Gelowiges moet spesialis spoorsnyers word – Kobus Kok

Vandag het Prof Nelus Niemandt by ‘n ontmoeting ‘n belangrike punt gemaak. In ons tyd, volgens Niemandt, word ons oorspoel met inligting of data oorstroming. Vir hierdie rede is onderskeiding een van die belangrikste vaardighede wat gelowiges in Millennium drie kort. Ons leef in ‘n wêreld van kodes, tekens en metafore.

Sit jy jou selfoon aan, dan sleutel jy jou kode in. Maak jy oorplasings op die internet, dan sleutel jy jou geheime kodes in. Ons wêreld is vol tekens wat gekodeer moet word. Katastrofiese gevolge kan volg indien ons ‘n gebrek aan kodering het. Dit was ook die geval in die tyd van Jesus. Ons sien dikwels hoe die Bybel vir ons prentjies skets van mense wat die spoor gemis het, of wat nie die tekens van die tyd reg kon lees nie. Dink maar aan Johannes 10 waar Jesus in beelde of metafore met sy gehoor praat. Jesus sê dat hy die goeie herder is, en die ingang van die kraal. Niemand kan na die Vader gaan as dit nie in en deur Jesus gebeur nie.Tog staan daar in die teks dat al het Jesus in beelde en metafore met hulle gepraat, het die wat na hom geluister het nie verstaan nie. Hulle kon nie die spoor lees nie. Hulle het nie die semiotiek of tekens van die tyd reg gelees nie. Dieselfde gebeur met Thomas in Johannes 20. Nadat Jesus uit die dood opgestaan het, het Jesus aan ʼn paar van sy volgelinge verskyn. Hulle het vir die res vertel dat hulle vir Jesus gesien het. Thomas het nie geglo nie. Hy het gesê dat hy definitief nie sal glo nie, alvorens hy fisies sy hande in Jesus se wonde steek. Ongelowige Thomas kon aanvanklik nie die geestelike spore sny nie. Hy kon nie die boodskap kodeer nie. Dieselfde gebeur met die Emmaus-gangers. Hulle wandel saam met Jesus op die pad, maar kon nie die geestelike spore sny nie. Die ryk jongman slaag ook nie daarin om die spoor te sny of die tekens van die tyd reg te lees of raak te sien nie.

Tog is dit telkens die blindes en die onrein siekes wat wel raaksien en die tekens reg lees. In Johannes 10 is daar ʼn duidelike boodskap. Die wat die stem van die Herder hoor en die tekens reg lees, is die wat na groen weivelde geneem word en lewe in oorvloed kan beleef (Joh 10:10). Diegene wat by die hek ingaan, is die wat geslaag het om reg te onderskei.

Nelus Niemandt vertel van die bekende Karl Barth wat eendag in ʼn tram in Basel ry. Langs hom was daar ʼn student. Barth het die student vriendelik gegroet en agter gekom dat die persoon ʼn besoeker in Basel was. Barth vra toe vir hom wat hy in Basel doen. Die jong man sê toe dat hy en sy vriendin die bekende Karl Barth se Universiteit wil besoek. “Ken u vir Karl Barth?”, vra die student. “Ja”, sê Barth, “Ek het vanoggend sy hare geskeer en gekam”, sê Barth. By die busstop by die Universiteit klim hulle uit, en die jong student se vriendin wag toe ook by die busstop. Die jong man stel toe sy vriendin voor aan die ouer man wat hy pas ontmoet het. “Jy sal nie glo wie dit is nie!” Hierdie man is Karl Barth se barbier!”.

Dit is die gevaar as mens die tekens van die tyd of die semiotiek verkeerd lees. My en jou uitdaging is dat ons opgeskerp moet word om die geestelike tekens van die tyd reg te lees en die semiotiek te dekodeer.

Skrywer: Prof Kobus Kok

“Bad men need nothing more to compass their ends, than that good men should look on and do nothing.” – John Stuart Mills

Jesus verlaat die hemel om vir ons te sterwe

‘n Engel kom by Maria en sê vir haar dat sy geboorte aan die Messias sal gee. Wat was Maria se reaksie? Onthou sy het nog nie vir Jesus ontmoet nie – Hy was nog nie gebore nie. Sy kry ‘n wonderlike boodskap wat beskryf  wie Jesus is en wat Hy sal doen. Sy reageer op ‘n wonderlike manier. In haar voorbeeld kry ons insigte in hoe ons moet reageer oor al die dinge wat ons aangaande Jesus gehoor het. Daarvoor gaan ons na Lukas 1:26 – 45 kyk.

