Die eindtyd: Merk op regterhand en voorkop – Kobus Kok

‘n Leser vra: 

Ons het ‘n e-pos gekry wat handel oor Motorola wat ‘n chip ontwerp het bekend as Mondex wat onder mens se vel of onder jou skedel of op jou hand ingeplant word. Weet julle enigiets daarvan?

Antwoord:

 

Dr Kobus Kok antwoord: 

Die eindtyd: Merk op regterhand en voorkop

Dr. Kobus Kok

Deesdae sirkuleer verskeie eposse waarin daar beweer word dat ‘n bepaalde maatskappy “chips” ontwerp het wat die gewone bankkaart sal vervang. Hierdie “chip” word dan of in die hand of in die voorkop ingeplant. Baie mense wonder of dit na die merk van die dier verwys waarvan ons in Openbaring lees.

Die antwoord is eenvoudig nee. In Openbaring word daar wel verwys na die merk van die dier wat op mense se voorkoppe en hande sal wees. Dit moet egter simbolies verstaan word. Vandag sal ons byvoorbeeld sê: “Ag man, skryf dit maar op jou maag”. Daarmee probeer ons simbolies sê dat jy maar daarvan moet vergeet. Net so moet Openbaring se verwysing na die merk op die voorkop en die hand simbolies verstaan word as dat die merk op die voorkop verwys na besit aan die een kant, en mense se manier van dink aan die ander kant. In die antieke tyd is slawe dikwels gemerk op die voorkop en so word daar gewys aan die wie die slaaf behoort. Die slaaf het ook die verantwoordelikheid gehad om lojaal te wees aan die eienaar in woord en daad.

In Openbaring is dit nie net die kinders van die duiwel wat die merk sal dra nie. God se kinders word in Openbaring ook op die voorkop gemerk (vgl. Openb 7:3). Inteendeel, in die verhaal van Openbaring word die kinders van God op hulle voorkoppe verseël voordat daar nog enigsins sprake is van dat die duiwel se volgelinge ‘n merk dra. Daarom kan ons sê dat die duiwel die aksie van God eintlik dupliseer, hy kon dit nie eers self uitdink nie. Die merk waarmee God sy kinders merk dien as bewys dat hulle God se eiendom is en dat die duiwel nie reg op hulle lewens het nie. Die mense met God se merk op hulle voorkoppe is ook diegene wat in hulle denke en dade lojaal is teenoor God.

Myns insiens is die eposse wat die rondte doen verkeerd as hulle die mikro-chips verbind aan die merk van die dier in Openbaring. Ons moet onthou dat die boodskap van Openbaring vir die eerste lesers belangrike betekenis gedra het in die eerste eeu. Deur die boodskap te beperk tot ons tyd beteken dat ons die boodskap daarvan vir die eerste lesers ontken. Vir die eerste lesers twee duisend jaar gelede sou die merk op die voorkop die konnotasie dra van eienaarskap, met die duidelike boodskap dat mens of aan God of aan die duiwel behoort. Dit kan veral gesien word in die manier waarop mens dink en optree.

Hier onder verskyn die tekste uit Openbaring wat handel oor die merk van God en die merk van die dier:

Openbaring 7:1 En ná hierdie dinge het ek vier engele op die vier hoeke van die aarde sien staan, en hulle het die vier winde van die aarde vasgehou, sodat geen wind sou waai op die aarde of op die see of teen enige boom nie.

Openbaring 7:2 En ek het ‘n ander engel sien opkom van die opgang van die son, met die seël van die lewende God; en hy het met ‘n groot stem geroep na die vier engele aan wie dit gegee is om die aarde en die see te beskadig

Openbaring 7:3 en gesê: Moenie die aarde of die see of die bome beskadig voordat ons die diensknegte van onse God op hulle voorhoofde verseël het nie.

(Openbaring 13:16 AOV) En hy maak dat aan almal, klein en groot, en die rykes en die armes, en die vrymense en die slawe ‘n merk op hulle regterhand en op hulle voorhoofde gegee word;

(Openbaring 13:17 AOV) sodat niemand kan koop of verkoop nie, behalwe hy wat die merk of die naam van die dier of die getal van sy naam het.

(Openbaring 14:9 AOV) En ‘n derde engel het hulle gevolg en met ‘n groot stem gesê: As iemand die dier en sy beeld aanbid en ‘n merk op sy voorhoof of op sy hand ontvang,

(Openbaring 14:11 AOV) En die rook van hulle pyniging gaan op tot in alle ewigheid, en hulle het dag en nag geen rus nie hulle wat die dier en sy beeld aanbid, en elkeen wat die merk van sy naam ontvang.

(Openbaring 16:2 AOV) Toe gaan die eerste een weg en gooi sy skaal op die aarde uit, en kwaai en bose swere het aan die mense gekom wat die merk van die dier gehad het en sy beeld aanbid het.

(Openbaring 19:20 AOV) En die dier is gevange geneem, en saam met hom die valse profeet wat die tekens in sy teenwoordigheid gedoen het, waarmee hy húlle verlei het wat die merk van die dier ontvang en sy beeld aanbid het. Lewend is die twee gewerp in die vuurpoel wat met swawel brand.

