Laat sy Liefde jou Lei: Die liefde dink anders. – Milanie Vosloo

Die liefde dink ánders

Vra wat die Here van julle wil hê terwyl dit nog moontlik is. Bid tot die Here noudat Hy naby is. Jesaja 55:6

Ons almal wil graag betekenisvol leef. Dit laat ons tog immers goed voel om te weet ons leef ons talente en gawes uit en maak deur ons menswees iewers ’n verskil. Om ’n sinvol te leef heg mos iets aan ons selfwaarde en dra by tot ons selfvervulling.

Ons Vader het ook bedoel dat ons só sal leef dat ons sinvolheid sal beleef. Dis deel van die optimale vreugdes wat Hy aan sy menslike skepsels geskenk het.

Leef jy betekenisvol? Kan jy met oortuiging sê dat jy iewers en aan iemand ’n verskil maak. Voel jy goed oor dit wat jy doen en is. Of wonder jy soms daaroor.

Die feit is: jou Vader – die Een wat elke detail van jou lewe gemaak het – ken jou soos die palm van sy hand. Hy het die bestanddele van jou lewe noukeurig uitgesoek en Hy weet presies wat die resep van jou lewe behoort te wees. Daarom is Hy by uitstek die Een wat ook aan jou kan wys hoe en waar jy betekenisvol kan leef. Hy ken meer as jou verwagtinge, Hy weet die detail van jou drome. Selfs daardie drome wat vaag is of dié wat jy al lankal weggepak het omdat ander dinge jou lewe opeis of omdat jy iewers langs die pad vertroue in jouself verloor het.

Kniel vandag voor jou Meester en vra Hom: Here, wat behoort ek te doen om (weer) betekenisvol te wees? Bly op jou knieë tot Hy jou antwoord!

Here, waar pas ek in in die sin van die lewe?

Bybelkennis gaan gereeld gedeeltes uit Milanie Vosloo se boek: Laat sy Liefde jou Lei, publiseer. Ons dank aan Milanie Vosloo en CUM vir hierdie vergunning.

Vir meer inligting oor CUM, besoek gerus hulle webblad by www.cumuitgewers.co.za

Skrywer:  Milanie Vosloo

Laat sy Liefde jou Lei: Voed jou liefdesemense – Milanie Vosloo

Drie van Job se vriende … het gehoor van die tragedies wat Job getref nie. Toe het hulle mekaar ontmoet en saam na Job gekom om hom te kom bemoedig. Job 2:11

Daar is net een manier om verhoudings te bou en dit is om voortdurend positiewe liefdesenergie daarin te sit!  Slegs wanneer ons gereelde liefdesdeposito’s in ander se harte maak, sal daardie verhouding bly floreer en dividende oplewer. As jy dalk deur ‘n fase gaan waar jy weet dat jy jou liefdesmense afskeep het, moet jy dalk weer vir jouself sê:

• Ek wíl gesonde en goeie verhoudings hê. Dis immers die hartsvitamienes wat my energie vir die lewe gee.
• Ek gaan nie toelaat dat griewe in die teelaarde van my verbeelding floreer nie. Ek gaan elke stukkie vooroordeel, wrokkigheid en onvergewensgesindheid met wortel en tak uit my hart uitroei.
• Ek gaan tyd maak om rus by my Vader te vind sodat Hy aan my die vrede en liefde kan gee wat ek nodig het om goeie verhoudings te handhaaf.
• Ek gaan ophou om so op myself gefokus te wees en myself te bejammer. Veel eerder gaan ek my hart instel op ander se belange en iets van myself vir hulle gee.
• Ek gaan met groter begrip, meer deernis en ‘n ruimer hart die mense om my aanvaar, erken en liefhê.

Maak die Gees jou vennoot in die handhawing van suksesvolle verhoudings. Hy sal jou graag wys watter positiewe deposito’s jou mense nodig het.

Vader, wys my die pad na ander se harte asseblief. 

Bybelkennis gaan gereeld gedeeltes uit Milanie Vosloo se boek: Laat sy Liefde jou Lei, publiseer. Ons dank aan Milanie Vosloo en CUM vir hierdie vergunning.

