Woorde uit die Bybel – Die duiwel (1)

Woorde, ook woorde in die Bybel, het ‘n spesifieke betekenis. Vir mense sonder teologiese opleiding is dit dikwels moeilik om die volle betekenis van woorde te verstaan.

J. I. Packer het ‘n boek geskryf wat ons kan help: 18 Words: The Most Important Words You Will Ever Know. Ons gaan kyk na enkele van hierdie woorde. [Teksgedeeltes kom uit Die Boodskap.]

Daar is baie mense wat nie aan die bestaan van die duiwel glo nie. Daar is selfs boeke geskryf deur Christene wat die bestaan van die duiwel bevraagteken. Maar wat sê die Bybel? Trek die klere aan wat God vir julle gegee het om mee te veg sodat die duiwel julle nie sommer om die eerste hoek en draai met al sy slim planne oorrompel nie (Efesiërs 6:11). Die Bybel maak dit duidelik dat daar wel iets soos die duiwel is.

Die Christen se lewe word beskryf as ‘n slagveld. Die goue reël in oorlogvoering is dat jy jou vyand moet ken. Eers as ons hom ken, kan ons hom doeltreffend beveg. Die waarheid van die duiwel sal ons slegs ken as ons hom in die lig van die waarheid van God sien.

As ons praat oor die duiwel is daar twee probleme waarvoor ons baie versigtig moet wees:

• Ons gee te veel aandag aan die duiwel. Die duiwel is nou die belangrikste tema in ons hele godsdiens. Dit skep ‘n baie negatiewe beeld van die Christelike lewe. Net so min as wat Ek my wil ophou met die dinge van die sondige mense, sal hulle dit wil doen (Johannes 17:15). Wat ons moet besef, is dat die duiwel op Golgota oorwin is.
• Ons gee te min aandag aan die duiwel. As ons die duiwel nie ernstig genoeg opneem nie, kan twee dinge gebeur:

Ons is nie meer bewus van die gevare van die duiwel se aanslae nie.

Ons water die belang en betekenis van die kruisdood van Jesus Christus af.

Moenie behep wees met die duiwel nie, maar moet hom nie onderskat nie. In die geestelike stryd moet julle op en wakker wees. Julle het ‘n gevaarlike vyand, die duiwel. Hy loop rond soos ‘n honger leeu wat iemand soek om te verskeur. As hy julle aanval, moet julle met julle geloof in die Here terugveg (1 Petrus 5:8).

Volgende keer kyk ons na hoe ons teen die duiwel moet veg.