There is something beautiful about all scars of whatever nature. A scar means the hurt is over, the wound is closed and healed, done with. -Harry Crews, skrywer (1935-2012)

God se heerlikheid in die ou en nuwe verbond

In 2 Korintiërs 3:7 – 11 stel Paulus die ou en die nuwe verbond teenoor mekaar. Hoekom is die nuwe verbond soveel beter as die ou verbond? Vir sy argument gebruik hy die begrip van heerlikheid – hoekom is die heerlikheid van die nuwe verbond groter as dié van die ou verbond.  Hy gebruik die Hebreeuse kleiner/minder na groter vorm van argumentering.

• Meer heerlikheid (vs 7 – 8).

Minder: ⁷Die wet wat in letters op klip gegraveer is, het in heerlikheid gekom. Hierdie heerlikheid, wat tog gou sou verdwyn, het op die gesig van Moses so geskitter dat die Israeliete nie na hom kon bly kyk nie.

Groter: As die bediening wat tot die dood lei, met soveel heerlikheid gekom het, ⁸hoeveel groter sal die heerlikheid van die bediening wat deur die Gees geskied, dan nie wees nie?

Die wet het in heerlikheid gekom. Dit oefen ‘n bediening van oordeel en dood oor Israel uit – Israel kon nie eers vir een dag die wet onderhou nie. Daarom was die mense bang was om na Moses se gesig wat so geskitter het, te kyk. As Moses se bediening met soveel heerlikheid gekom het dat dit met ‘n sluier bedek moes word, hoeveel heerliker is Paulus se bediening van die Gees wat nie versluier is nie. Dit stel God se mense voortdurend bloot as sy heerlikheid en transformerende krag.

• Weer heerlikheid

Kleiner:  ⁹Die bediening waardeur die mense veroordeel word, het met heerlikheid gekom,

Groter: Maar die bediening waardeur die mense vrygespreek word, oortref dit verreweg in heerlikheid.  

Gevolgtrekking: ¹⁰Ons kan sê dat die heerlikheid van vroeër nie te vergelyk is met die alles oortreffende heerlikheid van nou nie.  Die bediening van veroordeling verwys na die gevolge van Moses se bediening. Paulus se bediening van vryspraak bevestig wat die profete oor die bediening van die Gees voorspel het – die hart van klip word met ‘n hart van vleis vervang (Esegiël 11:19 – 20). Daarom kon Paulus sê: Daar is dus nou geen veroordeling vir dié wat in Christus Jesus is nie (Romeine 8:1).Die ou verbond het met heerlikheid gekom, maar die effek van die nuwe verbond oortref die heerlikheid van die oue.

• Nog meer heerlikheid

Minder: ¹¹As wat aan die verbygaan was, van heerlikheid gestraal het,

Groter: Veel meer nog sal die blywende van heerlikheid skitter.

Die heerlikheid van die ou verbond was verbygaande terwyl die heerlikheid van die nuwe verbond permanent is.

Paulus se logika verklaar:

• Sy bediening is heerliker as dié van Moses as gevolg van sy onbeperkte blootstelling aan God se heerlikheid.
• Paulus se bediening is heerliker, want dit is ’n bediening van vryspraak.
• Paulus se bediening is heerliker, want dit is permanent.

God se heerlikheid – Francois Malan

Christa vra:

Verduidelik asseblief vir my die term: :God as heerlikheid.

Antwoord:

Prof Francois Malan antwoord:

God as heerlikheid (die Griekse woord doksa)

Die Hebreeuse woord vir heerlikheid kabood word in die Ou Testament gebruik om iemand se eer of aansien aan te dui (vgl. Ps.95:1), maar veral die mag van God (Ps.19:2 wat oor sy skeppingsmag handel). Die Griekse vertaling van die Ou Testament het die Hebreeuse woord kabood met doksa vertaal om veral God se mag en sy eer mee weer te gee. Sy mag is ‘n uitdrukking van sy wese, en sy eer is die eer wat mense en engele aan Hom gee oor sy mag. Sy goddelike heerlikheid word in sy skepping en ander dade gesien. So word sy verskynings gesien as uitdrukkings van sy goddelike ligglans, soos by Sinai en aan Moses in die tent van ontmoeting, en daarna skitter selfs Moses se gesig (Eks.34:29-35). Die Nuwe Testamentiese gemeentes en skrywers het veral die Griekse vertaling van die Ou Testament gebruik. En daarom gebruik hulle die woord doksa heerlikheid, om die eer en die mag van God uit te druk, maar ook sy goddelike wese (bv. Lukas 2:9; 9:29-31).

