Laat sy Liefde jou Lei: God het net jou moed nodig – Milanie Vosloo

God het net jou moed nodig

Naäman en sy hele gevolg gaan toe terug na die man van God toe. Hy het voor hom gestaan en gesê: “Nou weet ek dat daar geen God in die hele wêreld is nie, behalwe in Israel…” 2 Konings 5:15a

Miskien het jy al baie gewonder of en hoe jou Vader jou wil gebruik. Dalk dink jy: Ek’s tog so gewoon. Ek’t nie veel uitstaande talente nie en is ook nie regtig ‘n sogenaamde “groot geestelike” nie.

As jy twyfel aan die feit of jy in God se diens staan, kan jy gerus weer die verhaal van die klein dogtertjie in 2 Konings 5 gaan lees. Op ‘n jong ouderdom was hierdie diensmeisie van Naäman reeds oortuig daarvan dat God enige iets kan doen. Toe Naäman melaatsheid kry, was dit dus nie vir haar moeilik om haar meester te probeer oortuig om na die profeet Elisa toe te gaan sodat dié hom gesond kan maak nie. Die res van die verhaal ken ons. Naäman word wel deur God se wonderwerk blakend gesond en boonop ‘n vurige aanbidder van die Almagtige.

As ‘n bloedjong kind se opregte geloof haar noop om ‘n koning se lewe te red, dink net wat jý kan doen met die geleenthede wat elke dag in jou lewe ontvou!  

Jy’t nie geleerdheid, aansien of invloed nodig om ‘n kragtige dissipel van Jesus te wees nie. Jy het net ‘n bietjie moed en die krag van die Gees nodig!

Skepper-God, ek wil elke dag van my lewe beskikbaar wees sodat U my kan gebruik. Ook vandág.

Bybelkennis gaan gereeld gedeeltes uit Milanie Vosloo se boek: Laat sy Liefde jou Lei, publiseer. Ons dank aan Milanie Vosloo en CUM vir hierdie vergunning.

Vir meer inligting oor CUM, besoek gerus hulle webblad by www.cumuitgewers.co.za

Skrywer: Milanie Vosloo

Laat sy Liefde jou Lei: Hoe beter jy Hom ken … – Milanie Vosloo

Maar as die Gees ons lewe beheer, is die gevolg: … goedheid … Galasiёrs 5:22

“U goedheid Heer kan ons nie peil nie. Wie word daardeur nie diep getref. Niks ander bring vir ons die heil nie …” sing ons van kindsbeen af. Ja, ons God is goed! Daarom géé Hy Homself op soveel maniere aan ons.

• Toe ons Vader ons geskape het, het Hy uit die staanspoor iets van sy hemelse grootheid in ons geplaas.
• Nadat die mensdom Hom verwerp en ons ons eie ondergang bewerkstellig het, het Hy wéér ‘n deel van Homself – sy eie Seun – na ons gestuur;
• En toe Jesus se werk hier op aarde afgehandel was, het Hy vir die derde keer Homself in die kern van ons menswees geplaas deur aan ons die Heilige Gees te gee.

Ons hét dus ‘n deel van God se liefdevolle goedheid in ons. En hoe meer ons Hom toelaat om sy lig deur ons te laat skyn, hoe meer sal sy volmaakte wese aan die wêreld sigbaar word. Soos Johannes skryf: As ons optrede egter van die lig getuig, leef ons soos Hy wat in die lig is en het ons volledig deel aan mekaar en, en die bloed van Jesus, sy Seun, maak ons skoon van alle sonde.(1 Joh. 1:7)

Hoe beter jy God leer ken, hoe meer sal jou lewe sy liefdevolle goedheid weerspieёl. Gaan deel vandag, sonder om iets terug te verwag, goed-vir-ander-wees uit.

Vader, ek wíl elke dag in u lig wandel. Ja, ek wíl u goedheid leef!

Bybelkennis gaan gereeld gedeeltes uit Milanie Vosloo se boek: Laat sy Liefde jou Lei, publiseer. Ons dank aan Milanie Vosloo en CUM vir hierdie vergunning.

