Die Groot Geloofswoordeboek: Die Goddelikheid van die Heilige Gees

Die Goddelikheid van die Heilige Gees

Oor die *Heilige Gees bely die kerk dat ook Hy God is, en verder dat Hy ‘n Persoon is, en nie maar net ‘n Goddelike krag of die onpersoonlike krag van God nie. Dit beteken dat die Gees nie maar net die onpersoonlike krag of invloed van God is nie, maar ‘n Goddelike Persoon. Na Hom word oor en oor in persoonlike terme verwys, nie as “dit” nie (dus nie ‘n krag nie), maar as “Hy”, ‘n Persoon. Die dinge wat aan Hom toegeskryf word, is ook dinge wat ‘n persoon doen. Hy sal die dissipels herinner, Hy sal die wêreld oortuig, Hy praat en besluit, wat alles handelinge van ‘n persoon is (Joh 14:17-26; 16:7-14; Hand 13:2; 15:28). Die Goddelikheid van die Gees spreek daaruit dat ook na Hom as “Here” verwys word, en dat dinge wat in die Ou Testament deur God gesê is in die Nuwe Testament aan Hom toegeskryf word (vgl Jes 6:9 met Hand 28:25-26; en Jer 31:31 ev met Heb 10:15-16). Petrus sê dat Ananias vir die Heilige Gees gelieg het, en dat dit beteken dat hy vir God gelieg het (Hand 5:3-4).

 

Drie, en tog Een

Ons het nou na die Bybel gekyk. Uit hierdie getuienisse het die kerk afgelei dat daar drie Persone is wat God genoem word, maar dat daar net een God is. Op een of ander manier moet die drie dus saam die een ware God wees. Die vraag is nou hoe ‘n mens dit kan probeer verstaan.

Baie voorstelle is deur die eeue gemaak en word vandag nog gemaak. ‘n Mens moet altyd aan twee kante waak: óf dat ons die drie so selfstandig teenoor mekaar stel dat ons uiteindelik met drie verskillende Gode sit, óf dat die drie eintlik net drie verskillende gesigte van die een God is.

Ons moet hulle onderskei, maar ons mag hulle nie skei nie. Dit is nie die Vader wat aan die kruis gesterf het. Dit is nie die Seun wat op die Pinksterdag uitgestort is nie. Dit is nie die Gees wat die Seun gestuur het nie. Elkeen het sy eie lewe en werk, al is dit net so duidelik dat al drie voortdurend by mekaar en in mekaar se werk betrokke is. Natuurlik het die Vader ook gely toe Jesus aan die kruis gesterf het. Natuurlik het Jesus op die Pinksterdag saam met die Gees na ons gekom soos Hy beloof het. Maar in elke Goddelike handeling is een Persoon primêr die verantwoordeli­ke Een.

Een Wese, drie Persone

Hoe formuleer ons dit nou? Die kerk het gekies vir twee woorde wat nie in die Bybel voorkom nie, maar eerder in die Griekse wysbegeerte. God is een Wese, maar drie Persone. Hierdie woorde is egter nie op sigself belangrik nie. ‘n Mens kan enige betekenis aan ‘n woord gee. Maar die bedoeling is taamlik duidelik. Daar is net een ware God, maar daar is drie (Persone) wat al drie saam hierdie een ware God is. Hulle kan duidelik van mekaar onderskei word, maar hulle is nooit geskei in die sin dat hulle op hul eie handel nie. Al drie was by die kruis betrokke, al is dit net die Seun wat aan die kruis gehang het. Al drie was by Pinkster betrokke, al is dit die Gees wat uitgestort is en nie die Vader of Christus nie.

Dit gaan nie om die woorde (een Wese, drie Persone) nie, maar om die saak. Dis duidelik dat die evangelie deur Griekeland na die wêreld gekom het. Dis Griekse filosofiese begrippe. As die evan­gelie deur Afrika suid van die Sahara na die wêreld gekom het, sou ons nie hierdie woorde gebruik het nie. Afrika se tale het nie sulke onderskeidings nie. Maar die saak sou dieselfde gebly het: Daar is net een ware God, die God van Israel, maar daar is drie wat op een of ander manier saam hierdie God is.

