We are saved by faith alone, but not by a faith that is alone –  Martin Luther

Kan ek my integriteit verdiep?

‘n Paar jaar gelede het James Patterson en Peter Kim (The Day America told the Truth) die vraag gevra: Wat is jy bereid om vir $10 miljoen te doen? Die antwoorde was skokkend:

• Ek is bereid om my hele gesin net so te los – 25%
• Ek is bereid om my kerk te los – 25%
• Ek is bereid om vir een week ‘n prostituut te word – 23%
• Ek is bereid om my Amerikaanse burgerskap prys te gee – 16%
• Ek is bereid om my man/vrou te verlaat – 16%
• Ek is bereid om vals getuienis af te lê sodat ‘n moordenaar kan loskom – 10%
• Ek is bereid om my kinders vir aanneming te gee – 3%

Ontstellend. Sal so ‘n opname in Suid-Afrika beduidend ander resultate gee? Ek is nie so seker nie.

 Daniël en sy drie vriende wys vir ons hoe ons ons integriteit kan verdiep in ‘n wêreld wat oënskynlik integriteit ontmoedig.

• Wees bereid om moeilike keuses te maak. Daniël moes by verskeie geleenthede moeilike keuses maak. Sommer net na hulle aankoms in Babilon vra hulle die hoofpaleisbeampte  vir vergunning om nie die koning se wyn en kos te eet nie. Hulle weier om die beeld van die koning te aanbid. In beide gevalle was die doodsvonnis ‘n besliste moontlikheid.
• Hanteer jou teenstanders met respek. Toe koning Nebukadnesar bevel gee dat sy sterrekykers doodgemaak moes word omdat hulle nie sy droom kon uitlê nie, pleit Daniël met takt en wysheid by die koning. Sy optrede verhoed dat die sterrekykers tereggestel word.
• Bou jou morele kompas om God. Jesus het sy toewyding aan God behou ten spyte daarvan dat hy in ‘n heidense wêreld geleef het.
• Wees vasberade in die klein dingetjies. Die koning vereis dat geen ander gode aanbid mag word nie – net hy. Enigeen wat weier sou doodgemaak word. Daniël het elke dag drie maal gebid. Hy kon dit maklik vir 30 dae onderbreek het, maar hy doen dit nie.
• Besef dat mense wat met integriteit leef of beter of bitter sal word. Van die sleutel amptenare het vir Daniël gerespekteer en ondersteun toe hulle sien dat hy met integriteit optree.  Terselfdertyd was daar ander wat jaloers was op hom – sy integriteit het hulle afgestoot.

Integriteit is die gevolg van baie jare  se goeie en goddelike keuses. Watter keuses maak ek en jy wat ons integriteit sal verdiep?

Blog32e

“Give me one hundred preachers who fear nothing but sin and desire nothing but God, and I care not whether they be clergymen or laymen, they alone will shake the gates of Hell and set up the kingdom of Heaven upon Earth.” ~ John Wesley

Nehemia – Integriteit (2)

Daar is al heelwat boeke oor Nehemia as leier geskryf. Nou het nog ‘n nuwe boek verskyn: Leader after God’s own Heart deur Jim George (2012). Kom ons kyk na sekere aspekte van Nehemia se leierskap.

Kenmerk #14:  Integriteit … bekragtig jou leierskap

Kom ons kyk na Nehemia. Nehemia se tyd in Juda was ‘n liefdesdiens vir sy mense. Dit was sy bekommernis oor die welstand van sy mense wat hom na Jerusalem  toe getrek het.

Hy dien nie as goewerneur omdat hy ‘n goeie inkomste kry nie – die bou van die muur en die welstand van sy mense was sy hoogste prioriteit – nie sy persoonlike belange en gemak nie. Hy stel ‘n voorbeeld vir sy mense. Hoe lyk so ‘n persoon?

• Hy is onselfsugtig – hy maak nie aanspraak op sy goewerneurstoelae nie (5:14). Natuurlik was Nehemia as gevolg van sy werk in die paleis nie arm nie, maar hy begeer nie om sy eie rykdom ten koste van ander uit te brei nie.
• Hy is sensitief – hy was lank in die openbare diens – hy ken magsmisbruik. Maar hy is sensitief vir die behoeftes van ander. Die vroeëre goewerneurs, almal voor my, het swaar eise aan die volk gestel. Hulle het behalwe brood en wyn elke dag ook nog vier honderd en sestig gram silwer geëis. Hulle amptenare het ook baas gespeel oor die volk. Ek het nie so gemaak nie, uit eerbied vir God (5:15).
• Hy was ‘n dienaar. Hy het gesag oor die mense gehad – hy was die goewerneur. Maar hy en sy amptenare werk langs die burgers op die muur. ‘n Dienaar dien – hy maak nie sy sakke vol ten koste van ander nie. Ek het my volle gewig ingegooi by die werk aan hierdie muur, ek het nie lande gekoop nie, en al my werkers was hier by die werk saamgetrek (5:17).
• Hy het opgeoffer – geen spesiale voorregte nie al was hy die goewerneur. Elke dag voed hy 150 mense  uit sy eie sak: Daar moes elke dag ‘n bees, ses slagskape en ‘n klomp voëls vir my gaargemaak word, en om die tien dae moes daar ‘n groot hoeveelheid wyn vir die menigte kom (5:17 – 18). Tog eis hy nie sy toelae nie.
• Hy soek net die goeie – net die lof van God – nie dié van mense nie. Hy bid dat God die goed wat hy gedoen het, sal onthou. Onthou tog, my God, tot my voordeel, alles wat ek vir hierdie volk gedoen het (5:19).