(Openbaring 20:4 AOV) En ek het trone gesien, en hulle het daarop gaan sit, en aan hulle is die oordeel gegee; en ek het die siele gesien van die wat onthoof is oor die getuienis van Jesus en oor die woord van God, en die wat die dier en sy beeld nie aanbid het nie, en die merk op hulle voorhoof en op hulle hand nie ontvang het nie; en hulle het geleef en as konings geregeer saam met Christus die duisend jaar lank.

 

Skrywer: Dr Kobus. Kok

Openbaring 19 en 20 (2) – Francois Malan

Pieter vra:

Dankie vir die antwoord van Prof. Malan.

Ek wil graag vir verdere duidelikheid op die antwoorde van punte (1), (3) en

(4) die volgende vrae vra:

(1) Wanneer Openb. 20:2-3 se bewering dat die Satan die nasies NIE MEER VERLEI

[Gr.: planao] nie, in die premillennialistiese siening verklaar word as ‘n “beperkte speelruimte,” hoe word 1 Tim. 4:1 daarmee versoen wat sê: “die Gees sê uitdruklik dat in die laaste tye sommige van die geloof afvallig sal word en verleidende [Gr.: planos] geeste en leringe van duiwels sal aanhang”? Sou dit nie in ‘n amillennialistiese siening impliseer dat Satan se onderdane mense kan verlei, maar Satan self dit nie kan doen nie?   Maar wat dan ook van 2 Kor. 4:4? Hoe is dit moontlik dat Satan die nasies NIE MEER VERLEI nie, maar nogtans die “god van hierdie wêreld” is wat die sinne van die ongelowiges verblind? Hoedanig is Satan dan steeds doenig (as brullende leeu – 1 Pet. 5:8) sonder dat hy mense verlei?

(3) Indien die chronologie wat tussen Openb. 20:10 en Openb. 19:20 geïmpliseer word nie binne ‘n chronologiese raamwerk geplaas kan word nie, watter regverdiging is daar dan oor om enige ander chronologie (bv. die satan word gebind en chronologies daarna losgelaat) te handhaaf? Al sou Durand se chiastiese struktuur opgaan, negeer dit tog sekerlik nie die chronologieë wat inherent bestaan nie. Maar die chiastiese struktuur kan ook nie eksak wees nie, want in Openb. 19:19 is dit “die dier en die konings van die aarde” wat teen Christus en sy leër oorlog maak, terwyl dit Satan is wat die nasies tot oorlog verlei in Openbaring 20:8 en nie “die dier” nie (want die dier is in die vuurpoel, volgens vers 10); en die oorlog is teen “die heiliges en die geliefde stad” (Openb. 20:9) en nie Christus en sy leër as sodanig nie. Ek kan dus nie insien hoe die versameling tot oorlog in Openb. 19 dieselfde as dié in Openbaring 20 kan wees nie; maar indien dit nie is nie, dan moes Openb. 19 vóór die koms van Christus gebeur het (volgens die amillennialistiese siening) en daar is geen historiese aanduidings dat dit wel die geval is nie.

(4) Ek verstaan nie hoe die Mediërs die silwer en die Perse die brons kan wees in die beeld nie, aangesien dit, volgens Microsoft Encarta (bv.), nie die Mediërs was wat die Babiloniese ryk oorgeneem het (539 v.C.) nie, maar die Perse (wat teen daardie tyd reeds die Mediërs oorwin het – 546 v.C.).

En die Mediërs en Perse het gesamentlik ‘n nasie gevorm (met die Perse die sterker een tussen hulle), so dit maak ook nie sin om die koninkryke as opeenvolgende wêreldmagte te sien in die visioen nie. Trouens, in die ooreenstemmende visioene van hoofstuk 7 en hoofstuk 8, word die Mediërs en Perse as een koninkryk beskou (vgl. Dan. 8:20).

Antwoord

Prof François Malan antwoord:

Vraag oor punt 1: Nee, die duiwel en sy engele is saam uit die hemel uitgegooi met Christus se kruisiging (vgl. Openbaring 12:9; 2 Petr.2:4; Judas v.6; Joh.12:31; Luk.10:18). Aan Christus, wat al ons sondeskuld gedra het, het God alle mag gegee in die hemel en op aarde (Mat.28:18). Hy heers nou oor hemel en aarde, en nie meer die duiwel nie. Die woord duiwel beteken ‘skinderbek’, wat ons by God beskinder of aankla. Dit kan hy nie meer doen nie. Selfs satan ,‘teenstander’, kan hy nie meer as ons teenstander triomfeer nie, met Jesus wat met ons is tot die voleinding van die wêreld (Mat.28:20).