Woorde gemerk met ʼn * word elders bespreek.

Outeur: Prof Adrio König

Die Groot Geloofswoordeboek: Doop met die Heilige Gees

Die uitdrukking “die doop met die Heilige Gees” kom ses keer in die Nuwe Testament voor. Vier keer kom dit voor in die mond van Johannes die Doper as hy verwys na Jesus wat met die Heili­ge Gees sal doop (Matt 3:11; Mark 1:8; Luk 3:16; Joh 1:33), een maal as ‘n uitspraak van Jesus self (Hand 1:5) wat na die uitstorting van die Gees verwys (Hand 2), en een keer in die mond van Petrus tydens Kornelius se bekering (Hand 11:16).

Hierdie uitsprake verwys almal direk of indirek na die uit­stor­ting van die Gees op Pinksterdag (Hand 2). Johannes kontrasteer sy doop, wat ‘n *bekeringsdoop was, met Jesus wat met die Gees kom doop. En Jesus verwys direk na die uitstorting van die Gees as Hy praat van “die doop met die Gees” (Hand 1:5).

Die enigste ander keer wat die uitdrukking voorkom, is Petrus se verwysing na Kornelius se bekering. Terwyl Petrus gepreek het, het die Gees op Kornelius-hulle gekom. Lukas verklaar dat die gawe van die Gees op hulle “uitgestort” is (Hand 10:46 ev) net soos op die dissipels op Pinksterdag. Nie minder nie as vier keer beklemtoon hy dat die Gees ook op die heidene gekom het “net soos op ons” (op die Joodse gelowiges – en wel op Pinksterdag). Wat dit beteken, word duidelik as ‘n mens dink aan die stryd wat die Here gehad het om Petrus te oortuig dat heidene net soos Jode deel het aan die volle heil wat Christus bewerk het (Hand 10). Die gebeurtenis by Kornelius is in hierdie sin net ‘n bevestiging dat Pinkster ook vir die heidene was, soort van ‘n Pinkster-vir-die-heidene.

Maar dit beteken dat “die doop met die Heilige Gees” ‘n teg­niese term is vir Pinkster. Die uitdrukking word dan ook nooit in die Nuwe Testament gebruik vir ander ervarings nie, ook nie vir individuele ervarings van mense na hul bekering nie. Net soos die kruisiging en die opstanding van Jesus is die koms van die Gees tydens die Pinksterfees (Hand 2) ‘n unieke gebeurtenis wat nie her­haal word nie. Dit is dus ‘n ongewone gebruik van hierdie term om vandag van gelowiges se individuele ervarings te praat as “doop met die Gees”. Die Nuwe Testament gebruik ander terme vir indi­vi­due se ervarings, soos *vervulling met die Gees. Ons het veral in Han­delinge ook nog ander uitdrukkings, soos dat die Gees op of oor mense gekom het. Dit is ‘n ervaring wat ge­lowiges herhaalde­lik kan hê. Maar tegnies is die doop met die Gees, of die uitstorting van die Gees, die eenmalige gebeurtenis waarna Handelinge 2 verwys.

Dit beteken nie dat mense nie vandag wonderlike ervarings met die Gees het nie, maar net dat dit nie is wat in die Nuwe Testament die doop met die Gees genoem is nie.

 

Outeur: Prof Adrio König

Die Rol van die Vader, die Seun en die Heilige Gees in my lewe – Fanie Rudolph

Wat is die rol wat God die Seun, God die Vader en God die Heilige Gees in die gelowige se lewe speel.