Integriteit is ‘n hartsaak:Die goeie mens bring die goeie te voorskyn uit die oorvloed goeie dinge in sy hart, en die slegte mens bring die slegte te voorskyn uit die oorvloed slegte dinge. Waar die hart van vol is, loop die mond van oor (Lukas 6:45). Jy is of ‘n man van integriteit of jy is nie – geen middeweg nie. Hoe kan ek met integriteit leef?

Stap #1: Besef die waarde van integriteit. Integriteit definieer wie jy as leier is; dit rig jou optrede; dit laat jou langs die regte pad – God se pad – loop.

Stap #2: Kies en gebruik die waarhede van die Skrif as die standaard van jou integriteit.

Stap #3: Ondersoek jou hart. Net God kan vir jou ‘n korrekte lesing oor die toestand van jou hart gee: Die hart is bedriegliker as enigiets anders, hy is ongeneeslik; wie kan hom verstaan? (Jeremia 17:9). Daarom moet ons soos die psalmis uitroep: Toets my, Here, keur my, ondersoek my deur en deur. Ek laat my deur u liefde lei en ek lewe deur u trou (26:2 – 3).

Stap #4: Evalueer jou daaglikse besluite. Kyk na elke besluit en beoordeel dit op grond van die waarhede in die Skrif. Soos Dawid moet ons bid: Mag wat ek sê en wat ek dink tog vir U aanneemlik wees, Here, my Rots en my Verlosser (Psalm 19:15).

Integriteit moet die kern van ons wese wees. Ons moet ons harte vir God open sodat Hy ons deur sy woord kan vorm. Onthou: Integriteit word nie aan ons gegee nie – dit is die gevolg van die meedoënlose najaag van eerlikheid te alle tye.

Hiermee kom ons aan die einde van hierdie reeks oor Nehemia en leierskap.

 “If Jesus preached the same message ministers preach today, He would have never been crucified.” ~ Leonard Ravenhill

.

Nehemia – Integriteit (1)

Daar is al heelwat boeke oor Nehemia as leier geskryf. Nou het nog ‘n nuwe boek verskyn: Leader after God’s own Heart deur Jim George (2012). Kom ons kyk na sekere aspekte van Nehemia se leierskap.

Kenmerk #14:  Integriteit … bekragtig jou leierskap

Van die dag af dat ek aangestel is as goewerneur in Juda … twaalf jaar lank, het ek en my medeamptenare nie aanspraak gemaak op die goewerneurstoelae nie … Nogtans het ek nie die goewerneurstoelae geëis nie, want die werk was alreeds ‘n swaar las op hierdie volk (5:14, 18).

Maar die vooraanstaande burgers se optrede het radikaal van dié van Nehemia s’n verskil: Sekere mense en hulle vrouens het ‘n ernstige klag teen hulle Judese volksgenote ingebring (5:1). Hierdie ryk mense het die armes uitgebuit deur buitensporige rente te vra.

Kouzes en Posner bevind dat daar veral drie kenmerke is wat volgelinge in hulle leiers soek. Integriteit staan bo aan die lys gevolg deur bekwaamheid en leierskap. Integriteit beteken betroubaar, waar en mense met oortuigings; dit beteken ‘n vasklou aan ‘n streng morele en etiese kode. Jy kan ‘n persoon met integriteit vertrou – hy sal die regte dinge vir die regte redes doen al kyk niemand nie.

Aard van integriteit

Wat doen integriteit?

• Die dwing morele oortuigings af. So ‘n persoon kies eerlikheid eerder as bedrog, regverdigheid eerder as ongeregtigheid en ‘n gewilligheid om reëls en regulasies na te kom – al ignoreer ander dit.
• Integriteit beskerm homself. Integriteit besef dat hy hard vir sy standaarde moes veg en dat een onbesonne daad dit kan vernietig. Een verkeerde optrede vernietig jare se vertroue. Daarom moet ‘n leier hom doelbewus met aanspreeklikheid omring, want selfs die beste leier het swakpunte.
• Integriteit skep ‘n waardesisteem. Alles word meer relatief. Die situasie bepaal ons etiek. Mense met integriteit het ‘n stel waardes wat vas, onbeweegbaar is. Iets is of reg of verkeerd. Leiers moet God se standaarde navolg. Daarom moet leiers ‘n werkomgewing skep wat op regverdige en morele etiese standaarde berus.
• Integriteit help jou met die moeilike besluite. Integriteit vereis moed; dit kies die hoë morele grond. Dit verstaan die gevolge van die verkeerde besluite. Daarom dink dit goed na voor ‘n besluit geneem word. Kompromieë is maklik – jy val maar net in by ‘n lae standaard.
• Integriteit weerstaan trots. Een van die gevare van leierskap is trots. Al die aandag mag beteken dat jy meer van jouself dink as wat geregverdig is. Trots is selfsugtig; integriteit is onselfsugtig. Die Here het ‘n afsku van ‘n verwaande mens; dit staan vas: so ‘n mens sal nie ongestraf bly nie (Spreuke 16:5).
• Integriteit trek mense na ‘n hoër standaard. Mense funksioneer beter as hulle deel is van iets wat in vasgestelde reëls geanker is. Hulle weet altyd waar hulle staan. Integriteit trek mense na so ‘n struktuur; dit bevorder ‘n hoër vlak van gedrag. ‘n Leier met integriteit dien as model.

Volgende keer kyk ons vir oulaas na integriteit.