1 Tim.4:1 – sien ons huidige lewe tussen Christus se kruisiging en sy wederkoms as die laaste dae (vgl. Hand 2:17-21; Hebr.1:2; 2 Petr.3:3). Paulus is bekommerd oor die ‘vroom’ skynheilige verleiers wat sommige gemeentelede in Efese o.a. verbied om te trou en om bepaalde soorte kos te eet as hulle gered wil word – m.a.w. om te vertrou op hulle eie goeie werke, om deur askese hulle saligheid te verdien. Daartoe word hulle verlei deur misleidende geeste (waarskynlik ‘n verwysing na die duiwels) wat deur die dwaalleraars, leerstellings verkondig wat deur die duiwel geïnspireer is.

2 Kor.4:4 praat van die ongelowiges wie se verstand deur die god van hierdie wêreld verblind is, om nie die evangelie van God se vrye genade te aanvaar nie. Die begrip ‘god van hierdie wêreld’ beteken die god wat as die gesagvoerder oor die wêreld gereken word deur die mense van die wêreld. Paulus verwys daarmee waarskynlik na die duiwel, in die sin van 1 Kor.8:4-6 se ‘baie sogenaamde gode en baie wat God genoem word’ deur die mense, maar vir die gelowiges is daar net een God, die Vader as Skepper van alles wat Hy deur Jesus Christus skep, en die enigste ware God is vir wie ons leef deurdat Hy ons aan Jesus Christus verbind het deur geloof wat die Heilige Gees in ons werk. In Filippense 3:19 praat Paulus van mense wie se maag hulle god is, hulle wat as vyande van die kruis van Christus lewe, m.a.w. mense wat nie hulleself verloën en hulle kruis opneem en Hom volg op sy kruisweg van selfverloëning nie, en nie vertrou op sy kruisdood vir ons verlossing nie. So kan die god van hierdie wêreld ook ‘n aanduiding wees van die eie-ek vir wie alle mense lewe, sedert Adam en Eva soos God wou wees om goed en kwaad te kan ken, totdat die Heilige Gees in ons begin werk om nie op ons self te vertrou nie, maar al meer op God, wat ons deur sy Seun se dood aan die kruis van ons self verlos. So verwys Jesus volgens Johannes 8:41-47 na die Jode wat op hulle uitverkiesing as kinders van God roem, maar vir Jesus, wat deur God gestuur is, nie liefhet nie, as kinders van die duiwel wie se wil hulle doen, en daarom nie luister na die woorde van God wat Jesus vir hulle bring nie.

1 Petrus 5:8-9 maan gelowiges tot waaksaamheid teen ons vyand, die duiwel, wat soos ‘n brullende leeu rondloop op soek na buit wat hy kan verslind as die laaste stuiptrekkings van sy mag wat deur Jesus oorwin is. Daarom moet ons vas staan en hom met die hulp van die Heilige Gees teenstaan. Efesiërs 6:10-18 vermaan ons om op ons pos te bly ondanks die aanslae van die duiwel, ons stryd is teen die bose magte van hierdie sondige wêreld, teen die bose geeste in die lug. Daarom moet ons die volle wapenrusting van God aantrek, o.a. die swaard van die Gees, nl. die woord van God, en God by elke geleentheid smeek deur die Gees, terwyl ons ons krag soek in die Here en sy groot mag. Openb.12:10-17 vertel juis van die gesag van God se Gesalfde, en van die aanklaer wat uit die hemel uitgegooi is deur die bloed van die Lam. Maar terwyl die hemel juig, is daar ellende vir die land en see omdat die duiwel na ons toe gekom het met groot woede in die wete dat hy min tyd het, en hy maak oorlog teen die kerk wat aan Jesus se getuienis vashou.

Die premillennialiste se interpretasie van Openb.20:1-3 se ‘nie meer kan verlei van die nasies nie’ deurdat die satan vir 1000 jaar vasgebind en in die onderaardse diepte toegesluit is as ‘beperkte speelruimte’ is vir my ook nie duidelik nie. Ek veronderstel hulle meen die satan en sy gevalle engele het nog ‘n beperkte speelruimte onder mekaar gedurende die 1000 jaar, sonder enige invloed op die nasies van die wêreld. Dit waarskynlik omdat hulle nie dink dat ons nou reeds in die laaste dae lewe nie, maar dat dit eers na die 1000jaar se vrederyk aanbreek. Na die 1000 jaar sou die duiwel en sy trawante dan vir ‘n kort tydjie loskom om te doen wat 1 Kor 4:1 sê, volgens hulle.

Vraag oor punt 3, oor die chronologie. Die boek Openbaring is aanvanklik gerig aan Christene in Klein-Asië aan die einde van die eerste eeu na Christus, om hulle te bemoedig in hulle swaarkry en krisissituasie. Dit was veral teen die einde van die Romeinse keiser Domitianus se bewind, wat van 81-96 n.C. regeer het, en vereis het dat alle burgers hom as heer en god aanspreek. In sommige plekke in Klein-Asië, bv. in Efese het die keiserverering in keiseraanbidding verander met ‘n tempel vir Domitianus, en is o.a. Antipas in Pergamum weens sy geloof in Christus tereggestel (Openb.2:13).