Antwoord:

Dr Fanie Rudolph antwoord:

1. Inleiding:

Miskien moet ons begin deur te sê dat die rol van God as Vader, Seun en Heilige Gees nie losgemaak moet word van die belangrike feit dat ons een God aanbid nie.  Wie van hierdie drie Persone ons ook mee te doen kry, ons kry te doen met God.  Die oomblik as ons hulle heeltemal probeer skei, loop ons die gevaar om drie gode te aanbid, en nie meer een Lewende God nie!  Hou dit in gedagte by ons bespreking hiernaas.

 

2. God as Vader:

Die Bybel stel God Vader voor as Versorger en Beskermer.  In die Ou Testament sien ons dat God alles gemaak het, dit is, Hy is die Voorsiener (Gen. 1-2).  Hy is ook die Koning wat oor sy skepping regeer.  Ons sien God wat mense kies om ‘n nuwe begin mee te maak.  Hy verbind hulle aan Hom met ‘n verbond (Gen. 6-8 en 12).  Die hele Ou Testament vertel eintlik vir ons die verhaal van God wat Vaderlik omgee vir die mense wat Hy gekies en geroep het.  Hy doen dit deur mense die regte pad te wys, hulle te wys op hulle foute, hulle te vergewe, en vir hulle nuwe hoop te gee.  Dit doen God oor en oor.  Soms word God se versorging met moederlike beelde aangedui (Jes. 49:15; 66:13).  In die Nuwe Testament lees ons dat God as Vader die Inisieerder van ons verlossing is.  Hy maak ons nuut deur sy Seun mens te laat word en vir ons te laat sterf (Joh. 3:14-18).  In die Ons Vader-gebed leer Jesus ons van die Vader as ons groot Versorger en Beskermer (Matt. 6:9-13).  Hy is God wat bo ons is en namens ons en ter wille van ons (tot ons voordeel en sy eer) soos ‘n GOEIE Vader optree.

 

3. God as Seun:

God as Seun is ons Verlosser.  Hy verlos uit genade (2 Kor. 5:20-21).  Hy bring ‘n nuwe bedeling waarin alles nuut geld, ook die wet (Matt. 5-7).  Hy bring die verlossing wat die Vader uitgewerk het, tot uitvoering.  Hy sterf in ons plek.  So maak Hy ons kinders van God (Joh. 3:16).  Deur sy opstanding gee Hy vir ons nuwe lewe (1 Kor. 15).  Hy is die enigste Weg om by die Vader uit te kom (Joh. 14:6; vgl. 14:13; 14:2-3).  Dit is interessant dat Jesus nie hierdie gedeelte, wat ons so graag in ons gebede insluit, noem in sy modelgebed nie.  Wie hierdie Weg volg, kry deel aan die nuwe lewe (Joh. 6:47).  Die verlossing van die Seun is universeel (i.e. beskikbaar vir alle mense).  In die hemel vervaag die onderskeid tussen Vader en Seun.  Wanneer Johannes die troon van God en die Lam (een troon) in die hemel sien, sien hy dat die dienaars van God Hom dien (een God – Openb. 22:3).  Die Seun is self God.  Wie Hom sien, sien die Vader (Joh. 14:9; 10:30).  As God was Hy by die skepping betrokke saam met die Vader (Kol. 1:1-20).  In Openbaring word Hy ook Regter by die oordeel, as God (Openb. 14, 19, 20).  Hy is God wat mens geword het om ons na God toe te trek.

 