Kol.1:11 Mag God wat oor al die mag en die heerlikheid beskik, julle versterk en aan julle al die krag gee om in alle omstandighede met geduld te volhard (NAV). Letterlik: mag julle versterktes wees met alle krag volgens die krag van sy heerlikheid (= sy heerlike krag) vir alle volharding en geduld met vreugde.

In hierdie teks gaan dit nie eintlik oor die heerlikheid van God nie, maar oor die heerlikheid van sy mag, sy verbasende mag. – dit wat ‘n mens verwonder, waaroor jy verbaas is. So ook bv. in Romeine 6:4.

Ook in Joh.11:4: Jesus sê dat Lasarus se siekte nie op die doop sal uitloop nie, maar op die openbaring van die heerlikheid (NAV mag) van God sodat die Seun van God daardeur verheerlik kan word – dit geskied toe Jesus Lasarus uit die dood opwek en baie mense tot geloof in Jesus gekom het (Joh.11:45). Weereens is dit die mag waaroor ‘n mens verbaas staan, en daardeur sal die Seun van God eer en lof ontvang.

In Joh.11:40 vertaal die NAV ook die woord doksa met mag.

Joh.12:43 lui letterlik: hulle (die lede van die Joodse Raad wat te bang was om hulle geloof in Jesus te bely) het die eer (doksa) van mense meer liefgehad as die eer (doksa) van God.

In Handelinge 7:55 het Stefanus die heerlikheid van God in die hemel gesien, en Jesus wat aan die regterhand van God staan. Hier gaan dit om die ligglans van God.

Romeine 3:23 sê letterlik: want almal het gesondig en dit ontbreek hulle aan die heerlikheid van God (OAV). Die NAV vertaal die heerlikheid van God net as God. Dit gaan oor sy wese.

2 Korintiërs 4:6 sê: God wat gesê het: Laat daar lig skyn uit die duisternis (Genesis 1:3), het ook in ons harte ‘n lig laat skyn om ons te verlig met die kennis van die heerlikheid van God, wat van Jesus Christus uitstraal.’ Hier word die heerlikheid van God gesien in die neerbuigende liefde van Christus wat vir ons aan die kruis gesterf het en deur God opgewek is (3:14)

1 Timoteus 1:11 ‘…die evangelie van die heerlikheid van die goeie God’ (NAV; of: die heerlike evangelie van die geseënde God). Dit beskryf die boodskap van verlossing wat die sigbare heerlikheid van God openbaar in die Christus gebeure. Dit is God se heerlikheid wat sigbaar word in sy krag en majesteit met die dood en opwekking van Christus omdat Hy die wêreld so liefhet dat Hy sy enigste Seun gegee het, om ons van sonde te verlos en ons deel te gee aan die ewige lewe saam met Hom (Joh 3:16).

In Johannes 13:31-35 sê Jesus dat die Seun van die mens verheerlik word deur sy sterwe en opstanding uit liefde vir die wêreld, en dat God daardeur verheerlik word. En as ons mekaar liefhet word die Seun en die Vader verheerlik in die wêreld. Die heerlikheid van God word geopenbaar in sy liefde (vgl. 1 Joh 4:7-16 God is liefde, die verhouding tussen die Vader en die Seun en die Heilige Gees is ‘n liefdesverhouding waarin ons deel kry deur die Heilige Gees wat in ons woon). Deur Jesus se kruisweg leer ons dat God se heerlikheid geleë is in sy nederige neerdaal na ons toe en ons opneem in sy heerlikheid, om soos God en Jesus lief te hê.

Wanneer alles nuut gemaak word, as die Seun van die mens op sy heerlike troon sit, sal sy volgelinge ook op trone sit en regeer (Matteus 19:28). Ons almal weerspieël die heerlikheid van die Here, die Heilige Gees verander ons al meer om aan die beeld van Christus gelyk te word, aan sy liefdesdiens, en die heerlikheid wat van ons uitstraal as ons in nederige liefde ons medemens dien neem steeds toe deur die werking van die Gees in ons en met ons deur sy woord (2 Kor.3:18).

 

Skrywer: Prof Francois Malan