Die slothoofstukke van die boek is kontrasterend opgebou. Aan die een kant staan die sedelose vrou Babilon, simbolies van Rome (17:1-18), teenoor die bruid van die Lam, simbolies vir Christus se kerk (21:2). Die sedelose vrou word vernietig, en konings, sakelui en seemanne huil (18:1-24). Gelowiges moet egter die kop oplig en luister na die aangrypende hallelujakoor uit die hemel wat God se verlossing verkondig (19:1-4), en die bruilof van die Lam breek aan (19:5-10). Ons moet sulke momente egter nie chronologies probeer verstaan nie, maar eerder as eskatologiese grepe om die eindtyd dramaties en triomfantlik voor te stel. Die bruilof is ‘n feesgeleentheid waar God se alleenheerskappy op die aarde gevier word, asook die verbintenis tussen die gelowiges (bruid) en Christus (bruidegom). Christus word in 19:11-21 geskilder as regter op ‘n wit perd wat voor sy leërmag beweeg om reg te spreek. Sy naam is ‘Woord van God’. Die twee diere wat in diens van die Bose is, die antichris en die valse profeet, word lewend in die poel van vuur gegooi. Goddelose mense word afgemaai en deur die roofvoëls opgevreet. Ook die Satan self word oorwin (20:1-6) en beland in die vuurpoel wat vir altyd brand (20:11-15). Die res van die mense, lewend en dood, moet voor die groot wit troon van God verskyn, waar die finale oordeel bekendgemaak word (20:11-15). Slegs dié wie se name in die Boek van die Lewe opgeteken is, spring die ewige dood in die vuurpoel vry (20:15). Só kom God se oordeelsvoltrekking tot ‘n einde. Al wat oorbly, is ‘n ode aan die verlossing met die aanbreek van die nuwe hemel en die nuwe aarde (21:1-8). Die nuwe Jerusalem daal neer uit die hemel, van God af, en is soos ‘n bruid getooi, simbolies van die volmaakte saamwees van die gelowiges met God en die Lam, volkome en volmaakte gemeenskap vir altyd (21:1-22:5).

Die hele laaste toneel sluit af soos dit in hoofstuk 12 begin het, met Christus se koms (22:17-21).

Vraag oor punt 4: Vir die eerste lesers van die boek Daniël was die boek se boodskap dat hulle in die tyd van die vierde ryk leef, onder die verdrukking van Antiogus Epifanes, die Griekse koning, wat hulle tempel ontheilig het en aan Zeus toegewy het, met ‘n altaar waar varke aan die Griekse god Zeus geoffer is, in 168-165 v.C.

Microsoft Encarta is volgens die geskiedenis korrek in hulle stelling dat die Babiloniese ryk deur die Perse oorgeneem is en die Mediërs toe reeds deur die Perse oorgeneem is. Maar die skrywer van Daniël het nie so gedink nie. Volgens Daniël 6:1-29 het Darius die Meder die koningskap by Belsasar die Babiloniër oorgeneem, Daniël in die leeukuil gegooi, en is deur Kores die Pers opgevolg. Volgens 9:1-3 het Daniël in die eerste regeringsjaar van Darius, van geboorte ‘n Mediër, vasgestel dat Jerusalem 70 jaar in puin sou lê. In 11:1-4 het Daniël vir Darius die Mediër bemoedig dat daar nog vier konings oor Persië sal regeer en die vierde sal die Griekse ryk opsweep, en dan sal Alexander die Grote regeer en maak wat hy wil. En as sy ryk skaars gevestig is sal dit in 4 opbreek. Dan gaan die hoofstuk voort met die stryd tussen die suidelike ryk onder die Ptolomeërs in Egipte en die noordelike ryk onder die Seleusiede, en hulle latere koning Antiogus Epifanes se soldate sal die heiligdom in Jerusalem ontheilig, die offers afskaf, en ding wat verwoesting aanrig en vir God ‘n gruwel is, nl. die Zeusbeeld, oprig (11:31, vgl. 9:27; 12:11). Van hierdie Darius die Mediër weet die sekulêre geskiedenis niks. Maar hy en sy regering vul die tweede deel van Nebukadnesar se droombeeld, die bors en arms van silwer.

Jesaja 13:17-20 praat ook van die Mediërs wat die Babiloniese ryk sal oorneem, vgl. ook 21:2; Jeremia 51:11,28. In Esra 4:5-24; 5:5-7; 6:1,12-15 word egter van Darius die Pers (522-486 v.C) gepraat wat vir Kores die Pers (539-522 v.C) opgevolg het (vgl. Haggai 1:1; 2:1,1; Sagaria 1:1,7; 7:1). Dit is blykbaar ‘n ander Darius as die een waarvan Daniël, Jesaja en Jeremia praat.