4. God as Heilige Gees:

Die Heilige Gees is van die Skepping af betrokke by God se werk (Gen. 1:1-2).  Die Gees het profete geïnspireer.  In die Nuwe Testament lees ons veral van die Gees as getuie oor God en die Godheid van die Seun (Matt. 3:17).  Die Heilige Gees lei ons om by die Seun uit te kom, sodat ons die weg na die Vader kan vind.  Die Heilige Gees maak dit vir ons moontlik om te glo (1 Kor. 12:3).  Die Gees is God-met-ons, nadat die Seun opgevaar het na die hemel toe (Joh. 14:16-17).  Hy is God wat in ons getuig oor God en die Seun, en ons laat getuig tot eer van God (Hand 1:8).  Hy is ons Voorspraak (i.e. Hy tree vir ons in by God, en Hy tree vir God in by ons – Joh. 16:26).  Hy bid selfs vir ons tot die Vader as ons woorde opraak (Rom. 8:26-27)!  Hy weet immers presies hoe ons voel.  Hy is voorwaar ‘n Trooster en Voorspraak waarop ons kan reken.  Verder sal die Gees die sonde van die wêreld uitwys, en ons lei om die Waarheid (i.e. die Seun) te volg, en nie die wêreld nie (Joh. 16:8).  Ons sien in Paulus se briewe dat die Gees die Gewer van geestelike gawes is (1 Kor. 12-14).  Hy maak dit vir ons moontlik om tot eer van God te werk.  Die Gees bevry ons van die verlede en stel ons in staat om meer en meer soos Jesus te word (2 Kor. 3:18).  Wie die Gees hoor en aanneem, word bewus van sy / haar kindwees van God (Rom. 8:14).  Wie die Gees van God het, kan nie anders nie as om iets van Christus in hulle lewe te wys nie (Gal. 5:22-26), want jy word oorspoel met die genade van Christus wat jou lewe vul.

 

Samevatting:

Dit is seker ‘n mondvol.  Ons sou eintlik ‘n hele boek daaroor kon skryf.  Miskien vat 2 Korintiërs 13:13 dit die beste saam: Die Vader wil ons in liefde vashou en beskerm en versorg, die Seun kom red ons met sy genade, ‘n genade waaraan ons kan en moet vashou, en die Heilige Gees wil, in gemeenskap met gelowiges (i.e. deur heeltyd by jou te wees en in jou te werk), ons lei om in die voetspore van die Seun te volg terwyl ons leef as mense wat aan die Vader behoort.

 

Outeur: Dr Fanie Rudolph

 

Die Rol van die Vader, Seun en Heilige Gees? – Kobus Kok

ʼn Leser vra:

Wat is die rol van God die Vader in die gelowige se lewe vandag? Wat is die rol van God die Seun in die gelowige se lewe vandag? Wat is die rol van God die Heilige Gees in die gelowige se lewe?

Antwoord:

Dr Kobus Kok antwoord:

Hierdie vraag roep eintlik na ʼn omvattende bespreking – meer as wat ek in die toegelate 800 woorde van die artikel kan bespreek. Daarom sal die inligting so kernagtig moontlik en in breë lyne aangebied word.

God, die outeur van die mens-verhaal, die verbond en nog baie meer

Die Bybel vertel mos die groot verhaal van God, die Vader – die Skepper van die Ganse aarde, (Gen 1-2), die een wat ʼn verbond/ooreenkoms met Abraham en sy nageslag kom sluit het (Gen 12), die God wat soos ʼn Vader sy kinders beskerm (Ps 121) maar ook eendag soos die groot regter oor die wêreld gaan oordeel (2 Kor 5:10). Maar tussen die skepping en die eindtyd, staan die groot verhaal Jesus. Dit vertel ook die verhaal van die Vader wat so na die wêreld gekyk het en gesien het dat die hele wêreld vol sonde en korrupsie is (Gal 3:22), eintlik slawe is van sonde en afskuwelike dinge  wat nie net ʼn wig tussen God en mens onderling veroorsaak nie, maar ook ware lewe en wysheid kom steel (kyk Josephus in boek 4 Hoofstuk 8 oor Moses se toespraak aan Israel). Juis om hierdie rede het die Vader sy Seun gestuur (Joh 3:16) om ons mense te verlos van ʼn doodsbestaan, sodat ons deel kan kry aan lewe (vgl. Joh 5:24) en gered sal word as die groot oordeeldag van God gaan plaasvind (Kyk 2 Kor 5:10). Bogenoemde vorm dit wat ons die meta-narratief van die Bybel noem. Myns insiens is Johannes se evangelie die beste voorbeeld waarin die rol van die liefdevolle Vader, die Seun en die Heilige Gees die beste vertel word. Kom ons kyk dan na Johannes – die evangelie van die Lewe.

