Vraag
Jan vra:
Op verskeie plekke lees mens dat persone hulle klere geskeur het as hulle slegte nuus ontvang het of as die Here deur ‘n profeet met konings praat. Waaruit stam die gewoonte? Sê nou maar die material was te sterk om te skeur wat het dan gebeur?

Antwoord
Prof Herrie van Rooy antwoord:

Die gebruik kom dikwels voor en was ‘n teken van rou, saam met die aantrek van sakkleed en stof op die hoof. Nerens in die Ou Testament word die gelowiges beveel om dit te doen nie. Dit was waarskynlik deel van ‘n algemene gebruik in die Ou Nabye Ooste. Sekere heidense rougebruike word egter eksplisiet verbied, Dit is bv om die hare af te skeer of om jou eie liggaam te sny of te skend (Lev 19:27, 28; Deut 14:1).

Ek weet nie of die klere te sterk was om te skeur, maar hulle sou seker ‘n mes kon gebruik. Ek sien nie dat die Ou Testament erens iets daaroor sê nie. Lyk of dit bloot aanvaar word dat die klere kon skeur.

Skrywer:  Prof Herrie van Rooy

Jesus se klere – Francois Malan

Jan vra:
Na aanleiding van die artikel oor die verdeling van Jesus se klere wonder ek net in hoe mate dit van die bloed besmeer was dat mense dit nog sou wou gehad het of was daar dalk ‘n ander reëling in werking? Ek wonder net.

Antwoord
Prof. Francois Malan antwoord:
Daar was sekerlik bloed aan sy klere, nadat Jesus op sy kaal bolyf met die kats gegésel is (Mt 27:26; Mk 15:15), en toe ‘n pers soldatemantel daaroor aangetrek het om Hom te bespot, en eers daarna sy eie klere aangetrek het vir die tog na Getsemane (Mt 27:28-31; Mk 15:16-20).

Die soldate was so gretig om dit te kry dat hulle lootjies getrek het om dit aan een toe te ken en nie in vier stukke geskeur word vir elke soldaat ‘n stukkie nie.

Daarmee het hulle onwetend die Skrif vervul; Ps 22:18 handel oor ‘n sieke wat ly, en ‘n bende misdadigers behandel hom asof hy reeds dood is, deur sy klere uit te trek. Maar aan die einde sterf hy nie. Sy nood en vervolging en eensaamheid, wat in Ps 22 uitgespel word, word in die Nuwe Testament op ‘n paar plekke toegepas op Jesus, wat sy heerlikheid vrywillig neergelê het, en Homself oorgegee het aan lyding, die uittrek van al sy klere, en in die dood, ter wille van ons sonde. Maar Hy bly onder die beskerming van God, wat duisternis oor die aarde stuur om Hom te bedek, en Hom op die derde dag opwek uit die dood.

Skrywer: Prof Francois Malan

Moonbags – Jan van der Watt

“Moonbags” is nie ‘n moderne uitvindsel nie. Destyds het mans ‘n onderkleed gedra, wat soos ‘n rok was. As “gordel” (of belt) is gewoonlik ‘n breë lapband gedra. Die “rok” is dan om die middellyf met die “gordel” vasgebind. Die gordel het egter ander funksies gehad as net om die rok netjies om die middellyf te hou.

Dit was soos “outydse moonbags”. In die lapband om die lyf is baie dinge weggesteek (bv. jou geldsakkie of beursie, ‘n mes, ens. – die goed wat ons vandag in ons sakkie dra). Verder is daar ook dinge aan die lapband vasgemaak, soos jou “sakkie met padkos” in. Gordels was dus ‘n handige en onontbeerlike deel van die antieke klerekas gewees.

Skrywer: Prof Jan van der Watt