In Daniël 7 se droom tydens Belsasar se eerste jaar is daar vier diere: ‘n leeu met arendsvlerke (die Babiloniese ryk), ‘n beer (die Mediese ryk van Jesaja en Jeremia), ‘n vierkoppige luiperd met vier vlerke (die Persiese ryk met wêreldheerskappy), die skrikwekkende vreesaanjaende baie sterk dier met tien horings, met die kleinhorinkie wat die ander drie verdring en ‘n mond wat verwaande dinge kwytraak (die Griekse ryk wat in 4 split en die Siries Griekse Antiogus Epifanes as die klein horinkie se mond)

In Daniël 8 se visioen tydens Belsasar se derde jaar is daar twee ramme: die skaapram met twee horings, die korter een eerste en die langer horing tweede (Mediese en Persiese ryke), die bokram wat so vinnig oor die aarde beweeg (Alexander die Grote wie se horing van mag afgebreek het en met 4 horings vervang is wat na die vier windstreke toe gewys het) en uit een van die horings het ‘n onaansienlike horing gekom wat buitengewoon magtig geword het en selfs die daaglikse offer verbied, en God se tempel afgebreek het en ‘n sondige erediens in die plek van die daagllikse offer ingestel het en die ware godsdiens vertrap het (Antiogus Epifanes).

Die eerste lesers van Matteus 24:15 wat die verwoesting van Jerusalem deur die Romeinse generaal Titus in die jaar 70 n.C. beleef het, word verwys na die woord van Daniël se ‘die ding wat ‘n gruwel is vir God en wat verwoesting aanrig, wat in die heilige plek staan’ (Markus 13:14 ‘…staan op die plek waar hy nie moet wees nie’) Lukas 21:20 ‘wanneer julle sien dat Jerusalem deur leërs omsingel word, moet julle weet dat sy verwoesting naby is.’

 

Skrywer: Prof Francois Malan

Premillennialisme – Francois Malan

Pieter vra:

Ek wil graag weet hoe ’n premillennialistiese eskatologie (wat beweer dat ons tans in die “duisend” jaar vrederyk is) op die volgende antwoord: 1. Wat is die implikasie daarvan dat die Satan gebind is, in die afgrond gewerp en toegesluit is sodat hy die nasies NIE MEER VERLEI nie (Openb. 20:2-3)?

2. Wat is die hermeneutiese regverdiging daarvoor om die eerste opstanding (Openb. 20:5-6) allegories (eerder as letterlik) te interpreteer? 3. Hoe word die chronologie verklaar wat tussen Openb. 20 en Openb. 19 geïmpliseer word in Openb. 20:1 wanneer verwys word na die poel van vuur en swawel “waar die dier en die valse profeet is,” ooreenkomstig Openb. 19:20. 4. Watter verantwoording is daar vir die feit dat Dan. 2:44 sê dat die koninkryk wat deur God verwek sal word (a) die Romeinse koninkryk sal vernietig (– wanneer het dit gebeur?) en (b) dat dit al die ander koninkryke sal verbrysel (wat suggereer dat die koninkryk wat deur God verwek word in aard dieselfde as die vorige koninkryke is, naamlik as ’n politieke heerskappy).

 

Antwoord 

Prof François Malan antwoord:

In Die A-Z van Openbaring deur Jan du Rand 2007, by Christelike boekwinkels beskikbaar, is ‘n uitvoerige beskrywing van die pre-, post-, en a-millennialisme, in sy hoofstuk 19 oor Openb.19:6-21:8, vanaf bladsy 533-577. Ek gee van sy gedagtes hier weer.

Postmillinniariste meen Christus se tweede koms vind plaas na (post-) ‘n lang tydperk (simbolies 1000 jaar) van geregtigheid en vrede waarin ons nou lewe, nl. die aardse koninkryk van Christus in die geskiedenis. Die heiliges regeer op die aarde omdat die kerk al sy gesag van Christus vanuit die hemel ontvang. Die kerk regeer as priesters en konings deur die verkondiging van die evangelie en die onderrig en dissiplinering van die nasies. Daar wag egter vir die kerk ‘n tyd van aardse vrede in die toekoms. Maar die gelowiges wat gesterf het, regeer nie saam met Christus in die hemel nie. Hulle wag op die wederkoms.

Amillinniariste sien nie ‘n letterlike tydperk van 1000 jaar in die geskiedenis nie. Die goeie en die goddelose bestaan langs mekaar in hierdie wêreld tot met die wederkoms van Christus. Na die wederkoms breek die perfekte koninkryk van God aan. Die 1000 jaar is dus simbolies as simbool van volheid, vir die huidige tyd van die nuwe verbond, maar dit is ‘n tyd van vrede vir die gelowiges, vrede met God en ‘n oproep tot vrede met mekaar. Hulle verwag nie ‘n tydperk van aardse vrede vir die kerk nie. Die kerk moet nou reeds oorwin deur Christus se oorwinning op Golgota sigbaar te maak. Die stryd duur enduit voort teen die Bose, met verdrukking en vervolging vir die gelowiges tot die finale oordeel kom. En die gelowiges wat gesterf het, regeer saam met Christus in die hemel. Dit is die eerste opstanding.