Rol van die Vader: Die groot Koning

In Johannes is God se rol die van die Vader, die Groot Koning (Lees gerus prof Jan se boek “Family of the King, 2000 – uitgegee deur Brill) wat die aarde geskep het en ook ʼn plan gehad het met die herskepping van die aarde – met ander woorde om nuwe lewensmoontlikhede te skep (Joh 10:10).  Die Koning is die een wat vanuit sy troonkamer regeer (kyk Openb 4). Hy is die een met absolute mag, en die een wat totaal in beheer is. Een dag het hy so na die wêreld gekyk, soos ons hier bo gesê het, en gevoel dat hy ʼn plan wil maak om die wêreld te red wat geestelik dood is (Joh 5:24) en hom nie meer ken nie (Joh 7:28; 8:19). As Koning, rig hy toe die groot bevel uit en stuur sy Seun na die aarde (Joh 3:16). Hy het egter nie net die Seun sommer net gestuur nie, maar hy was teenwoordig by die Seun en het die Seun alles gewys wat die Seun moet doen (Joh 5:20) en hom nooit alleen gelos nie (Joh 8:29). As Koning, wat eintlik die enigste een is wat die mag het om lewe te gee en te oordeel, het hy die mag om te oordeel en om lewe te gee oorgegee aan sy Seun (Kyk Joh 5:30). Tog is die oordeel van die Seun in totale ooreenkoms met dit wat die Vader sou oordeel. Johannes 10:30, wat gaan oor Jesus oor die goeie herder, stel dit duidelik dat die Vader en die Seun eintlik een is. Wie die Seun sien, sien dus die Vader.

Die rol van die Vader in ʼn neutedop:

Hy is die Groot Koning (Openb 4), die Skepper van die aarde (Gen 1/Joh 1)

Hy is die een wat die verbond met Abraham en sy nageslag gesluit het (Gen 12)

Hy is die beskermer van Israel en sy kinders (Ps 121)

God is totaal in beheer van alles – ook jou lewe (Openb 4)

Hy is die Een wat die wêreld, selfs sy vyandige skepsels liefhet (Joh 3:16)

As liefdevolle Vader met plan, het hy besluit om die wêreld te red en sy Seun te stuur (Joh 3:16)

Die rol van Jesus, die Koning se gestuurde Seun

In Johannes is dit duidelik dat die Vader die Seun gestuur het met ʼn spesifieke doel, en dit is sy primêre doel – naamlik om God en Sy wil uit te lê vir mense (Joh 1:18), sodat hulle kan glo (Joh 3:16) en uiteindelik die ware, ewige lewe kan ontvang en nie verlore hoef te gaan nie.

 

In Joh 12:44 lees ons: “Wie in My glo, glo nie net in My nie maar ook in Hom wat My gestuur het. ⁴⁵En wie My sien, sien ook Hom wat My gestuur het. ⁴⁶Ek het as die lig na die wêreld toe gekom, sodat dié wat in My glo, nie in die duisternis sou bly nie. ⁴⁷En as iemand na my woorde luister en hom nie daaraan steur nie, veroordeel Ek hom nie, want Ek het nie gekom om die wêreld te veroordeel nie, maar om die wêreld te red. ⁴⁸Wie My verwerp en nie my woorde aanneem nie, het reeds iets wat hom veroordeel: die woorde wat Ek gespreek het, sal hom op die laaste dag veroordeel. ⁴⁹Ek het nie uit my eie gepraat nie, maar juis die Vader wat My gestuur het, het My opgedra wat Ek moet sê en wat Ek moet praat. ⁵⁰En Ek weet dat sy opdrag die ewige lewe beteken. Wat Ek sê, sê Ek presies net soos die Vader dit vir My gesê het.”