Wat sê die engel vir ons aangaande Jesus? Hy sal groot wees en die Seun van die Allerhoogste genoem word. Dit beteken dat Jesus baie meer is as net ‘n volgeling van God. Die engel sê verder: En Hy sal as koning oor die nageslag van Jakob heers tot in ewigheid. Tot in ewigheid? Die engel weet dat Maria nie weet wat om te glo nie, en daarom herhaal hy dit net op ‘n ander manier: Aan sy koningskap sal daar geen einde wees nie.

Die engel gaan nou verder met sy aankondiging aan Maria:

• Die Heilige Gees sal oor jou kom, en die krag van die Allerhoogste sal die lewe in jou wek. Daarom sal die een wat gebore word, heilig genoem word, die Seun van God. God se goddelike natuur sal in hierdie kindjie ingeplant word. Hy sal heilig en sonder sonde vir altyd lewe. God word mens toe sy Seun die menslike natuur aanvaar en fisies in hierdie wêreld gebore word.
• Jy moet Hom die naam Jesus gee. Jesus beteken God wat red. In sy Naam sien ons die uniekheid van die Christelike geloof – daar is ‘n groot waarheid in sy Naam ingebind. Elisabet sê vir Maria: Gelukkig is sy wat glo dat in vervulling sal gaan wat die Here vir haar gesê het!  Hy wat gebore gaan word, is die Here.

Hierdie moes sekerlik ‘n skok vir Maria gewees het – beide sosiaal en teologies. Maria was waarskynlik ongeveer 14 jaar oud op hierdie stadium. Hulle was arm. Toe hulle Jesus bring om besny te word, kon hulle slegs twee duiwe offer. Hulle sou haar ook sosiaal verwerp het omdat sy swanger was. Hierdie jong, arm, onteerde swanger, ongetroude, plattelandse meisie beklee vandag ‘n besondere plek in die geskiedenis. Hoekom? Oor die manier waarop sy op God en sy boodskap gereageer het.

• Sy dink – sy gebruik haar rede

Sy was verwonderd oor die woorde en het gewonder wat die begroeting tog kon beteken.  Wat beteken dit alles? Maria besin oor hoe alles gaan uitwerk. Sy sukkel om te verstaan. Ons moet onthou dat sy Joods was. ‘n Boodskap van ‘n mens wat Goddelik sal wees, sal sy, en die ander Jode, nie kon verstaan nie. Dit was vir haar net so moeilik om die boodskap te verstaan as wat dit vandag nog vir ons moeilik is.

• Sy spreek haar twyfel openlik uit

Hoe is so iets moontlik? Sy spreek haar twyfel openlik teenoor ‘n engel uit. Sy is eerlik oor haar onsekerhede en vrae. Sy is nederig, maar as jy eerlik twyfel is jy oop vir oortuiging. As Maria nie gevra het nie, sou die engel nooit een van die grootste waarhede gesê het nie: Niks is vir God onmoontlik nie.

• Maria gee haarself volledig oor

Ek is tot beskikking van die Here. Laat met my gebeur wat u gesê het. Ons wil altyd oor die koste van dissipelskap onderhandel; ons wil self besluit oor watter dinge ons bereid is om op te gee. Ons kan nie vooraf alles weet wat God van ons gaan vra nie. Daarom vereis dit moed en gewilligheid om sy wil te doen. Maria doen afstand van haar reg om self te besluit. Ons moet die Here onvoorwaardelik gehoorsaam en beheer van ons lewens aan Hom oorgee.

• Sy bespreek alles met Elisabet

Ons lees dat Elisabet met die Heilige Gees vervul is. Sy help Maria om te verstaan dat sy die moeder van die Here is. Dit moes gehelp het, want net daarna bars Maria in ‘n loflied uit – die bekende Magnificat: Ek besing die grootheid van die Here, ek juig oor God, my Verlosser. Maria verstaan eers werklik nadat sy met ‘n medegelowige gepraat en saam aanbid het.