Premillianniariste is oortuig dat daar na Christus se wederkoms, 1000 jaar van vrede en geregtigheid op aarde sal aanbreek, terwyl Christus self op die aarde saam met die gelowiges sal regeer vir die 1,000 jaar. Nou lewe ons voor die 1,000 jaar (pre = voor, millennium=1000)

Vir die verstaan en verklaring van die boek Openbaring is dit van belang om sy simboliek en voortgang van die beelde of gesigte raak te sien, ook met al sy terugverwysings na die Ou Testament en met die Joodse verwagting van sy tyd. As die hele boek letterlik opgeneem word, is daar slegs 144,000 mense wat ooit in die hemel kan kom, dié wat as God se eiendom verseël is (7:4-8). Hier is onderskeiding nodig tussen dele wat as letterlik en ander as simbolies verstaan moet word.

1 Wat is die implikasie daarvan dat die Satan gebind is, in die afgrond gewerp en toegesluit is sodat hy die nasies NIE MEER VERLEI nie (Openb. 20:2-3)?

Premillennialiste maak juis aanspraak daarop dat hulle die Bybelse profesieë letterlik interpreteer en toepas, en dat die ander groepe dit vergeestelik. So word die binding van die Satan letterlik geïnterpreteer. Hulle glo Christus sal terugkeer en die gelowiges sal opstaan om 1,000 jaar lank saam met Hom te regeer, terwyl die Satan gebind is. Eers ná die 1000 jaar van aardse regering sal die finale oordeel plaasvind en die goddeloses die ewige straf ingaan.

Volgens 1 Kor.15:50-54 vind die wederkoms en die finale oordeel egter by een geleentheid plaas: ‘By die laaste trompet sal dit in ’n oomblik, in ‘n oogwink gebeur, want die trompet sal klink, en die dooies sal as onverganklikes opgewek word, en ons sal verander word…’. 2 Tes.1:7-10 sê: wanneer die Here Jesus uit die hemel verskyn om te oordeel sal dit geskied op die dag wanneer Hy kom om verheerlik te word deur dié wat aan Hom behoort. In Matt.25:31 sê Jesus: wanneer die Seun van die mens in majesteit kom, sal al die volke voor Hom bymekaar gebring word, en sal Hy die mense van mekaar skei, dié vir sy koninkryk word geskei van dié vir die ewige vuur, wat God berei het vir die duiwel en sy engele.

Die postmillennialiste interpreteer die 1000-jarige ryk as ‘n aardse koninkryk van Christus in die geskiedenis. Die heiliges regeer op die aarde deur die verkondiging van die evangelie, met onderrig en dissiplinering van die nasies, omdat die kerk al sy gesag van Christus vanuit die hemel ontvang.

Volgens die postmillennialiste is die ketting waarmee die Satan gebind is ‘n mag wat die Satan weerhou om die nasies te verlei (2 Tes.2:7).

Oor sy kruisdood sê Jesus egter in Johannes 12:31-32: nou kom die oordeel oor hierdie wêreld; nou sal die owerste van hierdie wêreld, die Satan, uitgegooi word buitentoe. En as Ek van die aarde af verhoog is, sal Ek almal na My toe trek. Oor die dissipels se verwondering dat selfs die duiwels hulle aan die dissipels onderwerp by die aanhoor van Jesus se Naam, sê Hy: Ek het die Satan soos ‘n weerligstraal uit die hemel sien val (Luk.10:18). Nou is Jesus die Here wat regeer oor hemel en aarde. In Matt.28:18 sê Hy: aan My is alle mag gegee in die hemel en op die aarde. Maar Hy oefen sy mag nie met geweld uit nie. Dit is die mag van die liefde, wat ons innerlik sterk maak, die liefde van God wat in ons kom werk deur die Heilige Gees wat in ons kom woon het (Efesiërs 3:16-21). So bind Hy die Satan deur sy liefde in ons. Sy kruisdood uit liefde vir die wêreld het ons verhouding met God reggestel, en daardie selfopofferende liefde kom deur die Heilige Gees wat in ons woon om om ons te help om die goeie stryd te stry teen ons selfsug en die verleiding van die sonde en die bose magte (Efesiërs 6:10-18).

Daarom sê die amillennialiste die 1000 jaar is ‘n figuurlike of simboliese beskrywing van die hele tydperk van die nuwe verbond. Hulle sien nie uit na ‘n aardse Messiaanse koninkryk soos die premillennialiste met ‘n herstel van Israel en Jerusalem, en ‘n massabekering van die Jode en die nasies tydens die 1000 jaar van vrede op die aarde nie; ook nie na ‘n huidige ‘goue Messiaanse era’ van 1000 jaar nie, wat die kerk nou deur sy prediking help voorberei tot die wederkoms, dat Christene besig is om die duisendjarige ryk te vestig, soos die postmillenniariste glo nie; maar na ‘n geheel en al geestelike nuwe skepping, soos 2 Kor.5:17 sê: iemand wat aan Christus behoort, is ‘n nuwe mens. Die oue is verby, die nuwe het gekom. Christus se kruisdood lui die koninkryk van God in, Hy het die Satan gebind, maar die Satan bly doenig. Christus regeer nou reeds geestelik in die gelowiges se hart. In hierdie tydvak het die Satan steeds beperkte speelruimte. Daarvan is die ketting ‘n simboliese voorstelling (Openb.20:1-2). Op die Satan se binding word gesinspeel in Matt.12:29 se vasbind van die sterk man, deurdat Jesus deur die Gees van God die duiwels uitdryf (Matt.12:28). In Kolossense 2:14-15 word gesê dat God ons sondeskuldbewys met sy eise aan die kruis gespyker het, en die bose magte daardeur ontwapen het. Christus se sterwe neem ons sonde weg en oorwin die Satan. Die klein rukkie waarin die Satan losgelaat sal word, kan dui op die meer intensiewe teistering deur die Bose hoe nader die einde kom.