 

Die rol van Jesus is dus dat hy niks anders is nie as ʼn beeld van God – diegene wat Hom sien, sien die Vader. Uiteindelik is die rol van Jesus om die hart en wil van God aan mense te openbaar (Joh 1:18). Johannes het egter mooi beelde aangewend om te wys wie Jesus is. Ons noem dit die sogenaamde 7 “Ek is” uitsprake. Uit die “Ek is” uitsprake kan mens dan ook die rol van Jesus aflei:

 

Jesus is die brood van die lewe (Joh 6:35) – “Ek is die brood wat lewe gee. Wie na My toe kom, sal nooit weer honger kry nie, en wie in My glo, sal nooit weer dors kry nie.”

Jesus is die lig vir die wêreld (Joh 8:12; 9:5) – “Ek is die lig vir die wêreld Wie My volg, sal nooit in die duisternis lewe nie, maar sal die lig hê wat lewe gee.”

Jesus is die (enigste) ingang (Joh 10:7-8) – “Dit verseker Ek julle: Ek is die ingang vir die skape. ⁸Almal wat voor My gekom het, is diewe en rowers; maar die skape het nie na hulle geluister nie. ⁹Ek is die ingang; as iemand deur My ingaan, sal hy gered word.

Jesus is die goeie herder (Joh 10:11)  “Ek is die goeie herder. Die goeie herder lê sy lewe af vir die skape.”

Jesus is die opstanding en die lewe (Joh 11:25) “Ek is die opstanding en die lewe. Wie in My glo, sal lewe, al sterwe hy ook; ²⁶en elkeen wat lewe en in My glo, sal in alle ewigheid nooit sterwe nie.

Jesus is die weg, die waarheid en die lewe (Joh 14:6)- “Ek is die weg en die waarheid en die lewe. Niemand kom na die Vader toe behalwe deur My nie. ⁷As julle My ken, sal julle my Vader ook ken.

Jesus is die ware wingerdstok (Joh 15:1, 5) –  “Ek is die ware wingerdstok en my Vader is die boer. Elke loot aan My wat nie vrugte dra nie, sny Hy af; maar elkeen wat vrugte dra, snoei Hy reg, sodat dit nog meer vrugte kan dra. ³Julle is alreeds reg gesnoei deur die woorde wat Ek vir julle gesê het. ⁴Julle moet in My bly en Ek in julle. ‘n Loot kan nie uit sy eie vrugte dra as hy nie aan die wingerdstok bly nie; en so julle ook nie as julle nie in My bly nie.⁵“Ek is die wingerdstok, julle die lote. Wie in My bly en Ek in hom, dra baie vrugte, want sonder My kan julle niks doen nie. ⁶As iemand nie in My bly nie, word hy weggegooi soos ‘n loot en hy verdroog. Die mense maak sulke lote bymekaar en gooi dit in die vuur, en dit verbrand. ⁷As julle in My bly en my woorde in julle, vra dan net wat julle wil hê, en julle sal dit kry. ⁸My Vader word juis daardeur verheerlik dat julle baie vrugte dra en my dissipels is.”

 

Op aarde was Jesus die verteenwoordiger, die beeld van God wat met mense gepraat het en hulle vertel het van God se koninkryk en wat hulle gewys het hoe om ʼn lewe te leef wat God eer. Maar daar sou ook ʼn tyd kom dat Hy moes sterf, moes opstaan en dan weer terug gaan na die huis van sy Vader. In Johannes 13, nadat Jesus sy dissipels se voete gewas het, se hy vir hulle: “³My kinders, Ek is nog net ‘n klein rukkie by julle. Dan sal julle My soek, en soos Ek vir die Jode gesê het, sê Ek nou vir julle ook: Waar Ek heen gaan, kan julle nie kom nie.” Maar kort daarna, in Johannes 14, verduidelik Jesus vir hulle iets verder rondom sy rol: “Julle moet nie ontsteld wees nie. Glo in God; glo ook in My. ²In die huis van my Vader is daar baie woonplek. As dit nie so was nie, sou Ek nie vir julle gesê het Ek gaan om vir julle plek gereed te maak nie. ³En as Ek gegaan het en vir julle plek gereed gemaak het, kom Ek terug en sal julle na My toe neem, sodat julle ook kan wees waar Ek is.” Ons wat Johannes lees, weet dat Jesus hier verwys na sy dood aan die kruis wat binnekort sou plaasvind en na sy hemelvaart, waarna hy nie meer by hulle sal wees nie. Die dissipels in Johannes het dit nog nie verstaan nie. Hulle sou dit eers na die opstanding en hemelvaart regtig verstaan (Kyk Joh 2:22).