Vir meer inligting oor CUM, besoek gerus hulle webblad by www.cumuitgewers.co.za

Skrywer: Milanie Vosloo

Laat sy Liefde jou Lei: Méér as ‘n glimlag … – Milanie Vosloo

Méér as ‘n glimlag …

Maar as die Gees ons lewe beheer, is die gevolg: …vriendelikheid … Galasiёrs 5:22 

‘n Enkele vriendelike gesig, woord of daad kan jou hele dag opvrolik. Dink maar hoe lekker dit jou laat voel wanneer iemand jou met ‘n glimlag verras, ‘n opregte drukkie begroet, minsame woorde teenoor jou uitspreek of sommer net iets spesiaals vir jou doen. Die feit is, jy kan ook daardie verskil aan ander se lewens maak deur klein én groot dade van liefde sonder voorwaarde aan hulle uit te deel. Die bonus van vriendelik wees, is dat ons heel dikwels dubbeld soveel terugkry. Want die weggee van aanvaarding, goedheid en minsaamheid bring altyd vir die gewer veel groter beloning!

Wanneer die Gees jou hart met sy vriendelikheidsliefde vul en jou bewus maak van geleenthede waar jy dit kan uitdeel, vra Hy ook van jou dat jy gehoorsaam sal wees aan sy roepstem. Leef die woord vriendelikheid selfs wanneer jy niks terugkry nie, deel dit aan álle mense uit en doen dit herhaaldelik … selfs wanneer jy nie daarna voel nie.

Weet vandag dat die Heilige Gees reeds aan jou die vermoё gegee het om werklik minsaam, welwillend en beminlik te wees. Al wat Hy vra is ‘n geesvervulde hart wat gewillig hoor wat Hy sê en doen wat Hy vra.

Vriendelikheid is die toegeneentheid tussen twee harte wat soms woordeloos gesmee word, ander kere in pakkies genade oorhandig word en meestal sommer net uit ‘n hart van liefde spontaan sigbaar word.

Gees van God, leer my om die vrug van vriendelikheid met passie te leef.

Bybelkennis gaan gereeld gedeeltes uit Milanie Vosloo se boek: Laat sy Liefde jou Lei, publiseer. Ons dank aan Milanie Vosloo en CUM vir hierdie vergunning.

Vir meer inligting oor CUM, besoek gerus hulle webblad by www.cumuitgewers.co.za

Skrywer: Milanie Vosloo

Laat sy Liefde jou Lei: “Geduld o, geduld wat so baie kan dra ..” – Milanie Vosloo

“Geduld o, geduld wat so baie kan dra ..”

Maar as die Gees ons lewe beheer, is die gevolg: …geduld … Galasiёrs 5:22 

Geduld is ‘n omvangryke woord. HAT omskryf dit as die vermoë om veel te verdra; om moed te hou; die vermoё om te wag sonder om te kla; om rustig met iets om en voort te gaan; lydsaamheid; verdraagsaamheid en volharding. Sjoe, wat ‘n mondvol! Geen wonder ons sukkel so om hierdie vrug van die Gees  te leef nie. Hoe dikwels kan ons droogmaak-optrede nie toegeskryf word aan die gebrek van geduld nie!

Wanneer jy, soos ek, een van daardie mense is wat met ‘n streep van ongeduld gebore is, is die aanleer van hierdie eienskap slegs moontlik wanneer ons in totale afhanklikheid aan die Gees leef. Net Hy kan van ongeduldige mense wat dinge altyd vinnig gedoen wil hê, wat gou kwaad word en wat ‘n haastige geaardheid het, geduldige mense maak. Net die Gees kan die trots (wat dikwels die oorsaak van ongeduld is) vervang met ‘n nederige en sagte hart waarin ander én die werking van God ruimte het.

Bid vandag saam met my die gebed uit my boek, Woorde wat Leef*:

Here van tyd, leer my geduldig wag op u volryp tydsberekening en groter plan met my lewe, U maak my deurentyd ook gereed vir die oes, volrond en sterk, sodat ek die vol mandjies goedheid ook aan ander kan uitdeel. Leer my die seёn van die woord “wag”, en die genade van die woord “genade”.*

Ja, Here, ek wag op ontvangs van u soort geduld.

Bybelkennis gaan gereeld gedeeltes uit Milanie Vosloo se boek: Laat sy Liefde jou Lei, publiseer. Ons dank aan Milanie Vosloo en CUM vir hierdie vergunning.

Vir meer inligting oor CUM, besoek gerus hulle webblad by www.cumuitgewers.co.za

Skrywer: Milanie Vosloo