2. Wat is die hermeneutiese regverdiging daarvoor om die eerste opstanding (Openb. 20:5-6) allegories (eerder as letterlik) te interpreteer?

Vir verskeie interpretasies van die eerste opstanding van Openb.20:5, vgl. Durand op p.566.

Die eerste dood wat in Openb.20:6 geïmpliseer word, slaan op die fisieke of liggaamlike dood, en die tweede dood op die ewige straf in die helse vuur (vgl. Openb.21:8). In die lig daarvan is die eerste opstanding van Openb.20:5 ‘n geestelike opstanding, in die betekenis van Filippense 1:23: ek verlang daarna om heen te gaan (= te sterf) en met Christus te wees. Vgl. ook 2 Kor.5:1-5 wanneer ons aardse tentwoning afgebreek word, het ons ‘n vaste gebou in die hemel wat ewig bly staan. Vir die oorgang het God ons voorberei. As waarborg daarvan het Hy ons sy Gees gegee. Vgl. ook Jesus se woorde aan die rower aan die kruis ‘vandag sal jy met My in die paradys wees (Luk. 23:43).

3. Hoe word die chronologie verklaar wat tussen Openb. 20 en Openb. 19 geïmpliseer word in Openb. 20:1 wanneer verwys word na die poel van vuur en swawel “waar die dier en die valse profeet is,” ooreenkomstig Openb. 19:20.

Vgl Durand se bespreking van 19:6-21:8 vanaf bladsy 533. Hy verwys na die volgende oorkruispatroon:

a die prostituut Babel se uittog (17:1-19:5)

b die bruilofsfees van die Lam en sy bruid as oorwinning oor die Bose (19:6-10)

c die Regter-Krygsman op die wit perd, en die oordeelsvoltrekking oor die

antichris en die vals profeet (19:11-21)

d die Satan is oorwin (20:1-9)

c1 Hy wat op die groot wit troon sit en die oordeel oor die goddeloses

bekendmaak (20:10-15)

b1 oorgang na die nuwe Jerusalem en die finale oordeelsvoltrekking oor die goddeloses

(21:1-8)

a1 die bruid, die nuwe Jerusalem, se intog (21:9-22:5)

Dit is moeilik om elke gebeurtenis in ‘n chronologiese raamwerk te plaas, en tog is die leser bewus dat die hele verhaal progressief afstuur op ‘n spesifieke eindbestemming wat deur God bepaal is.

4. Watter verantwoording is daar vir die feit dat Dan. 2:44 sê dat die koninkryk wat deur God verwek sal word (a) die Romeinse koninkryk sal vernietig (– wanneer het dit gebeur?) en (b) dat dit al die ander koninkryke sal verbrysel (wat suggereer dat die koninkryk wat deur God verwek word in aard dieselfde as die vorige koninkryke is, naamlik as ’n politieke heerskappy).

Vgl. die bespreking en uitleg van Jasper Burden in die Verklarende Bybel se Daniël.

Die boek Daniël beskryf die geskiedenis van Daniël (hoofstukke 1-6) en bevat gesigte wat hy gesien het (hoofstukke 7-12) sedert die jare 586 v.C. toe Nebukadnesar Jerusalem verower het tot in die tyd van Darius die Mediër wat in 522 v.C. begin regeer het (vgl. Dan.6:29). Die boek het egter sy finale beslag 350 jaar later gekry, tussen die jare 168 v.C. toe die Griekse koning die tempeldiens van die teruggekeerdes in Jerusalem laat ophou het en die altaar ontwy het (vgl. Dan.9:27; 11:31; 12:11), en 165 v.C. met die herinwyding van die tempel wat nie in Daniël vermeld word nie.

Die kolossale droombeeld van Nebukadnesar se naggesig met vier metale en klei wat al swakker word (2:32-33), word soos volg verklaar in 2:37-43: die kop van goud is Nebukadnesar en die Babiloniese ryk (2:37-38), daarna kom die Mediërs ‘wat nie so belangrik’ soos die Babiloniese ryk is nie as die bors en arms van silwer (v39a), daarna die Perse ‘wat oor die hele wêreld heerskappy sal voer’ onder Kores/Cyrus as die maag en heupe van brons (v39b), en daarna die Grieke onder Alexander die Grote as die bene van yster wat alles vergruis (v40) wie se koninkryk na sy dood in 4 dele onder sy generaals verdeel is as die voete wat deels van yster en deels van klei is (v41-43). Antiogus Epifanes se voorouer was een van die generaals.