Die rol van die Heilige Gees – die een wat ons lei as Jesus nie meer op aarde is nie

Nadat Jesus vir die dissipels in Johannes 14:15-31 gesê  het dat hy binnekort weggaan en nie meer by hulle gaan wees nie, troos hy hulle met ʼn boodskap waarin hy die koms van die Heilige Gees voorspel. Johannes 14:15 en verder lui:

¹⁵“As julle My liefhet, sal julle my opdragte uitvoer. ¹⁶Ek sal die Vader vra, en Hy sal vir julle ‘n ander Voorspraak stuur om vir ewig by julle te wees, ¹⁷naamlik die Gees van die waarheid. Die wêreld kan Hom nie ontvang nie, omdat hulle Hom nie sien en Hom nie ken nie. Maar julle ken Hom, omdat Hy by julle bly en in julle sal wees.

¹⁸“Ek sal julle nie as weeskinders agterlaat nie; Ek kom weer na julle toe. ¹⁹Nog net ‘n klein rukkie, en dan sien die wêreld My nie meer nie, maar julle sien My, omdat Ek lewe en julle sal lewe. ²⁰Daardie dag sal julle weet dat ek in my Vader is en julle in My en Ek in julle.

²¹“Wie my opdragte het en dit uitvoer-dit is hy wat My liefhet. En wie My liefhet, hóm sal my Vader liefhê, en Ek sal hom ook liefhê en My aan hom openbaar.”

²²Judas, nie Judas Iskariot nie, vra toe vir Hom: “Here, hoe kom dit dat U U aan ons gaan openbaar en nie aan die wêreld nie?”

²³Jesus antwoord hom: “As iemand My liefhet, sal hy my woorde ter harte neem; en my Vader sal hom liefhê, en Ons sal na hom toe kom en by hom woon. ²⁴Wie My nie liefhet nie, neem my woorde nie ter harte nie; en die woorde wat julle hoor, is nie Myne nie, maar die Vader s’n wat My gestuur het.

²⁵“Dit sê Ek vir julle terwyl Ek nog by julle bly; ²⁶en wanneer die Vader in my Naam die Voorspraak, die Heilige Gees, stuur, sal Hy julle alles leer en julle herinner aan alles wat Ek vir julle gesê het.

 

Die rol van gelowiges as verteenwoordigers van Jesus

Dit is baie interessant om daarop te let dat Jesus, as verteenwoordiger van God, die een wat gestuur is deur die groot Koning om ʼn radikale verskil te maak op aarde, ook van my en jou verwag om net soos hy gestuurdes in die wêreld te wees. Die Heilige Gees is immers die een wat ons lei en die een wat ons toerus, soos ons dit dikwels by Paulus ook hoor (Kyk Gal 3:5). In Johannes 20:21 sê die verrese Jesus duidelik: “Soos die Vader My gestuur het, stuur Ek julle ook.” Net daarna, ʼn vers later, blaas Jesus dan oor die dissipels en hulle ontvang die Heilige Gees. Die ontvangs van die Heilige Gees en die Sending van die dissipels na die wêreld vind in dieselfde asem plaas. Dit is ook die geval in Handelinge as die dissipels in Handelinge 2 die Gees ontvang en kort daarna as gestuurdes die evangelie begin verkondig. Net so eindig Jesus se rol nie – inteendeel – dit vloei oor in die harte van die kinders van die Koning – hulle wat doen wat hulle Meester sê en leef wat hulle glo!

 

Outeur: Dr Kobus Kok