Laat sy Liefde jou Lei: Leef elke stukkie van jou lewenspad – Milanie Vosloo

Lééf elke stukkie van jou lewenspad!

Die liggaam wat doodgaan, vergaan heeltemal, maar die liggaam waarmee ons weer lewendig word, sal nooit vergaan nie. 1 Korintiërs 15:42

Die lewe is soms vol verruklike skoonheid. Tye wanneer dit vir ons voel of ons eenvoudig wil bars van vreugde en geluk. Wanneer die wêreld om ons net so mooi lyk soos wat ons harte voel. Dan is daar dié tye wanneer gevaar, boosheid, pyn, hartseer …die slegte op ons toesak en wanneer ons wonder of daar dan nog enige iets goed van ons en ons lewens hier op aarde kan kom. Meestal egter, is ons lewens ‘n eenvoudige sloergang waarin ons ritmies van een dag tot die volgende opstaan, werk, leef en slaap. Sulke tye is dit maklik om verveeld te wonder of daar dan nie iets meer opwindends is as die gewóne roetine-lewe nie.

Die geheim van ‘n vervullende lewe is om die droё Karoo-tye met dieselfde passie as die oasetye te leef. Dis om elke berg wat voor jou lê as ‘n gawe vir groei te sien, om die donker dieptes as ‘n naby-aan-God-geleentheid te ervaar. Om met oorgawe te leef is om in die reёn te kan lag, omdat jy weet die reёnboog is op pad en om in sonskyndae te jubel omdat jy opnuut besef: God bly steeds dié Lig! En ons in Hom kinders van die ewigheid.

Ons leef elke dag ‘n nuwe stukkie van ons menslike pelgrimsroete: ‘n pad wat gevul is met die heerlike verskeidenheid wat ons léwe noem.

Here, help my om van elke dag die heel beste te maak.

Skrywer: Milanie Vosloo

Laat sy Liefde jou Lei: Is jy te hard op jouself? – Milanie Vosloo

Is jy te hard op jouself?

Ek wil aan julle ‘n diep waarheid vertel wat God aan ons bekend gemaak het. Dit is dat ons nie almal sal sterf nie, maar ons almal sal verander word. 1 Korintiёrs 15:51

Party mense is nooit tevrede met hulself nie! Dis diegene wat ongenadige hoё eise aan hulself stel, altyd beter wil doen en nie sal rus voordat hulle ‘n berg tot bo geklim het nie. Die ergste van alles is dat hulle so halfpad teen die afdraende af weer aan ‘n nuwe uitdaging beplan.

As jy een van daardie nimmereindigende drywers is wat jouself altyd tot hoёr hoogtes druk, maak jy tien-teen-een ‘n reuse sukses van alles wat jy aanpak. Oor jou sal God heelwaarskynlik eendag sê: Welgedaan, my kind, jy het jou lewe behoorlik gelééf!.

Máár … soos so baie dinge in die lewe, kán dit wees dat jy soms net té hard op jouself is, té veel wil vermag en daarom met tye … uitgebrand en moedeloos raak. As dit so is, is jy verseker nie binne die wil van God nie. Nêrens in sy Woord sê Hy dat ons ‘n ongebalanseerde altyd móét-doen-mens moet wees nie. Inteendeel, Jesus was ‘n wonderlike voorbeeld van iemand wat geweet het wanneer genoeg, genoeg is. Daarom het Hy dikwels, ondanks sy besige program, tyd gemaak om rus by sy Vader te vind.

Doen jy dalk dinge “té”? Want dan sukkel God se gebalanseerde lig om deur jou te skyn!

Here, leer my om my rus in U te vind en nie in die dinge wat ek vermag nie.

Skrywer: Milanie Vosloo

Laat sy Liefde jou Lei: Waar’s die engele heen? – Milanie Vosloo

Waar’s die engele heen?

Hy (Elia) het gaan lê en onder die besembos aan die slaap geraak. Maar ‘n engel het hom aangeraak en gesê: “Staan op en eet!” 1 Konings 19:5

Daar’s soveel wonderlike verhale in die Bybel waar engele aan God se kinders verskyn het. Daar waar die Here se kinders raad, bemoediging, wysheid of teregwysing nodig gehad het, het Hy dikwels in die vorm van engele verskyn. Die twee engelname waarvan ons lees is Gabriel en Michael. Hulle name word dan ook heel dikwels verbind met boodskappers of beskermers van God.

Vandag hoor ons ook al hoe meer verhale van mense wat engele gesien het en kort-kort verskyn daar ‘n nuwe boek oor die werklikheid van engele ook in ons moderne eeu. Die feit is, engele is steeds tussen ons besig om in opdrag van God op te tree, ons te lei, te beskerm of ons die pad te wys. Miskien is hulle juis nóú, in ‘n tyd waarin die wêreld deur geweldige veranderinge gaan en geloofskwessies dikwels in twyfel getrek word, aktief tussen ons besig, want engele is juis in diens van die Here ter wille van die gelowiges. Hebreёrs 1:14 lees: Die engele is tog maar net diensknegte. Hulle is geestelike wesens wat God uitstuur in belang van daardie mense wat gered gaan word.

Leef elke dag bewustelik binne God se teenwoordigheid. Hoor, sien, voel en beleef Hom in die alledaagse. Hy is vandag meer as ooit op verskillende manier … bý jou!

Dankie dat U my op soveel verskillende maniere met U-self omring, Here.

Skrywer: Milanie Vosloo

Laat sy Liefde jou Lei: Hy gee sin aan die lewe – Milanie Vosloo

Hy gee sin aan die lewe

Ek het my lewenspad oordink en het teruggedraai om volgens u voorwaardes te lewe. Psalm 119:59

Wanneer ons klein is, lyk die wêreld so ongekompliseerd en wonderlik. Ons kan skaars wag om groot te word. Dan word ons groot … en dan is daar min van die storieboekverhale wat in ons eie lewens realiseer. En dis dan die tyd wat ons maklik oor die aard, doel en sinvolheid van die lewe kan worstel.

Die harde lewensfeit is: ons ís nie in ‘n feёverhaalwêreld nie omdat ons mensdom lank gelede reeds gekies het om ‘n lewe buite die volmaakte te leef. Ons mensdom het onsself sedert die skeppingsdae uit die hemelse Walt Disney-storieboeke geskryf. En daarom is die realiteit van die lewe gebrokenheid wat kristalliseer in pyn, ongemak, probleme en moeilike tye. Hoe gouer ons dit aanvaar, hoe makliker verstaan ons die lewe en hoe meer weet ons dat ons nie kan bekostig om één dag sonder ons hemelse Vader te leef nie. Om in God te glo, sê H Newbegin, is om te weet dat die reёls van die spel regverdig sal wees, en die uitkoms van die spel baie meer veelseggend as wat jy ooit kan dink.

Aanvaar vandag die realiteite van die lewe in die lig van die groter waarheid: die feit dat jou liefdevolle Vader jou te midde van alles veilig in sy hand het. Dis meer as ‘n realiteit. Dis ‘n ewige waarheid.

Here Jesus, U gee sin aan my lewe selfs wanneer ek twyfel aan die lewe se sinvolheid!

Skrywer: Milanie Vosloo