Laat sy Liefde jou Lei: Aan wie gee jy die eer? – Milanie Vosloo

Aan wie gee jy die eer?

“… Ek loof en prys U, God van my voorouers: U het my wysheid en krag gegee; U het my ingelig oor wat ons van U gevra het; U het my ingelig oor die droom van die koning.” Daniёl 2:23

Dis maklik om ‘n mens se eie geloofsreis te oorskat! Om na ander mense te kyk en dan jouself op die skouer te klop oor jou sogenaamd sterk geloof! Hierdie illusie kan juis in ons hart ontspring in tye wanneer dit uitstekend met ons geloofslewe gaan en wanneer ons dalk vir ‘n wyle vergeet dat ons geloof ‘n gawe en ‘n louter stuk genade is.

Wanneer ons die verhaal van Daniёl lees, is dit insiggewend om te besef dat Daniёl nie net op sy knieё was toe hy onstellende leeukuil-tye beleef het nie. Nee, Daniёl was in totale afhanklikheid en nederigheid voor sy God selfs toe hy wonderlike oorwinnings behaal het en geeёr is as die enigste een wat koning Nebukadneser se drome kon ontleed. Dit was op so ‘n hoogtepunt in sy lewe wat hy met groot nederigheid erken: Die geheim is vir my verklaar, nie omdat ek slimmer is as enige iemand anders nie, maar omdat God wil hê dat die koning moet verstaan waaroor hy gedink het.” Daniёl 2:30

Opregte geloof leef altyd in volkome oorgawe en nederigheid uit die genadehand van God. En gee daarom onder álle omstandighede eer aan die Een deur wie alles is en sal wees.

Genade-God, help my om altyd te onthou dat ek is wat ek is, om U ís.

Skrywer: Milanie Vosloo

Laat sy Liefde jou Lei: Wie is in beheer: jy of God? – Milanie Vosloo

Wie is in beheer: jy of God?

Hy maak dinge oop wat diep en weggesteek is; Hy weet wat in die donker gebeur en by Hom is daar lig. Daniёl 2:22

“Is dit die wind wat die bome laat beweeg of is dit die beweging van die bome wat die wind laat waai?” vra Chesterton. Dom vraag!, sou ons sê, totdat ons die dieper geloofsbetekenis daaragter verstaan. Want trap ons nie maar almal soms in die strik om te dink dat óns wonderlike vertroue, gehoorsaamheid en gebed God in beweging kan sit nie?

Dis menslik om te dink dat óns goeie lewe en opregte geloof ‘n invloed op God behoort te hê. En dat Hy, namate ons op ons geloofreis vorder, meer geneё behoort te wees om na óns te luister en óns wil te doen. Dit terwyl die orde van geloof allermins oor mý en God gaan. Geloof gaan oor dit wat God met, in en deur my doen.

Dis God alleen wat aan ons die gawe van geloof gee, dis Hý wat ons bekwaam en gewillig maak om sy wil te doen en dis net Hy wat ons in staat stel om Hom te verheerlik. Elke beweging op ons geloofspad kom van God af, elke stukkie groei in ons geloofslewe vind deur Hom plaas en elke vorm van Geesvervulling is suiwer sý genade.

Mag ons altyd onder die besef leef dat dit die wind van God is wat ons geloofstakke laat waai … en nie anders om nie!

Here, ek weet: U ís in beheer … ook van my geloofsvorming.

Skrywer: Milanie Vosloo

Laat sy Liefde jou Lei: Glo jy … ongeag die uitkoms – Milanie Vosloo

Glo jy … ongeag die uitkoms?

Nebukadneser het gesê: “Loof Sadrag, Mesag en Abednego se God! Hy het sy engel gestuur om hulle wat op Hom vertrou het, te red. Daniёl 3:28a

Jy ken die verhaal van Daniёl se drie vriende, Sadrag, Mesag en Abednego wat, vanweё hul oortuigde geloof in God, in die brandende oond gegooi is. En jy onthou hoe die engel hulle ongedeerd – sonder dat ‘n haar geskroei het of hulle na rook geruik het – uit die vlammende oond laat stap het. Maar het jy al raak gelees wat hulle gesê het vóórdat hulle die vuur binnegestap het? In Daniёl 3:17 hoor ons hoe hulle vir koning Nebukadneser sê: “Die God wat ons aanbid, kán ons uit u hand bevry, U Majesteit. En selfs … al red Hy ons nie … sal ons nie u gode vereer nie.” (Daniёl 3:17) Duidelik het hierdie drie manne se geloof nie gegaan oor wat God vir hulle kan doen nie. Dit het vir hulle gegaan oor die God van hul geloof. Hulle het God vertrou … ongeag die uitkoms van hul gebede en wense.

Bybelse geloof word nie gebou op ons omstandighede, ons aardse voorspoed, die uitkoms van ons gebede of die seёn wat ons ontvang nie. Dit word gebaseer op ons absolute vertroue op God wat God ís en sal bly. Kom ons bid dat Hy ons sal help om te blý glo ongeag wat die toekoms inhou.

Hemelse Vader, my geloof is soms kleiner is ‘n mosterdsaadjie! Dis dan wanneer ek maar net kan vra: Kom my ongeloof te hulp asseblief.

Skrywer: Milanie Vosloo

Laat sy Liefde jou Lei: Om te glo, selfs as … Milanie Vosloo

Om te glo, selfs as ….

“Ek glo!” roep die kind se pa dadelik uit. “Help my tog om nie meer te twyfel nie!” Markus 9:24

Wonder jy soms of dit die moeite werd is om te (blý) glo? Daar was tog al kere toe jy ontredderd gevoel het, aan God se goedheid getwyfel het of gewonder het waarom jou gebede “onbeantwoord” bly? Miskien moet ons eers vra: Wáárom glo jy? Is jou geloof gebaseer op die voordele wat dit inhou soos dat jou Vader na jou versoeke luister en in sommige gevalle dalk vir jou die binnebaan van die lewe gee? Of glo jy omdat jy wéét, dat jou Here – ondanks alles – God blý, in beheer ís en áltyd vertrou kan word?

Ware geloof is nie gebaseer op dit wat God vir ons kan doen en in hoe ‘n mate Hy ons gebede beantwoord nie. Veel eerder gaan Bybelse geloof daaroor dat ons blý glo wanneer ons nié God se stem hoor nie, wanneer daar nié genesing is nie, wanneer die reёn wegbly, wanneer daar maar net nie finansiële uitkoms is nie, wanneer teenslae jou blý tref … wanneer jy die mens wat jy die liefste het, verloor of wanneer jy deur vuur moet stap. Dis in sulke tye van ontreddering wat ware geloof steeds uitroep: “Here, help my glo! Help my om U ook nou te vertrou. Want self kan ek nie!” 

Bid vandag dat God aan jou die gawe van geloof sal gee, juis wanneer jy nié kan glo nie.

Getroue Vader, ek wíl onwrikbaar glo. Help my asseblief daarmee.

Skrywer: Milanie Vosloo