Die klip wat die beeld vernietig (2:34) word in 2:44 verklaar as die koninkryk van God wat met die koms van Christus aangebreek het en vir altyd sal bestaan, en waarin die gelowiges die ewige lewe ontvang (vgl. Dan.12:1-3).

 

Skrywer: Prof Francois Malan

Openbaring 19 – 21 – Jan van der Watt

Jan vra:

In Openbaring 19: 11 tot 21 word van die perd geskryf met Hom wat daarop sit Getrou en Waaragtig en Hy oordeel en voer oorlog in geregtigheid. Die leërs in die hemel het Hom gevolg op wit perde, bekleed met wit en rein fyn linne.Hy is Die Woord van God en die Koning van die konings.Uit Sy mond gaan daar ‘n skerp swaard om die nasies daarmee te slaan en Hy sal hulle met ‘n ysterstaf regeer en Hy trap die parskuip van die wyn van die grimmigheid van die toorn van God, die Almagtige. In Openbaring 20 na die duisend jaar sal die Satan uitgaan om die nasies te verlei en hulle te versamel vir die oorlog en hulle getalle sal wees soos die sand van die see. Toe hulle die geliefde stad omsingel, het God vuur uit die hemel laat neerdaal en hulle is verslind en die ou slang is in die poel van vuur gewerp ens. Vraag: Hoekom sou Jesus in die een geval self tot die stryd toetree met die leërs van die hemel en in die volgende geval gooi God vuur uit die hemel om hulle te verdelg. Wat is dan die nut van die verskriklike leermag as God met die roer van ‘n enkele vinger die nodige kan doen, asseblief?

Antwoord

Prof jan van der Watt antwoord:

Hoofstuk 20 is een van die moeilikste hoofstukke om te verklaar in die Bybel, aangesien dit oor die 1000jarige vrederyk handel en hoe dit presies geïnterpreteer moet word, is nie altyd duidelik nie. Jou vraag gaan egter nie daaroor nie, maar oor die feit dat in hf 19 Jesus as die ruiter op die wit perd die finale veldslag teen die duiwel en sy trawante lei en deurvoer terwyl in Hf 20 dit God is.

Om die gedeelte te verstaan moet ons na Open 4-5 gaan waar God as die Koning van die heelal geskets word. Konings in daardie tyd was so sterk as wat hulle diensknegte gehad het om hulle te help. Daarom sien ’n mens God min self optree in Openbaring. Sy engele en diensknegte doen alles – Migael (en nie God of Jesus nie) veg selfs teen die duiwel in Open 12. In Open 5 hou die Koning dan ook ’n boekie in sy hand waarin die geskiedenis wat gaan ontvou, opgeteken is. Niemand wil dit vat nie, want niemand is instaat om die geskiedenis te laat ontvou nie. Jesus is wel en daarom neem Hy die boekie. God werk dus deur Jesus as die Een wat namens hom sy wil op aarde deurvoer.

Strengesproke is dit God wat dit doen, maar Hy doen dit net deur Jesus. (Byna soos ’n amptenaar wat deur sy baas aangestel word om iets te onderhandel en dan verskyn dit in die koerant dat die baas dit gedoen het). Wat Jesus doen en wat God doen, val dikwels saam. Jesus kan iets doen en dan kan gesê word God doen dit en omgekeerd. In Open 19 word die verloop van die finale veldslag beskryf waarin die magte van die bose deur die magte van die God vernietig word – aan die einde van Hf 19 eet die roofvoëls die vleis van die konings van die aarde. In Open 20:7 en verder is die konings skielik weer terug. Hoe kan dit wees? Wel, die verhaal van Open 20 loop parallel met die verhaal van hf 19, hoewel dit later in die verhaal vertel word. (Soos as ons vertel: ons het gaan vakansie gehou by die see en het veilig teruggekom. Piet is natuurlik deur ’n brander omgeslaan… Hoewel die laaste deel van die storie later vertel word, kon dit alleen gebeur het voor ons teruggekom het van die see af en pas dus iewers in die eerste storie in).

Maar hoe rym dit dat in die een geval daar oorlog deur die Ruiter op die wit perd is en in die ander geval vuur wat die geveg beïndig. Ons moet versigtig wees om nie Openbaring letterlike te lees nie. As daar vandag iemand op ’n perd aangery kom om oorlog te maak teen Amerika of wie ook al is die oorlog gou verby. Nee, die wit perd was ’n simbool van ’n oorlogsmag wat net kan wen (wit is die kleur van oorwinning). Tegelykertyd is vuur die simbool van God se vernietigende oordeel. As daar staan dat God mense met vuur straf, beteken dit dat Hy hulle vernietigend straf. Beide simbole of beelde (die van ’n oorlogsperd en van vuur) wil dieselfde sê: God (deur Jesus) gaan die vyand vernietigend verslaan en oordeel.  

Waarom doen God dit nie self nie? Juis in Open 5 sien ons dat sy plan anders werk. Hy gebruik Jesus as die Een wat namens Hom sy wil moet uitvoer. En aan God se planne kan ons nie veel verander nie en nog minder aan God voorskryf wat om te doen.

 

Skrywer: Prof Jan van der Watt