei. Maar dit is nie wat God van sy kinders verwag nie. God het immers vir ons verstand gegee.

Broers, moenie in julle denke kinders wees nie. Wees onvolwasse in die slegte dinge, maar in julle denke volwasse (1 Korintiërs 14:20)

God se wil vir ons is nie soos ‘n treinspoor nie – eerder soos ‘n parkeergebied. Daarna gaan ons volgende keer kyk.