Laat sy Liefde jou Lei: Wanneer klein groot is – Milanie Vosloo

Wanneer klein gróót is

Ek het daarna nagedink oor alles wat ek bereik het, oor al die moeite wat ek gedoen het. Ek het besef hoe sinloos dit alles is. Prediker 1:11

Wanneer ons in ’n loopbaan staan en daaraan gewoond is om met groot transaksies te doen te kry, indrukwekkende projekte aan te pak en heeltyd tussen stimulerende en intelligente mense te werk, raak ons so half verslaaf aan sukses-behaling. Dan is dit asof ons nie sonder die energie en dryfkrag van die werksomgewing kan bestaan nie.

Wanneer ons dan om een of ander rede uit daardie loopbaangedrewe wêreld beweeg en dinamika van die arbeidswêreld ons nie meer omring nie, is dit maklik om betekenisloos te begin voel. Ewe skielik is daar mos nie meer strukture wat ons menswees (en eiewaarde!) in stand hou nie.

Sulke tye is dit noodsaaklik om te fokus op dié dinge waarvoor jy nie tyd gekry het toe jy jou loopbaan nagejaag het nie. Dinge wat dalk irrelevant lýk, maar wat tog so belangrik is. Dan is dit die tyd om te gaan stilstaan by die klein goedjies wat voorheen by jou verbygegaan het, om tyd te maak vir die mense wat jy voorheen afgeskeep het of om ‘n betekenisvolle verskil in ander se lewens te maak.

Soms is “onbelangrike dinge” juis die mees belangrike. Soms is klein goedjies eintlik die gróót goed. Want meestal is die sogenaamde onbelangrike die gróót dinge in God se oë.

Here Jesus, help my om verder as die nou te kyk sodat ek sal weet wat wérklik belangrik is.

Skrywer: Milanie Vosloo

Laat sy Liefde jou Lei: God se spoedgrens vir jou lewe – Milanie Vosloo

God se spoedgrens vir jou lewe

Toe seёn God die sewende dag. Hy het bepaal dat dit afgesonder moet word van die ander dae omdat Hy op daardie dag gerus het nadat Hy sy skeppingswerk gedoen het. Genesis 2:3

Sommige tye in ons lewe is ons uiters produktief en kry ons ’n duisend dinge gelyktydig gedoen terwyl ons ander kere sommer net in ’n min- of níks-doen-fase is. Wanneer ons gewoond daaraan is om altyd teen die spoed van lig te hardloop, is ons geneig om sommer gou skuldig te voel wanneer ons ‘n minder produktiewe tyd ingaan. Tog is dit juis ons Vader se manier om vir ons te sê: “My kind, dis tyd om jou pas te verstadig. Want wanneer jy te lank te veel doen, hardloop jy buite die spoedgrens van mý wil vir jou lewe.”

Weet jy wanneer om rem te trap? Het jy die vermoё om soms “nee” te sê vir werk en “ja” te sê vir rus … vir kwaliteittyd aan jou Meester se voete? Dis so belangrik om te weet wanneer jy oor die spoedgrens van jou lewe gaan sodat jy betyds halt kan roep. Wanneer jy dan bederf word met ‘n stadiger-leef-fase, is dit ewe belangrik dat jy jou bederftyd sal geníét …. sonder om skuldig te voel. Onthou, sulke tye word aan jou gegee sodat jy weer aandag kan gee aan dié dinge wat werklik saak maak.

Leef jou rotteresies-seisoen met versigtigheid en jou sklipad-fase met waardering. Albei kan vervullend wees.

Here Jesus, leer my om teen die regte spoed rég te leef.

Skrywer: Milanie Vosloo

Laat sy Liefde jou Lei: Die genade van werk – Milanie Vosloo

Die genade van werk

Dit is goed dat mense lekker eet en wyn drink en hulle werk geniet, wat hulle ook al onder die son doen, so lank as wat God hulle laat lewe. Prediker 5:17b

Wanneer jy jou spesiale talente en gawes deur jou dagtaak kan uitleef, is jy besonder bevoorreg! Want dan het jy rede vir jou bestaan gevind, geniet jy wat jy doen en is jou werk ’n verlengstuk van jouself. Die kanse is dan ook goed dat jy die spesiale roeping wat God vir jou hier op aarde beplan het, uitleef. Vra jouself vandag die volgende vrae:

• Wat is my unieke talente; dié dinge waarin ek goed is?
• Wat is my natuurlik belangstelling? Vind ek dit in my huidige dagtaak?
• As ek vandag (oor) kon kies, wat sou ek die heel graagste wou doen?
• Wat behoort ek te verander of te doen om in staat te wees om dit te doen waarvan ek regtig hou en waarin ek goed is?
• Wat is my plan van aksie, wat het ek nodig en wat kan ek doen om by daardie doel uit te kom?
• Hoe kan ek God verheerlik deur dit wat ek (wil) doen.

God wil hê dat jy jou werk en die vrug van jou arbeid sal geniet! Besluit vandag dat jy wel jou lewensroepende werk kan en sal doen. Bid dat jy dit sal vind en gaan dan en dóén dit.

Vader, ek wil deur my werk lééf sodat ek deur my werk U kan verheerlik. Help my daarmee asseblief.

Skrywer: Milanie Vosloo

Laat sy Liefde jou Lei: Vind vrede in jou roeping – Milanie Vosloo

Vind vrede in jou roeping

En nou vertrou ek julle aan God toe en aan die boodskap van die onverdiende goedheid wat Hy aan mense bewys. Handelinge 20:32

Werk, in watter vorm ook al, gee betekenis aan ‘n mens se lewe. Party van ons vind daardie sinvolheid in ’n uitdagende korporatiewe loopbaan waar ons op hoë vlak ’n bydrae lewer. Daar in die raadsale van die wêreld vind ons ’n stuk energie wat ons menswees stimuleer en ons opgewonde maak. Ander kry daardie geluksgevoel deur hul entrepreneursdroom uit te leef en met groot sukses hul eie ondernemings te bedryf. Dan is daar dié wat byvoorbeeld daarvan hou om kinders te onderrig, ander te verpleeg, maatskaplike dienste te lewer, skoonheidsbehandelings te doen of die Woord te verkondig.

Ware sinvolheid is om besig te wees met dié dinge waaruit jý vreugde put. Wanneer jy dit doen, is die kanse goed dat jy dit ook uitmuntend sal doen en ‘n sukses daarvan sal maak. En wanneer jy daardie unieke roeping gevind het en dit uitleef, maak dit regtig nie saak wat die wêreld om jou doen nie! Want dan het jy die rede gevind waarom jý op aarde geplaas is en ervaar jy die waarheid waarvan ons in Prediker 5:11 lees: Mense wat hard werk, slaap goed, maak nie saak of hulle baie of min eet nie.

Ware sinvolheid vergelyk nie haarself met ander nie! Want sy het vreugde gevind in die liefde in haar hart, in haar werk en in dit wat sy is.

Vader-God, laat ek vrede vind in dit wat ek goed kan doen.

Skrywer: Milanie Vosloo