Vir meer inligting oor CUM, besoek gerus hulle webblad by www.cumuitgewers.co.za

Skrywer: Milanie Vosloo

Laat sy Liefde jou Lei: Koester jou vriendskappe – Milanie Vosloo

Vriende kan mekaar verwoes. Daar kan ook ‘n vriend wees vir wie jy liewer is as vir jou eie broer. Spreuke 18:24

Navorsing het bewys dat vroue ‘n sekere goedvoel-hormoon afskei wanneer hulle tussen ander vertroueling-vriendinne is. Klaarblyklik vryf ons letterlik positiewe energie op mekaar af wanneer ons weet dat ons tussen opregte vriendinne is. Is dit nie wonderlik dat ons Vader vroue-vriendinne vir mekaar gegee het nie?   Opregte vriendinne weet hoe kosbaar hulle verhouding is, Daarom sal hulle altyd:

•  onderlinge vertroue bewaar;
•  mekaar onveroordelend aanvaar en onvoorwaardelik vergewe;
•  tyd en moeite doen om die ander een te leer ken; en
•  energie in die verhouding sit.

Onthou Ralph Waldo Emerson se woorde: Die enigste manier om ‘n vriend te hê is om een te wees. Die grootste geskenk wat jy jou vriend kan gee, is ‘n stukkie van jouself. Moet nooit toelaat dat jou besige program of enige iets anders jou kosbare verhoudings met ander vroue in die wiele ry nie. Jy het dit nodig. Hulle het jou nodig. En meer nog: God gun jou die heerlikheid van koesterende vriendskappe.

Opregte vriendskap is soos ‘n helder ster in jou donker nag: Dit gee altyd hoop. Dis soos ‘n verkwikkende glas koue water op ‘n warm dag: Dit les jou dors. Dis soos ‘n hangmat in ‘n stil tuin: Dit maak jou rustig. Opregte vriendskap is ‘n kosbare meesterstuk wat deur twee harte geskilder word. En moet met albei hande vasgehou word.

Here, maak van my ‘n ware omgee-vriendin by wie ander veilig voel, asseblief.

Bybelkennis gaan gereeld gedeeltes uit Milanie Vosloo se boek: Laat sy Liefde jou Lei, publiseer. Ons dank aan Milanie Vosloo en CUM vir hierdie vergunning.

Vir meer inligting oor CUM, besoek gerus hulle webblad by www.cumuitgewers.co.za

Skrywer: Milanie Vosloo

Laat sy Liefde jou Lei: Hoort sy liefde by die werk? – Milanie Vosloo

‘n Mens wat wys is, sê verstandige dinge. Hy kan ander mense onderrig. Spreuke 16:23

‘n Paar jaar gelede was dit aanvaarbaar om jou geloof openlik by jou werk uit te leef. Niemand sou jou daaroor verkwalik het of oor die vingers getik het nie. Vandag is dit anders. Omdat ons in ‘n land leef waar ons probeer om mekaar op alle terreine te akkommodeer en te respekteer, vra die werkplek soms van ons dat ons ons geloof met oorleg en versigtigheid sal uitleef.

Die vraag is nou, hoe kan ons – te midde van beperkinge en voorgeskrewe reёls – steeds Christus se liefde in die werkplek uitleef?

• Ons kan dit doen deur die Gees toe te laat om ons elke nuwe oggend te suiwer van alle vorme van magsbeheptheid, afguns, geïrriteerdheid of onvergewensgesindheid.
• Ons kan bid dat Hy in die plek daarvan vir ons begrip en deernis sal gee vir die mense aan wie ons rapporteer, vir ons medekollegas veral ook vir die mense aan wie ons moet leiding gee.
• Alleen wanneer ons in totale afhanklikheid voor Hom staan, kan ons Vader ons dan met sy soort liefde vul. Dié liefde wat so leef, werk, praat en doen dat ons – te midde van ‘n harde wêreld – iets van sy sagtheid weerkaats.

Die werkplek is ‘n uitdagende akker om in te ploeg, want dit is heel dikwels daar waar dit die heel moeilikste is om geloofsliefde te leef. Maar kom ons probeer!

Here, gee aan my die wysheid en moed om u waarhede ook in my werkplek te leef.

Bybelkennis gaan gereeld gedeeltes uit Milanie Vosloo se boek: Laat sy Liefde jou Lei, publiseer. Ons dank aan Milanie Vosloo en CUM vir hierdie vergunning.

Vir meer inligting oor CUM, besoek gerus hulle webblad by www.cumuitgewers.co.za

Skrywer: Milanie Vosloo