Die Groot Geloofswoordeboek: Sinode, Ring, Kerkraad

Die Groot Geloofswoordeboek: Sinode, Ring, Kerkraad

Sinode (Konsilie) • Ring (Klassis) • Kerkraad

Dit is woorde wat gebruik word vir amptelike kerkvergade­rings. “Konsilie” is die woord wat gebruik word vir die algemene ver­gaderings van kerke in die vroeë era na Christus, en ook tot van­dag toe vir dié van die Katolieke Kerk. Sinode word in die Gereformeer­de tradisie gebruik, maar ook algemene kerkverga­de­ring (deur die Ne­der­duitsch Hervormde Kerk). Net so ring (of klassis in die Ge­reformeerde Kerke), en kerkraad. In die Pinkstertradisie is daar nie so ‘n vaste sisteem en terme nie. Hulle neig ook om meer gesag aan die plaaslike gemeente te gee, baie soos die Baptistedenominasies waar sulke algemene ver­gaderings glad nie bindende besluite vir gemeentes kan neem nie.

Kerkraad

‘n Kerkraad is in die Gereformeerde tradisie die re­gsinstansie en die bestuursliggaam van ‘n gemeente. Dit bestaan ge­woonlik uit die predikante, ouderlinge en dia­kens. Afhangende van bedieningstyl aanvaar die kerkraad óf verant­woordelikheid vir die hele bediening van die gemeente óf net vir die or­ganisasie daarvan wat dan deur gemeente­lede in terme van hul gawes gedoen word. (*Bedienings) In ander tradi­sies is daar ge­woonlik ook ‘n raad of groep wat die regsliggaam is wat ver­antwoordelikheid in die gemeente aanvaar.

Ring (Klassis), Sinode

‘n Ring of klassis verteenwoordig ‘n kleiner groep gemeen­­tes of plaaslike kerke, en ‘n sinode meer of selfs alle gemeentes. Waar ‘n kerkgenootskap meer as een sinode het, sal daar ook ‘n al­ge­mene sinode wees wat dan al die gemeentes ver­teen­woor­dig. Hierdie breër kerkvergaderings kan gewoonlik besluite neem wat bindend vir alle gemeentes is, maar daar is heelwat ver­skille hieroor.

Skrywer: Prof Adrio König