Legio – Francois Malan

Jan vra:

Antwoord

Prof. Francois Malan antwoord:

Oënskynlik het die duiwels met hulle versoek om in die varke in te vaar vir Jesus uitoorlê. Die mense van die streek sien hulle verlies aan varke en hulle vrees die ongekende en geweldige gesag van Jesus wat die duiwels uit die man verdryf het. Hulle almal van die hele gebied vra dat Hy van hulle af weggaan.

Maar Jesus laat ‘n getuie agter wat, die deur hele dorp gaan vertel wat Jesus vir hom gedoen het. Volgens Markus 5:20 gaan hy selfs verder, deur die hele gebied van Dekapolis, die tien Griekse stede Oos van die Jordaan. Toe Jesus weer in die gebied van Dekapolis kom, bring die mense ‘n doofstomme na Jesus om te genees (Markus 7:31-32), en Jesus voed ‘n skare van omtrent 4,000 mense wat na Hom kom luister (Markus 8:1-9).

Volgens Matteus 8:29 was die duiwels bang dat die Here hulle voor die tyd sou pynig. Daarom hulle versoek om in die varke te vaar. Hulle vrees was dat hulle voor die eindoordeel reeds in die hel gewerp sal word, wat God vir hulle berei het (vgl. Mat. 25:41).

Die duiwels het nog steeds in die gebied gewerk (vgl. hulle versoek aan Jesus in Markus 5:10 dat Hy hulle nie uit die landstreek moet wegstuur nie), maar met Jesus se optrede en die getuienis van sy verteenwoordiger, is die mag van die duiwels beperk. Lk 8:36 sê die man is genees. Die Griekse woord soozoo word ook gebruik vir ‘gered.’ Hy was nie slegs van die duiwels genees nie, maar het ‘n volgeling van Jesus geword, wat gesmeek het om by Jesus te bly, en toe Jesus se eerste sendeling in hierdie heidense landstreek geword het, deur wie Jesus onder die mense gewerk het.

Prof Francois Malan

Die verlamde man in Markus 2 – Francois Malan

Jan vra:

In Markus 2 laat die verlamde man se vriende hom met bed en al deur die dak om hom by Jesus te kry. Jesus prys hulle geloof en sê vir die man jou sondes is vergewe. Dan vra die skrifgeleerdes waar Hy die mag kry om sondes te vergewe. Hy antwoord: Wat is makliker om te sê: Die sondes is vergewe of om te sê: Staan op neem jou bed op en loop. Ek verstaan nie mooi die verband in Jesus se argument nie.

Antwoord

Prof. Francois Malan antwoord:

Vir die skrifgeleerdes is die opdrag om op te staan en te loop die swaarste, want dit sou ‘n wonder wees wat deur almal gesien kan word as bewys daarvan. Om te sê ‘jou sonde is vergewe’ is die maklikste, want niemand kan sien of dit wel die geval is nie, en hulle is oortuig dat net God sonde kan vergewe, daarom meen hulle dat Jesus, wat vir hulle bloot ‘n mens is, godslasterlik praat deur die gesag van God vir hom toe te eien (Mk 2:7).

Vir Jesus is sondevergifnis die moeilikste, want daarvoor moes Hy sy goddelike heerlikheid verlaat en mens word (vgl. Seun van die mens), en moet Hy aan ‘n kruis gaan sterf en deur God verlaat word. Terwyl die genesing van ‘n verlamde vir die Seun van God die maklikste is met die volmag wat Hy het om te genees as bewys van sy volmag om sonde te vergewe (Mk 2:10).

God vergewe in Christus. Jesus se woord hang onlosmaaklik saam met sy lewe en sterwe en opstanding. Jesus kan vergewe omdat Hy as die Messias/Christus/Gesalfde ook die lydende en sterwende Kneg van die Here is. Die Seun van die mens het gekom om te dien en sy lewe te gee as ‘n losprys vir baie mense (Mk 10:45). Sy vergewing geskied nie sonder sy sterwe nie.

Skrywer: Prof Francois Malan